Мы си тхылъыр дунейм къытехьащ Ерчэнхэ Темболэтрэ Джамболэтрэ я жэрдэмкIэ (хьэрычэткIэ). Апхуэдэ гуапагъэ си лъэныкъуэкIэ къэгъэзауэ зэралэжьам щхьэкIэ зэкъуэшитIми ину фIыщIэ яхузощI икIи мыпхуэдэ псалъэхэмкIэ захузогъазэ: «ВжызоIэр тIуми берычэт бесын, схухэфшащи лъагъуэ си усэ кIэщIхэр щIэджыкIакIуэхэм я деж зэрынэзгъэсын».

Джатокъуэ Юрэ

 

ПСАЛЪЭПЭ

Дэтхэнэ усакIуэми тхакIуэми иIэжщ езыр нэхъ дэзыхьэх, нэхъ зыхуэшэрыуэ, нэхъ къехъулIэ, нэхъ зытетхыхь темэ. Литературэм и жанрхэр къапщтэмэ, ахэр лIэужьыгъуэ зыбжанэу, хэт нэхъ гугъуу, хэти нэхъ тыншыIуэу зэщхьэщедз. Нэхъ гугъухэм, къэгъэIурыщIэгъуейхэм хабжэ сатыр плIырыплI нэхъыбэ мыхъуурэ, ауанкIэ, гушыIэкIэ, хъуэрыбзэкIэ гъэпса усэ кIэщI цIыкIухэр. Джатокъуэ Юрэ куэд щIауэ йолэжь мис а нэхъ «гугъу» жанрым. Юрэ и усэ «пIаскIуэхэр» щызэхуихьэса тхылъхэр дунейм къытехьащ. Псалъэм папщIэ, 1995 гъэм къыдэкIащ «Лъэмыж нэпцI» тхылъыр, 2002 гъэм тхылъе джэм Iэрыхьащ «Аркъэн» тхылъыр. Джатокъуэр зытетхыхьыр фIыуэ зыщыгъуазэ, игъэунэхуа Iуэхухэрщ. Узыщыгъуазэмрэ бгъэунэхуамрэ къептхэкIыж къудейкIэ, ар литературэ хъунукъым, псом хуэмыдэу, усыгъэм щехьэлIам деж. Юрэ махуэ къэс зыхуэзэ Iуэхугъуэхэр, зыхэт цIыхухэм ядилъагъухэр езым и IуэхуеплъыкIэрэ бгъэдыхьэкIэкIэ зэпкърихыурэ, ар нобэрей зэманым зэрепхьэлIэфынкIэ хъунум хуэдэу ирихьэлIэну хущIокъу. «СатыриплIхэм» яхэтщ дзакъи, пIаскIуи, къыпщыдыхьэшхи, къохъурджауи. А Iуэхугъуэхэр усыгъэм и къупхъэм игъэжыкIыгъуафIэкъым, атIэми, Джатокъуэр хущIокъу усэ сатырхэр езым иубзыхужа къупхъэм IэкIуэлъакIуэу иригъэтIэсэну. Я нэхъыбэм деж къохъулIэ ар Юрэ. Ауэ, мэлищэ щIакъуэншэкъым, жыхуаIэращи, къемыхъулIа гуэр тхынри зыхужамыIа щыIэкъым. Джатокъуэм гъащIэм и пIалъэ ещIэ. Къэхъун адыгэ жылэжьым 1938 гъэм къыщалъхуа, 1956 гъэм курыт еджапIэр къыщызыуха Юрэ урысыбзэмрэ литературэмкIэ егъэджакIуэу университетыр къызэриухрэ ныбжьыщIэхэм яхэтщ, цIыкIухэр ирегъаджэ икIи, нэхъыщхьэращи, и тхыгъэ куэдым лъабжьэрэ къежьапIэрэ яхуэхъур езыр зыхэт зыдэлажьэ щIалэгъуалэм, щыпсэу къуажэм дэс лэжьакIуэжьхэм ядилъагъу Iуэхугъуэ зэмылIэужьыгъуэхэрщ. Зи гъащIэ псор егъэджакIуэу къезыхьэкI Джатокъуэм цIыкIухэр урысыбзэмрэ литературэмрэ щIепIыкI. Апхуэдэуи ар илъэс бжыгъэ гуэркIэ лэжьащ Къэхъун дэт езанэ курыт еджапIэм и директору. Егъэджэныгъэм и мызакъуэу, Юрэ сыт щыгъуи гъащIэм и курыкупсэм хэтщ, нобэрей цIыхум и псэукIэм, дуней тетыкIэм, и гум щыщIэхэмрэ зыхуэпабгъэхэмрэ фIыуэ къыгурыIуэу, а цIыхум и дуней тетыкIэмрэ гупсысэмрэ нэхъыфI хъуным и къалэмыпэм къыщIэкI усэ сатырхэр хуигъэлэжьэным хущIэкъуу. Джатокъуэм и тхылъхэр гулъытэншэу къагъэнакъым, а тхылъхэм еджахэми, ди критик, усакIуэ нэхъыжьхэми. Юрэ псалъэ гуапэ хужаIащ критикхэу Сокъур Мусэрбий, Шэвлокъуэ Петр, усакIуэ Тхьэгъэзит Зубер сымэ. Джатокъуэм и IэдакъэщIэкIхэр япэ дыдэу къытридзауэ щытащ «Советская молодежь» газетым 1957 гъэм. ИужькIэ ахэр къытехуащ ди республикэм къыщыдэкI газетхэми, «Iуащхьэмахуэ» журналми. Ахэр мызэ-мытIэу радиокIи, телевиденэкIи ягъэIуащ. Усэм и закъуэкъым Джатокъуэм и къалэмыр зыхуэлажьэр. Юрэ и Iэдакъэ къыщIэкIауэ урысыбзэкIэ дунейм къытехьащ езыр и гъащIэ псом зыпыщIауэ къекIуэкI Къэхъун курыт еджапIэ езанэм и тхыдэм триухуа «Первая Кахунская…» тхылъыр. Джатокъуэм и тхылъымкIэ щыгъуазэ дещI Къэхъун езанэ курыт еджапIэм щеджа, иужькIэ цIэрыIуэ хъуа щIэныгъэлIхэм, лэжьакIуэжьхэм. Езыр щылажьэ еджапIэм, къыдэлажьэхэм, зыдэс къуажэм, и къуажэгъухэм ялэжь, ягъахъэ псоми набдзэгубдзаплъэу, гудзакъэ иIэу зэракIэлъыплъыр аращ нэхъыбэу къызыхэкIар Юрэ нобэ тхылъеджэм и пащхьэ ирилъхьэ и лэжьыгъэщIэри. ЖыпIэфынущ, нэхъапэм къыдигъэкIахэм я натIэ хъуар, мы тхылъыщIэми къыпэщылъу икIи ар къеджэхэм гуапэу ящтэну.

Уэрэзей Афлик

 

 

ЗЭМАНЫМ ПЭДЖЭЖ УСЭХЭР

 

МЭТ И УПЩIЭ

ЙоупщIыр блэкIхэм,

Налшык къалэм дэтщи, Мэт:

«ФымыщIэу пIэрэ зыщыпсэур

Си ныбжьэгъужьу Мухьэмэд?»

 

ИДЖЫРЕЙ КЪУАРГЪЫМ

Тыкуэным къыхураха нэужь

И адэ-анэм «сотэр»,

Къэувыжащ аргуэру лъаIуэу,

Къыхуащэхуну «шестисотэр».

 

МОНОПОЛИСТЫМ

И закъуэпцIийщ бэзэрым тетыр.

(ФIыуэ ещIэр зэрыщыIэр хуей)

Къонэпсейри, и гъуэз уасэр,

И щхьэм къицыуэхукIэ, дрехуей.

 

ХЪЫМБЭЗЭРЫМ

«Къодзакъэр,– жи,–

ЩызекIуэ уасэхэр бэзэрым»,–

Техьэн имыдэ

Бэзэрым Хъымбэзэрым.

 

ЛЭХУ И «МАРДЭ»

«Мардэм сытемыкIыу

Софэр»,– жеIэр Лэху:

Ар ефэнущ фадэм,

Фадэм итхьэлэху.

 

ШЫГУ ЗЕХУЭКIЭ ЗЫМЫЩIЭМ

Хуземыхуэ

Дахэ-дахэу шыгур:

Дэсагъэнкъым а Кушыку

Зэи хьэмкIэшыгум.

 

БЫЖЫМ И «ЕПЛЪЫКIЭ»

Хамэ бынхэр уубмэ, нэхъ тэмэму къебжыр Быжым:

«Ууейхэр уубыжу щытмэ,– жи,–

Абы къокIыр

Уи щхьэр уубыжу».

 

ЛЭЖЬЫГЪЭМ ЩЫУЖАМ И МОНОЛОГ

«Къысхуэгъуэткъым

Ди зэманым иIэу лажьэ:

Сыувау, сыIутщи биржэм,

Къызат ахъшэ сызэрымылажьэу».

 

ЗАУЭМ ХЭТА IИЛЭ И ПЩIЫХЬЭПIЭ

«Ныжэбэ кIуам

Хьэлэмэтлажьэу

Слъэгъуащ пщIыхьэпIэ,–

ЖеIэр Iилэ:-

Къыхуэпсэлъахэр,

Я мыпщIантIэпскIэ

Хамэ къэралхэм щызыщIахэр виллэ

Къилъыхъуэ хуэдэу,

Къэтэджыжауэ Джугашвили».

 

ЩЫГЪУПЩЭХ ХЬЭЧИМ

Къелъытэжыр зы ткIуэпс закъуи

Емыхау и джийм,

Махуэ къэскIэ аркъэ литр,

Пэщ щымыхъуу,

Изыфыф Хьэчим.

 

МУЛИД-«ИНВАЛИД»

Хузэпхынущ

Накъэдыкъэу лIитI,

Ныкъуэдыкъуэуэ къабжауэ,

Ахъшэ хъушэ зыхуаший Мулид.

 

НАХЪУЭ И ПЭЖ

ХещIыкI хъарзынэу

Бизнес Iуэхум Нахъуэм:

«ЩыIэщ,– жи,– абы

Теуни, теунахъуи…»

 

МЫХУЭ ДЕПУТАТ

Хэтха щхьэкIэ депутату Мыхуэ..,

Мыхуэ и щхьэ Iуэхум къыдэмыхуэ.

 

МЫКЪЭ

Мэдыхьэшхыр зэгуэуду

АуанщIакIуэ Мыкъэ:

Ирипсалъэ хуэдэу зещIыр

«Сотовэм» Хьэмыкъэ.

 

МАХЪСИДЭ

«Еу-уей мыгъуэ!

Ехьыр,– жеIэр,– си дэр»,

Псым итхьэлэу ирехьэхри

Нэпсеижь Махъсидэ.

 

ТIЫХЪУЭМ

ХуэIэзэ хъуащ дыгъуэкIэм

Юрист ТIыхъуэр:

«Утетуи хабзэм,

Мэхъур,– жи,– удыгъуэ».

 

КЪАТИТIУ ЗЭТЕТ УНЭ ЗЫЩIАМ

КъэзыцIыхухэм абы и щхьэм

Бзаджэу щыIэр фIапIэ:

Зыкъизыхыу ищIа унэм,

Щосхьри, мыIэпхъуэж –

Щехь и гъащIэр

Гъуэмбырэщ пщэфIапIэм.

 

КЪЭЩIЭРЕЙ И УСЭ

Илъэс мащIэщ къратынур

(Ухуейм, къакIуэ баз):

Мылъку куэдыщэ къидыгъуащ

А уэ пщIэ Хьэбас.

 

ХЕЯЩIЭ (СУДЬЯ) ГЪУЖЫМ

Шхыным нэр ирещI

Адыгэ псалъэжьщ

АпхуэдизкIэ шхыным и нэр

ИрищIати, судья Гъуж,

КъекIуэкI хабзэхэм я хьэрфхэр

Хъуат имылъагъуж.

 

КЪЭЩIЭРЕЙ ГУМЭМ

«Олигархым хьэр зэрейр

КъэсщIащ,– жеIэр Гумэм:-

Дыщэ тхьэгъухэр щытщ ищIауэ –

Еплъыт, и тхьэкIумэм».

 

БЮРОКРАТ IУЖАЖЭМ И РАПОРТ

Хъыбар етыр иухауэ

И бригадэм сэн,

Зи бригадэм зэкIэ вэным

ЩIимыдза Хьэсэн.

 

IЭМАЛЫНШЭЩ МЫШЭ

Иролажьэ (Iэмалыншэщ)

Мышэ ломым:

Трилъхьэну хузэфIэкIкъым

Iулъхьэ и дипломым.

 

ХЬЭУТИЙ

И ныбжьэгъуми хуимыдэну,

КъыжриIэу «ты»:

Министерствэм и Iэтащхьэ

ЯщIащ Хьэутий.

 

АДЫГЭЩIЭ ДИН

ПщылI «хъарзынэ» къигъуэтащ

АдыгэщIэ Дин:

Тутыныхьэ игъэкIуащ

И адэ Хьэбэдин.

 

ТЫКЪУЭМ И ПРОГНОЗ

Ди улахуэр и чэзум

Къыдатыну

Шэс йохьэжыр Тыкъуэр:

«Фегупсысыт. Къэблэгъащ,– жи,–

Зэман Iэ Iэтыгъуэр…»

 

КЪЭЩIЭРЕЙ И УСЭ

Сомым и щхьэр тIэкIу къиIэтмэ,

И цыр мэтхъур Толэ:

Шэч хэмылъу, кассэм хэлъу

Абы иIэр долларщ.

 

ДОТЭ И ГУПСЫСЭ

«Си щхьэм щхьэкIэ къамыщэхуми

Содэр «сотэр»,

Сядэ-сянэм къысхуащэхуу

Щытмэ «шестисотэр».

 

ЩХЬЭХУЕЩЭ МЭЗАН

Щосхь – и бжыхь тIорысэм

И ажэр иримыпх Мэзан.

ЩигъэхъуэкIуэнум деж, къеубыдри,

Ирепх и бжыхь щIэрыпсым Рэмэзан.

 

ТЕНЭМ И ДЕРС

«Нэхъ тыншу упсэунущ,–

ЖеIэр нэщIэбжьэ куэд

Зи нэгу щIэкIа Тенэм,–

Нэхъ мащIэ къиубыдмэ

А уи щхьэ пфIэтым и антеннэм».

 

НАРКОМАНЫМ (АФИЯНЫМ ДИХЬЭХАМ)

ГъущI куэбжэ зиIэр,

гъущI мастэ щощIэ.

Адыгэ псалъэжьщ

Хуеижкъым ар

ГъущI куэбжи, гъащIи,

Псэуху тIэкIу,

ГъущI мастэм щумыгъащIи.

 

ДЫГЪЭМ И УПЩIЭ

Ирет Чубайс мыпхуэдэ упщIэ дыгъэм:

«Апхуэдизрэ щхьэ дэпхуейрэ

Уэ и уасэр

Си къарукIэ бгъаблэ

Уи уэздыгъэм?»

 

БЛИЦЭ

ЩищIалэгъуэм хэкъузауэ

Яхуеджакъым Блицэ –

Къепщытэж иджы и жьыщхьэ

Зэрагъэбагъуэм и таблицэр.

 

ЩХЬЭПСЫМ

БгъэдокIыжыр и щхьэгъусэм,

Къэцыджауэ, Лерэ:

КъемыупщIу, къемыусэу.

Къопсыр илI Валерэ.

 

ИДЖЫРЕЙ «ЗЫЗЫГЪЭIЭЗЭ»

IЭЩIАГЪЭЛIЫМ

ЗигъэIэзэ Iэпэзадэу,

МыIэрысэм дедзыр мыр,

Жыг лъэпкъыщIэ къигъэкIыну

И мураду Жантемыр.

 

ХЫХЬЭХЭКI ЗИIЭ ХЬЭКIЭМ И ДЕРС

Нобэрей гъащIэм

Зыкъом хещIыкIырХьэкIэм:

«Iуэху узыхыхьам и хэкIыжыкIэр

Елъытащ,– жи, – куэдкIэ уи хыхьэкIэм».

 

НАПИТIЫМ

«Ди хэкур лъэщ дывгъэщI»

ЖызыIэ КIутIэ

И жыпхэр

Къэрал ахъшэкIэ екудэ.

 

ХЬЭЖБИЛАЛ

«Щхьэ лъэпсей,– жи,– мы уи лалыр?»,

Бгъэдыхьауэ сату зыщI Билал,

Iусым, мэкъум уасэу яIэм

Щымыгъуазэ Хьэжбилал.

 

КЪАНЩАУЭ

И адэ-анэм игу ирохь я жьауэр –

ЩIигъэтщ и бынхэри Къанщауэ.

 

«ТIУРЭ И КОРРЕКТУРЭ»

Редактор пажэу зэрыщытыр

Къимыгъэлъагъуэу хъуркъым ТIурэ:

Тэмэму тхахэм, зигъэIэзэу,

Абы хелъхьэжыр «корректурэ».

 

ИНЖЕНЕР НАТРЫБЫМ

Натрыб мэлажьэ,

Тету «НОТ»-м:

Завод къэуэжым къыщидыгъухэр

Иретхэ щэхуу и блокнотым.

 

ЛЪЭIУЭРЫПЭ МЫКЪУЭМ

Сытым щхьэкIи мэлъаIуэр Мыкъуэр:

И вакъэ лъэпсыр ипхэжынум,

«КъыздэIэпыкъут»,–

ЖреIэр Мэремыкъуэм.

 

ЗЭРЫМЫЛЪ ПЭ ЛЪАГЭМ

ЕIэтыр лъагэу

И пэр Хъыным :

КъыфIощI къихуауэ

Псори и пэщхъыным.

 

ЗИ НЫБЖЬ ХЭКIУЭТА ХЬИСЭ И ХЪУЭХЪУ

«Тхьэм дищI пэIэщIэ

Псори и сэм

Тхылъ цIыкIум ахъшэхэр дэзылъхьэу

Медфакыр нобэ къэзыух Раисэ!»

 

МЫЛЭ И ЩТАМЫЛЭ

ЩIигъэнэфкъым мафIэ,

Сыт имыщIэм, Мылэ:

Къыхуэгъуэтыркъым щтауч,

ИIэми щтамылэ.

 

«ШОФЕР ХЪЫЖЬЭМ»

Къэзылъхуахэрщ

Къэзыщэхур шинэр–

Пхэ шэрхъитIыр щIэфиежу,

Игъэтхъуащ машинэр.

 

ЕБЛАНЭ КЛАССЫМ ЩIЭС ХЬЭЛИЙ

«Узикъуэр хэт уэ?»–

ЖиIэу хэт къеупщIми,

Жэуап иритыркъым Хьэлий:

Дыгъуэш-дыгъуэлIу

И цIэр игъэIуащ

Абы и адэ Нурхьэлий.

 

ФАДЭР ЗИ НЭРЫГЪЫМ

Фадэбжьэр лъагэу иIэтауэ,

Йохъуэхъу и унафэщIым Мусэ:

«Сигъэтхъэжащ,– жи, – мазэ хьэкъыр

Аркъэуэ къызитри Хьэжмусэ».

 

ШУТIЭ – МЫШУТIЭ

ЯщIа нэужь

Министр, ШутIэ

Щыгъупщэжащ

Зэрыщытар МышутIэу.

 

ФIЫЦIЭЖЬ ТУЗЫМ

Щхьэрыгъ пыIэр ихъуэжащ

ЩIэхуа фIыцIэжь тузым:

ЩIэхуа нихми къищэхуат

Хуэдэ и кIартIузым.

 

ТIУТI И ЕПЛЪЫКIЭ

«ТхукIэ» школыр къиухами,

Щахуемыджэ вузым ТIутI:

«Мес, мэлажьэр,– жи, – пхъэнкIакIуэу

Къэзыухахэр институт».

 

ЕДЫДЖ И ФИЛОСОФИЕ

«Зэзэмызэ уемыбзеймэ дыджым,

IэфIри къыпхуэмыщIэ»,– жи Едыджым.

 

ЧЭФ ЗИIЭ ЛЪАШЭМ

Зыщотхъужыр къэувауэ лъашэр:

«Схуэдэ искъым,– жи, – мы ди Iэшэлъашэм».

 

ТIАН И ДЕРС

«Iур зыIыгъхэм ягу удыхьэу,

УIужажэм,– жеIэр ТIаным,–

Усержантми, къуатыфынущ

И къулыкъур капитаным».

 

ЛУТIЭ

Бгы нэхъ инри екъутэфыр

И джэдыкIэм ЛутIэ:

Къэп гъуэжьыжьхэм игуэшауэ,

ИIэщ инвалютэр.

 

ШТIЫМ ОЛИГАРХЫМ

Егъэлеяуэ къулей тщIащи,

Дыкъридзэжкъым цыуэ ШтIымым:

«УедгъэгъэтIысынущ» жетIэу щытмэ,

Къыдегъэлъагъур ину и IэштIымыр.

 

РИРЭ И ЧЭНДЖЭЩ

«Матэ щIэдзауэ упсэуну

Ухуейуэ щытмэ»,– жеIэ Рирэ,–

УкъимыкIуэту дежьууф

Зи гупкIэм уисым и «уэрирэм».

 

ДЕЛЭ ДЫХЬЭШХРИЛЭМ

Ухуейми и нэм тхьэщIэпс щIэкIэ,–

Ар щIогуфIыкIыр и пащIэкIэм.

 

СОМЫМ И ГЪУМЭТIЫМЭ.

«Улъэщ-улъэщ?» упщIэр

Къызет куэдрэ Лацэ…

Сэ сылъэщтэм, апхуэдизрэ

Симыхьынт инфляцэм».

 

МОДЭМ И ГЪЭР

Бостей щыгъыу къикIухьын

Игу хыхьэжкъым Динэ:

ЩитIэгъащ гъуэншэдж лъэ зэвыр

И ныбжьэгъу Мадинэ.

 

ЩОКЪУИЙМ И ПЭЖ

Къуийм и пыIэр щхьэрыхумэ,

укIытэжыркъым.

Адыгэ псалъэжьщ

«СхутепIэ къуацэ банэ а

И укIытэм къуийм:

Щхьэрыхуа нэужь и пыIэр,

Ар укIытэжкъым»,– жи Щокъуийм.

 

ЭММЭ И ПОЭМЭ

Усэ тхыкIэм

Щымыгъуазэ Эммэ

 «Стхынущ»,

Жери, зрепщыт поэмэм.

 

КIУШЫМ И ПЭЖ

«Си джэдыр куэдкIэ си дежкIэ

НэхъыфIщ»,– жи,– КIушым,–

Елъытауэ

Сысымей гуэгушым».

 

IЭХЪУЭ ХЬЭБАШЭ И ПЭЖ

ЗыкъомкIэ нэхъыфIу къебж

ПIыгъыну Iэхъуэ башыр:

«Сэ къызэфыгъуэхэм я бжыгъэр

Нэхъ мащIэщ куэдкIэ»,– жи Хьэбашэ.

 

ТЫГЪЭ «ТЫКIЭ»

Тыгъэ лъапIэр, дауэ ящIми,

Лъагъэсащ Къасым,

Щытхъупсыр къракIэхри

И къуэдзэ Хьэжкъасым.

 

АКЪЫЛЫНШЭХЭМ Я УНАФЭ

Тесыфын я гугъэу

Ягъэшэсыр шым

Фтрейуэ шыдым

Къехуэха Хьэшым.

 

КЪЭЩIЭРЕЙ И ПСАЛЪЭ ПЭЖ

«КъысхуиIуи и цIэр

Уэ уи бийм,

БжесIэнщ,

Ухэтми, Мухьэрбий».

 

IИЛ

Зэрыхьэмыкъэр

Къегъэлъагъуэр Iил:

Абы фIэделэщ

Губзыгъэ МэчрэIил.

 

НАПЭНШЭ ГЪУЖ

Напи топи

Къыхуэнакъым Гъуж:

Бомж и пщIантIэм щигъэлажьэм

Ирита щыгъынхэр къедыгъуж.

 

СОНДЭДЖЭР АРИФ И ТАРИФ

Гъэ къэс нэхъ лъапIэ ещI

И вакъэ ищэхэр Арифым.

Гъуэз уасэм хуэдэщ къыхача

А Арифыжьым и тарифыр.

 

ХЪУМАКIУЭ-ДЫГЪУАКIУЭМ И АУАН

«А Мусэрбии

И гугъэжщ тэмэму и щхьэр лажьэ:

Къыщохъу улахуэжь

ТIэкIурауэ

Сэ жэщи махуи сыщIэлажьэр…»

 

ЛЭГЪУПЭЖЬУ ЛЭЖЬА ХЪУПЫМ

ИIащ ныбжьэгъу

Куэдыщэ Хъупым,

Лы хэлъу лэпс

ИтыхукIэ и лэгъупым.

 

ЗРАЩIА ЧЕИЖЬ И ЛЪЭIУ

Пщэдейрей ныбгъуэ

Нэхърэ, нобэрей бзу.

Адыгэ псалъэжьщ

«Сыхуейкъым сэ,– жи,–

Пщэдейрей коньякым –

Севгъафэт псынщIэу

Нобэрей шмурдякым».

 

ИУЖЬРЕЙ АКЪЫЛ

Бжэгъу мыхъу щIыкIэ

Къигъэшакъым чыр –

Йодзэкъэж и Iэпэм

Нобэ Хьэжбэчыр.

 

ЛАТIИФ

Гугъуехьыр и пщэм

Димылъхьэж ЛатIиф:

ТеIущIыкIыпIэу иIэщ

И къуэш нэхъыжьу ХьэмлатIиф.

 

БИЗНЕСМЕН БЫДЫМ

«Бизнесри бдзэжьейм хуэдэщ,–

ЖеIэр къэщэху-щэжыным

Зи гъащIэр быдэу епха Быдым.–

Хэплъэ-хэкIыжу ухокIыж,– жи,–

Ар и чэзум и дежым къыумыубыдым».

 

КЪЭЩIЭРЕЙ И УСЭ

«МазитI дэкIри къищэхуащ

Иномаркэр Д-м.

Шэч хэмылъу, хыхьагъэнщ

Ар ГИ БЫ ДЫ ДЫМ».

 

БУБЭ

«Джэгурэ пэткIэ нэ къраху»,– жреIэр Бубэ

Зи нэр джэгурэ пэткIэ кърахуа Iэбубэ.

 

ХЬИДРЭ МУШТЭХЬИДРЭ

Хуитыжкъым и щхьэм –

И вакъэ лъэпсыр ипхэжыну Хьид:

ЗэреIэбыхыу (къощэр гугъукъэ!)

КъыкIэщIодыгъуэр Муштэхьид.

 

ЗИ КХЪУЭ ЗЫФIЭКIУЭДАМ

И щхьэм итщи

Кхъуэ кIий макъыр,

Зэхихыжкъым жыпIэр,

КъедэIуэнуи ар хуеижкъым жыпIэм и пэжыпIэм.

 

КОРРЕСПОНДЕНТ НЫБЖЬЫЩIЭМ

Къилъэтыхьу къыщохъужыр,

Япэ дыдэу итIысхьауэ ЯК-м,

Къытехуащи и статьяр

Япэ дыдэу блын газет «Маякым».

 

ЦИХУЭМ

Сытым щхьэкIи жеIэр «уррр»–

ЩIыIи хуаби емызэгъ Заур.

 

ЩАУЭРЕЙ

И фыз къэшэныр

Нигъэсакъым гъунэм:

Дыгъуасэ кIэ ебгъуанэм иритауэ,

ЕпщIанэр щIешэ нобэ и лэгъунэм.

 

СТУДЕНТ ПЫЖЬЫМ И ДЕРС

«Тху» защIэкIэ къэбухыфынущ

Вузыр,– жеIэ Пыжьым,–

Экзаменаторым пхуэгъакIуэу щытмэ

Ахъшэ и жыпыжьым».

 

ЗИ ПЩIЭР ЗЫГЪЭКIУЭДАМ

И щхьэр фIиудыжу

Щысщ ар, хуэдэу гъыным:

И пэпс къудейми къимыдэж,

«Сыкъихуакъым,– жиIэу,– уи пэщхъыным».

 

НЫБЭ IУЭХУ ЗЕЗЫХУЭ БОРИС

Хуэмей къищIэну зэрагъэкIыр рисыр:

«Зэрашхыр сщIэмэ, куэдыщэщ»,– жи Борисым.

 

ТIАКЪЭ И АДАКЪЭ

Газет куэдым текIуэжащ

ПцIы упсынкIэ ТIакъэ:

ДокIуейри уафэм, ар къохыж

Махуэл димыхыу кIэцIыу и адакъэр.

 

ТИПЫМРЭ АБЫ И ПРОТОТИПЫМРЭ

Ещэжащ прототипыр

ТипкIэ типым,

Щыгъупщэжри, а тип дыдэм

Зэрипрототипыр.

 

КЪАПЛЪЭНЭФЫМ

Къаплъэнэфри къыкIэрыхукъым

КуэдкIэ нэншэм:

Хегъэгъуащэр фIым, фIы дыдэм

Мыхьэнэншэр.

 

ЩIЭНЫГЪЭХЭМ Я КАНДИДАТ НЭПЦIЫМ

ЕбзыщI пщыкъуэцIэу – къыбжимыIэ Дин,

И диссертацэр хуитхын папщIэ

Мин дапщэ иритами

Мэзкуу щылажьэ доктор Бороздин.

 

IЭДЭМ

Хъыбар егъэIур и дзэр текIуэдауэ дэм

Хъудырым зи дзэр IуищIыкIа Iэдэм.

 

ХЬЭТIЭФ И ПЭЖ

АдэфI къуэфI хуэщкъым.

Адыгэ псалъэжьщ

«Къэбгъуэтыфынущ къуэфIи,

Зыхуэмыщ адэфI»,–

ЖеIэр пэжым и жьэм

КъишхыдыкI ХьэтIэф.

 

ЛАЦЭ И ХЪУЩIЭ

«ЖыпиIэбэм нэхърэ

Ар нэхъ Iейщ,– жи Лацэ:–

Къыдбгъэдэмыхьэххэу,

ДехъунщIэф инфляцэм».

 

БОЛЭТ ГУЩIЭГЪУНШЭ

И ныбэ изщ –

Гузавэркъым Болэт,

Шхын щхьэкIэ лIэкIэ

И гъунэгъужьу Хьэжболэт.

 

ДЭЛЭЛ ТIУРЭ

«Къызэт закъуи ахъшэ куэду,–

ЖеIэр дэлэл ТIурэ,–

ЩIэзгъэхуэнщ а уи гуэгушри

Сэ аспирантурэм».

 

ЕГЪЭДЖАКIУЭМ ИГУ КЪЕГЪЭКIЫЖ

«Щытащ ишхауэ,– жи,– цIынэу си лыр,

СхуемыгъащIэу зэратхыр «у»-р,

Унэ хужьым шэнт щабэм ису

Иджы щылажьэ Азнаур».

 

ХЬЭЖ И ПЭЖ

ПцIыми зы хьэл закъуэ

ФIыуэ хэлъу къебжыр Хьэж:

Пэжым и щыгъыныр щаудауэ,

Ар дунейм пцIанабзэу къытохьэж.

 

ХЬЭБИД

Нэмэз ищIыну

Мэжджытым кIуэжыркъым Хьэбид:

«Абы кIуэхэм,– жи,– къыгуалъэфри,

КъыфIащыр цIэуэ «ваххабит».

 

«ЕДЖАГЪЭШХУЭ» ТIАНЫМ

ЦIуцIу щызопщэ и щхьэм

Лабораторэм щIэс а ТIаным:

Къыпыжу лъыпсыр йозэуэжыр

И залымыгъэкIэ къигъэщIа шейтIаным.

 

ХЪУЭТ И ДЕРС

Лъыхъуэм къегъуэт.

Урыс псалъэжьщ

Урыс псалъэжьым

Мыпхуэдэ дерс къыхехыр Хъуэт:

«Зыгуэр мылъыхъуэм,

Къэмыхъу зыгуэрхэр къыщигъуэт».

 

ФАДЭМ ДИШЭХАМ

Пхуишэнущ псафэ уи хьэр Нил,

Шагъыр стэчан ебгъафэм, Зубэнил.

 

ХУЭМЕЙ

Уринэщ, урипсэщ,

Уи дагъэ теткIуэмэ Хуэмей.

Езым и дагъэр зытеткIуэн

ИгъащIэ псокIэ ар хуэмей.

 

ОЛИГАРХЫПХЪУМ

ИригъэщIыну педикюр,

Мэзкуу мэлъатэ цIыхубз щIалэр:

Игу ирихькъым Налшык къалэм

И лъэбжьанэр зэрыщалэр.

 

ГУБЗЫГЪЭ МЫШЭРЭ МАШЭ ДЕЛЭРЭ

Къыщохъур Машэм

Къыщышынэу Мышэ:

«Абы,– жи,– зэи

Сэ зыкъыспимышэ».

 

ЭКЗАМЕН ЗЫТ СТУДЕНТЫМ

Жэуап итыпхъэт

Теухуауэ рисым–

Ар топсэлъыхьыр,

ЩIихьауэ, барбарисым…

 

НЫБЭХУЭФI ЩХЬЭЩЫТХЪУМ

Къыщохъужыр

Игъэшауэ батэр:

«Сыщефащ,– жи,– сэ нэгъабэ

Шышэ Улан-Батор».

 

БЭЗЭР ХАБЗЭ

Ахъмэт и фощ бэзэрри уи дежкIэ,

Ахъшэ щимылъым деж уи жыпым:

УдэIэбейми, улъэIэскъым

Хьэщыкъ уи нитIыр зытехъуа хьэпшыпым.

 

«БЛИЦЭ И ТАБЛИЦЭ»

«Менделеевыр щыуащ»,– жи

Дыщэ зыщэ Блицэ:–

Лъигъэсакъым аурумым бжьыпэр,

Щызэхилъхьэм щыгъуэ и таблицэр».

 

ЗЭЛI-ЗЭФЫЗ

(Хьэмрэ джэдумрэ)

ЗэрофыщIыр,зэротхьэлэр,

Зэрошхыжыр я лыр.

Сытым щхьэкIи къащэхуат

Унэм щIэт роялыр?..

 

БЕРЫМ И ПЭЖ

«Ббгъэдэлъу щытмэ щIэныгъэшхуэ,–

ЖеIэр доктор Берым,–

УщIэуэнущ и нэм бжэгъуу

Дилетант Зуберым».

 

БЫЖЫМ

Бажагъэм хуэIэкIуэлъакIуэщ

ИкъукIэ цIыкIунитIэ Быжыр:

И бийхэм я жьэр ипхын щхьэкIэ,

Зыкърегъэщри япэ, зеубыжыр.

 

ЛИДЭРЭ АБЫ ИЛI ХЪАЛИДРЭ

ИлI ефэм щхьэкIэ

ЩIимычэу хъущIэу щыта Лиди

Фадэ ефэнкIэ текIуэжащ,

ЩхьэщиIэтыкIыурэ, Хъалиди.

 

ЦIЫХУГЪЭМ ТЕУХУАУЭ УАЗ ЗЫТЫМ

Хьэ къэнацIэм хуетыфакъым

ЩIакхъуэм щыщ зы бзыгъэ,

И гум пыкIыу, апхуэдизу

Зызыгъэгубзыгъэм.

 

АУАНЫЩI МУРАТ

И нэм нэпсыр къыщIэлъэлъу,

Мэдыхьэшхыр IуэрыIуэдз Мурат:

Мазэ къэс мин щэщI ирату,

Бюрократу ягъэлажьэ Хьэжмурат.

 

ХЪУЭЖЭ И ЛЕКЦЭ

Студент ныбжьыщIэхэм

Хъуэжэ къахуоджэ лекцэ:

«Фысшэнщ,– жи,– псори шхапIэм,

КъыпэкIуэм ахъшэ сымыщIа селекцэм».

 

МЭН

И щхьэ дыдэми хуэфIыжкъым

Зы цыргъуейкIэ Мэныр.

Лъэныкъуэ куэдкIэ зэпыдоплъыхьри,

КъытхуэмыщIэ ари зи пэрмэныр.

 

НАЗЭМ

Тэмэм дыдэу и нэр плъэуэ

Къыщохъужыр назэм,

КъракIыхрэ и щхьэм тхъупсыр,

ЯщIмэ щхьэуназэ.

 

МАРИНЭ И «ТХЬЭУСЫХАФЭ»

«ЩIидзащ зэкIуэкIыу

Си щхьэгъусэ Мызэ:

СхуипщэфIыжкъым,– жи,– абы

Пщтыру мырамысэ…»

 

ТУРЭ И »ФИЗКУЛЬТУРЭ»

«Нанотехнологием тету»

Зэтреухуэ и урокыр Турэ:

ЦIыкIухэм топыр яхуидзынщи,

А яхуидзам ирегъэкIуэкIыр физкультурэ.

 

ХЛЕСТАКОВ И ЩЫЛЪХУ МУСЭ

ЯхуIуехыр

Псоми я псэр Мусэ:

«СыдотIыс,– жи,– фадэ Iэнэм

Пщым я пщыж Хьэжмусэ».

 

АХЬМАКЪЫМ И МАКЪ

«КъедэIуэжкъым, загъэдэгури,

Зыри мы си макъым:

Гу лъатауэ къыщIэкIынущ

Сызэрыахьмакъым».

 

МЫРЗЭРЭ КЪАРЭМЫРЗЭРЭ

ХьэщIапIэ кIуэркъым

Абы и дежым Мырзэ:

Мэшынэ къэкIуэжынкIэ

Къарэмырзэ.

 

МУСЭ

Жьыр къыщепщэр имыщIа

Иджы къэскIэ Мусэ:

И щIэиным ар къуэсащ

И адэ Хьэжмусэ.

 

ФАДАФЭМ И НЭЩЭНЭ

МэгуфIэр,

Iей дыдэу машхэри и пащIэр:

«Iэмал имыIэуэ сиплъэнущ,– жи,–

Стэчаным сэ и лъащIэм».

 

МАДИНРЭ ТЫКУЭНТЕС ХЬЭЖМУДИНРЭ

Тыкуэн бжэIупэм Iухьэн мэшынэ

Шагъырым гъэр ищIа Мадин:

Iухьау къилъагъумэ,

 «Уэ бжьэ уасэр щхьэ къыумыхьыжрэ?»

КъыжриIэнущ Хьэжмудин.

 

ГЪУЩI МАСТЭ ЗИIЭ ХЪАН

И гъунэгъур фIэтхьэмыщкIэщ

ГъущI мастэ зиIэ Хъан:

ГъущI куэбжэ иIэу щытми,

Мастэншэщ Алихъан.

 

ЕЗАНЭМ ЩЕДЖЭ ХЬЭЖКЪАСЫМ

ЗригъэщIащ и тхыкIэр «з»-м –

ДылъэIэсыжкъым и пэм Хьэжкъасым.

 

КЪАСЫМ И УПЩIЭ

«Сэ сыт си лажьэр,– жи Къасым,–

ХуэмылъэщIыжмэ и пэр

Си къуэш нэхъыжьу Хьэжкъасым?»

 

ХЬИД И «ПЕДАГОГИКЭ»

ИщIащ гъыринэ

И къуэ кIасэр Хьид,

Тумэн иритурэ,

И гъыныр щигъэтыхукIэ Муштэхьид.

 

ДАДЭКЪУАПЭМ

Къэзылъхуар игъэсэжыну

Хуожьэр Дин:

«Гупсыси псалъэ, зыплъыхьи тIыс»,–

ЖреIэр и адэ Нажмудин.

 

РУРЭ

Хьэбыршыбырым къыщынэжкъым

Бын зимыIэ Рури:

Хьэм ирегъэхьыр бын псом я анэ

Доллорес Ибаррури.

 

БГЫРЫС УСАКIУЭМ И ДЕЖ КIУЭУЭ

Нэхъ лъагэу Iэтыт –

ДынолъэIур Тенэм:

Къурш фIэкI къаубыдкъым

А усэ птхыхэм я антеннэм.

 

КЪУТКЪУС(КЪУЗГЪУН) ПIЫТIУ

Къезытым зы бжьэ,

Иритыжырт тIу –

Зэфа аркъэм

Жумарт ищIат ПIытIу.

 

ТIАЛ – УТОПИСТ

Зи щхьэ щIыбым еплъыжыну

Мурад зыщIам сыту ещхь а ТIал:

Къратын и гугъэщ къулыкъу лъагэ,

ТримыгъэкIуадэу капитал.

 

МЫЗЭ И «ФЫКЪЕБЛАГЪЭ»

Къихьыну фIыщIэ,

Зи ныбэ изхэм

ЯжреIэр Мызэ:

«Тхьэм щхьэкIэ, фыкъеблагъэ:

Фэзгъэшхынщ

Шхум хэпIытIауэ мырамысэ».

 

СОНДЭДЖЭРХЭМ Я ХЬЭЛ МЫГЪУЭ

Сату зыщIхэм дэкум хуэдэу

КъагъэпцIащи Болэ,

КъегъэпцIэжыр ещхьыркъабзэу

Боли Хьэлэболэ.

 

ЗАЛЫМЫГЪЭКIЭ ИРАГЪЭДЖАМ

«СигъэщIакъым,– жи,–

И тхыкIэр пэжу «д»-м»,–

ХущIетхъуэр бзаджэр

Нобэр къыздэсым Бекъалдым.

 

ДОЦЕНТ ТIУРЭ

КъаIех Iулъхьэ, мышынэжу,

И студентхэм ТIурэ –

Зэпэзэву бзэгу зэрихьэу

ИIэщ агентурэ.

 

ЗЫЗЫГЪЭКЪУЛЕЙ КЪУЛЕЙСЫЗЫМ

И напщIэм телъщ,

ХьэщIапIэ кIуамэ, Нинэ

ЩIэрыпсыбзэу и унэм щIэту зэриIэр пианинэ.

 

МЫСХЬУД И УПЩIЭ

Мысхьуд йоупщIыр

Прокурорым щэхуу:

«Зыгуэр къэнауэ пIэрэ

А уэ пщIэ ахъшэм къимыщэхуу?»

 

ФАДЭ НЫБЖЬЭГЪУ

И ныбжьэгъум и деж кIуэжкъым,

Щигъэтауэ Хьид:

Сымаджэшхуэ хъуауэ, зыIуилъхьэжкъым

Фадэ Муштэхьид.

 

ХЬЭУАЗЭР МЭГУФIЭ

ЛъапIэ хъуащ и уасэри,

И пащIэкIэм щIогуфIыкI губгъуэм илъ хьэуазэри.

 

ДЫУЭ-ДЫУЭПСКIЭ IЭЗЭМ И РЕКЛАМЭ

«Согъэхъужыр тыншу,– жеIэр Цинэ,–

Хуэмыгъэхъужахэр медицинэм».

 

НЫБАБЛЭ НАЩ

«Емынэр зэрыхьэм

Зыгуэр къренэ», жиIэри, Нащ,

Лыуэ илъыр ишхри,

Тепщэчым къупщхьэр къринащ.

 

ДОХУТЫР ХЬЭСЭНБИЙ И ПСАЛЪЭ

«Жин хужьым хуэдэу

Хуэпауэ щыт а Цинэ

Узотыр ауэ

ХищIыкIыр медицинэм».

 

КЪЭЗЭРЫМ

Шхын щхьэкIэ лIэуэ

Бэзэрым тетщ, хуэмыщэу и тIыр:

И щэхуэгъум

ХукIэригъэхуркъым щаитIыр.

 

ЭКЗАМЕНЫМ ЩIЫХЬА СТУДЕНТЫМ

ЗепIытI, зехуз,

Йопщхьэжыр и фэм Галкэ:

Къыщыгъупщауэ къыщIэкIащ

Къалэщхьэгуэжьу зыщыгугъа шпаргалкэр.

 

ХЬЭРЭМЫШХЫЖЬ ЛУТIЭ

Хьэрэм и ахъшэхэр

Ирешыр хэкум ЛутIэ:

Хамэ къэралым псы щыдигъэжэхмэ,

Хьэлэл хъужын и гугъэщ и валютэр.

 

ПЦIЫУПСЫМ

Аруан мэзым баш пщIы хъун

Щимыгъуэту зей,

Тхьэ щеIуэжыр къришауэ.

КIуэри Мэртэзей.

 

СИ ЖЭУАП

УкъызоупщIыр

«Иджы хэт сымэ щIэсыр,–

Жори,– барым?»

–«ЩIэсахэрщ, –

Зыри щIэуэ хэткъым си хъыбарым».

 

ТIУРЭ И ПЭЖ

«Къулыкъушхуэ къызатынут

Сэри,– жеIэр ТIурэ,–

Сыхэтау щытамэ япэм

Партноменклатурэм».

 

КЪЭРАБГЪЭМ

Егъэуэфыр, тIэкIу кIэзызми,

И бэрэжьей фочыр.

КъуэгъэнапIэм къуэту щытмэ,

Зыгуэр хузэфIокIыр.

 

ХЬЭГЪАПХЪЭМ

И псалъафэщ «уэсысысыр».

ЦIыкIум щхьэкIи а и щхьэжьыр

Ину егъэсысыр.

 

МЭЛЫХЪУЭЖЬЫМ И ПЭЖ

«ЗэрыпщIыжын щымыIэ хъупыр,

Лэпсыншэ хъуауэ щытмэ уи лэгъупыр».

 

ПСЫНЩIЭРЫПСАЛЪЭ

Хьэ Iэбжьыби телъыжакъым хьэмым

Хьэмтетыгъуэр щратам Бырхьэмым.

 

БИЗНЕСМЕНЫМ И ПЭЖ

«ЩIалэжь хъарзынэщ

Налог инспекцэм щылажьэ ФIыцIэ:

Зыгуэр кIэщIэздзэм, сызыхуейр сщIэн папщIэ,

Абы и нэ жанитIыр еуфIыцIыр».

 

РЕВИЗОРЫМ

IэфIыкIэ фабрикэм

Щашхар къыщищIам зэIубз,

А къэпщытакIуэми,

ПсыIэрышэу, къэжат и гурыIупс.

 

ЗЫЩIЕЗЫГЪЭХ ЗИ ХАБЗЭ ЖЬЫХЬЫР

(Адыгэ отпуск)

КIуа иужькIэ отпуск,

IэхъуэгъуэтегъэкIыу

Зи къалэныр зыгъэзащIэ Жьыхьыр,

Жыджэр хъужауэ,

ПщIантIэпсыр ирикъуэкIыу,

И шыгъуэгу хадэм йолэжьыхьыр.

 

УТIЫПЩА ТIЫПЩ

ТIыуэ щыIэхэм я пщыжым

И деж кIуауэ ТIыпщ,

Мыр жреIэр: «Пшэдейризэм,

Ягъэ кIынкъым, кхъыIэ, сыутIыпщ».

 

БАГЪЫМ И ЧЭНДЖЭЩ

«Зыгуэр уубыну ухуемыжьэ,–

ЖеIэр мыгушыIэу Багъым,–

Уемыплъыжауэ япэ щIыкIэ

Набдзэгубдзаплъэу уи щIыбагъым».

 

ДЕЛЭМ И ЛЪЭIУ

«Къызэфтыт,– жеIэр,– пIалъэу зы гъэ:

Нэхъ делэ дыдэр

ФхуэсщIыжынщ губзыгъэ».

 

ЕГЪЭДЖАКIУЭМ И ТХЬЭУСЫХЭ

«Дахэ-дахэу иритхэфкъым линэм,

Зэрихьэ щхьэкIэ цIэуэ Дахэлинэ».

 

ЛАМЭ И ПЭЖ

«Дгъэлъэгъуэн дызэримыIэм щхьэкIэ,–

МэхъущIэри мэщIатэ Ламэ,–

Хамэ къэралхэм я хьэпшыпхэр

Демышыжу дощIыр дэ рекламэ».

 

БАГЪЫМ И ДЕРС

«Уи псалъэр тхьэрыкъуэфым

ПхидзынкIэ умышынэ,– жеIэр Багъым,–

Лъэрыхь зыгуэр

Дэмыту щытмэ нобэ уи щIыбагъым».

 

КЪУАРГЪ ТХЬЭМЫЩКIЭМ

Щолажьэ пщылIу

Бгъэхэм я деж къуаргъыр,

НасыпыфIэу зилъытэжу,

Щыкъуагъэтым и деж я бжэ къуагъым.

 

ХУЭIЭЗЭ ХЪУАЩ ДЫГЪУЭКIЭМ

Тхьэусыхэн мэшынэр

Зэдыгъуахэр Гъужьыр:

Къадыгъуа хьэпшыпхэрщ

Гъужым къидыгъужыр.

 

ШХЫНЫР IЭФIРЭ ДЫДЖРЭ

ЗЭХЭЗЫГЪЭКI ЕДЫДЖ

Ахъмэт и фор

Къелъытэр зэзу дыджу:

Iэтащи лъагэу,

Абы лъэIэсыркъым Едыджыр.

 

ХЪЫЗЫР И «ЕПЛЪЫКIЭ»

Щэбэт щIыхьэхухэм

Хыхьэн идэжыркъым Хъызыр:

Абы хыхьахэм я улахуэм

Къытралъхьэжыр,– жи,– тезыр».

 

СУРЭТЫЩI БАГЪЫМ

Бюрократым и сурэтыр

ЕщI мыпхуэдэу Багъым:

Абы, и гупэ тIэкIур къабзэм,

Джэдвей кIэрылъми едэ и щIыбагъым».

 

БЫШ И АУАН

«Дэни щащI, – жи,– фадэр,–

(Мэдыхьэшхыр Быш),–

Уеблэмэ, щагъэжми кхъуэщын е чырбыш».

 

МЭДЫХЬЭШХЫР…

Мэдыхьэшхыр прокурору лажьэ ТIыхъуэр:

«ДыгъуэгъуакIуэхэм, къахъунщIэри,

Сэтей къащIащ,– жи, –премьер-министрри

IэкIуэлъакIуэу зэрыдыгъуэр».

 

ИЛЪЭСИПЩI ЗИ НЫБЖЬ IЭМИН

Къидыгъуа тутыным

(Хэлъ и гугъэщ витамин),

ЗигъэпщкIуауэ, йокъу Iэмин:

Махуэ къэс абы елъагъур

«Наша маркэр» щIишу

Дохутыру лажьэ БырIэмин.

 

ЗИУСХЬЭН И IУЖАЖЭ СХЬЭН

Къэгъуэтыгъуейщ жыIэщIэ

Хуэдэу Схьэным:

Гъуэншэдж щымыгъыу,

ГуфIэжу ар

Цыжьбанэм тетIысхьэнущ,

Унафэ къыхуищIамэ

Зиусхьэным.

 

МАКЪ ПСЫГЪУЭКIЭ

ПСАЛЪЭУ ЩЫТА БИТЫР

ЩIидзащ макъ гъумкIэ

Къыдэпсалъэу Битыр,

ЯщIа нэужькIэ ар

Топ къезыхуэкIхэм я арбитр.

 

ЖЭБАГЪЫ И ПЭЖ

Дунейр, шэрхъщи, мэкIэрахъуэ.

Адыгэ псалъэжьщ

«ЗаукIыжынт,– жи,– зыкъомым,

Къащтэнти кIэрахъуэ,

Шэрхъым хуэдэу щымытамэ

Мы дунейр кIэрахъуэу».

 

ЩХЬЭЛЫМ ЩIЭС ДЗЫГЪУЭШХУЭМ ИТХА

ТХЬЭУСЫХАФЭМ ЩЫЩ ПЫЧЫГЪУЭ

«Ди щхьэлыжьыр зи инагъыр

НэщIщ–щIигъэлъкъым гъавэ.

КъытхуэмыщIэ и мурадыр

Ди щхьэлтет щхьэгъавэм».

 

 

ДЫГЪУЭРАБЗЫМ И УАХЪТЫ

Хьэлэмэту иухащ и дыгъуэныр ТIасэ:

Иужь дыдэм яубыдащ, ихьу унитазыр…

 

РУСТАМ

«СыхущIегъуэжкъым,–

ЖеIэр,– щIыхуэу стам»

ИгъащIэм щIыхуэ

Зымыта Рустам.

 

БЕРДРЭ БИБЕРДРЭ

Къыхуеижкъым зыцкIэ

И ныбжьэгъур Берд:

«Мерседес» дыгъуасэ

Къищэхуащ Биберд.

 

КЮР И МАНИКЮР

Iуэхугъуэшхуэ къыпэщылъу

Къелъытэжыр Кюр:

«Си Iэбжьанэр езгъэщIын

Хуейщ,– жи,– нобэ маникюр».

 

КЪУЛЫКЪУШХУЭ ЗЫIЫГЪА МЫКIЭ

ПцIы гъущэ куэдхэр

Къытхуиупсырт МыкIэ:

Абы (щышынэрт псори) игъуэттэкъым

Iэ лъэщкIэ къекъун и кIэстумыкIэм.

 

ЗИ НЫБЖЬ ХЭКIУЭТА ХЪУЭТ

Хагъэзыхьмэ,

Фызкъэмышэ Хъуэт,

«НытIэ, къэсшэнщ,– жеIэр,–

Зыгуэр къысхуэвгъуэт».

 

АДЭМ И ГУРЫФIЫГЪУЭ

Дуней гуфIэгъуэр иIэщ

И къуэм щхьэкIэ КIущым:

«Къэнэжыр ещIэр,–жи,–

Къыхэпхмэ зы пщыкIущым».

 

ЕМЫДЖА МАШЭ

«Сэ нэхъыбэ къырызохь,– жи,– ломым»,–

Щодыхьэшхыр Мышэ и дипломым.

 

КIУЦЭ И ХЪУЩIЭ

«Жьэм пщIэ щIатрэ щIамытрэ

КъищIэнти,– жеIэр КIуцэ,–

ТелефонкIэ зэ Мэзкуу псэлъатэм

Жьэм пщIэ щIамыту зыгъэIуа ХьэкIуцэ».

 

ФИНАНСИСТ-АФЕРИСТЫМ

Къиувэжауэ итщ ди пащхьэм,

Хуэдэу фертым,

Хэбзаещ фIыуи сабийхэм щхьэкIэ

КъаутIыпща трансфертым.

 

ТХЬЭГЪЭПЦI НАХЪУЭ

Къыщимышэм

Данэху-данапIэм

Тхьэ хуиIуэрт хигъэлъыну Нахъуэ.

ШыгъушыпсыпIэм хэмызагъэу,

Хиубыдауэ хигъэлъ Дахэнагъуэ.

 

ДОХУТЫР НЭХЪЫЩХЬЭ ЖАН

ЗыIурыбзаеу

Куэ лыпцIэр ишхыу щысщи, Жан

«Сымаджэхэм яхуэфхь, –жи,–

ТебэкIэ гъэжьауэ баклажан».

 

МУСЭ

ПкIэлъей иIыгъыу

Бэзэрым макIуэ Мусэ:

«СылъэIэскъым,– жи,– и уасэм

Лы махуэ къэскIэ зыщэ а Хьэжмусэ».

 

ХЬЭХЫМ И ПРОГНОЗ

«МыщIагъуэжу арщ зэманыр,–

ЖеIэр Хьэхым,–

Надэр лъагэу драхьейрэ,

КупщIэ зиIэр лъахъшэу кърахьэхым».

 

ПЕЦЭ

Къыпкърыхьэрт мащIэ-мащIэу

Зэфа фадэр Пецэ:

Квадрат зэплъыр хъуат илъагъу,

Хуэдэуэ трапецэм.

 

ЩIЭНЫГЪЭХЭМ Я КАНДИДАТ

ИIэтыжкъым и щхьэр лъагэу

Кандидат хъуа Мыкъи:

ПхигъэкIащ и диссертацэр

И гъунэгъу Хьэмыкъи.

 

ЧЫПЭ

Нэхъыжьыгъуэр къылъысыным

Хуэмыпабгъэ Чыпэ:

«Сэ сыхуейкъым,– жи,– сащIыну

ПхъэтеIущIыкIыпIэ».

IЭМИНЭ

Гуащэ хьэпшып и гугъэщ минэр:

Лъагъуныгъэм ироджэгу Iэминэ.

 

НЫБАБЛЭМ

ХъымпIар имыщI

Дунейм щекIуэкIыр Лыхьым:

ЕукIыр ар

Ныбэ хуэIухуэщIэм и бэлыхьым.

 

БОКСЕРЫМ И ЧЭНДЖЭЩ

«Уимыхьэ рингым,–

ЖеIэр боксер ШтIымым,–

ХузэфIэкIынур

УмыщIэу щытмэ уи IэштIымым».

 

СИМЭ И УПЩIЭ

«Гаагэ судым сыт игъейр,– жи

Илъэс пщыкIутхур ныбжьу зиIэ Симэ,–

Бзаджэнаджагъэхэр щилэжьым деж

Щезыдзыхам зи бомбэр Хиросимэ?»

 

СТУДЕНТ НЕТЭ И ПЭЖ

ЗыкъомкIэ студент гъащIэр

Нэхъ тынш ящIауэ

Къелъытэр студент Нетэ:

«Дызыхуей шпаргалкэхэр

Къыдохыр,– жи,– хьэзыру,

ДоIэбэри и сайтым Интернетым».

 

РИНЭ И ПЭЖ

«Пощтзехьэу си ныбжьэгъур

Лэжьэн щIимыдэр

СощIэр,– жеIэр Ринэ:–

КъикIухьурэ лэжьа и вакъэм

И уасэр мазэ псом

Къыхуэлэжьыжыркъым Маринэ…»

 

ФЭЛЪЫРКЪЭБЫМ

Фэлъыркъэб псым щIилъафэрэ?!

Адыгэ псалъэжьщ

Псым щIилъафэу зэрыщытыр

Дагъуэ хуещIыр къэбым,

И щхьэр уардэу иIэтын

ЩхьэкIэ фэлъыркъэбым.

 

СЫХУ И «ЛЪЭIУ»

Мыращ жриIэр

И ныбжьэгъум Сыху:

«Уэ, лIыгъэ уиIэу щытмэ, сыху,

Сэ горизонтым сынэсыху».

 

ЛЭН И ПСАЛЪЭ

Псы зэфэнщ

Къилъыхъуэр Лэн.

«Пэрыхьэтщ,– жи,–

Сэ сызытхьэлэн».

 

СУДЬЯ ФЕТКIЭ

Iихын имыдэ

Iулъхьэр судья ФеткIэ:

«Уимыгугъэ,– жи–, сащыщу

Къащэхуфхэм кIэнфеткIэ».

 

МОРЯК «ПIЫЩIАМ»

ИмыщIэ къикIыр

Псалъэ «риф»-м,

Къулыкъу щищIами

Флотым Музэрифым.

 

ЛЫ ЗЫЩЭ КЪУТКЪУСЫМ

Лыр лъэпсейу ялъреукIэ

Исхэм мы ди куейм.

Езыр йоуэ (лыр фIэлъапIэу),

КIэртIоф жьэрыкуейм.

 

ФАДЭ НЫБЖЬЭГЪУ АРИФ

«Апхуэдэ ныбжьэгъу

Сыхуейкъым,– жи Ариф:–

Сегъафэ зы бжьэ щыжесIам,

Кхъуэ дэгу зищIащ а Музэриф».

 

ЖЬЭРЫIЭЗЭ IЭПЭ ЗАДЭ

Езым хуэмыщIу щытми уагъэ,

ЯщIахэм тыншу «къахегъэкI» щыуагъэ.

 

ИМЫIЭ ПЭЛЪЫТЭЩ ДАР

Щай фIыцIэжь и уасэкъым и дарыр:

Къыхуэгъэсэбэпкъым ар Елдарым.

 

ЗАРИФРЭ МУЗЭРИФРЭ

Тумэн телъщи, къритыжкъым

(Мыхьэнэншэщ а Зариф):

ЗыпыIуедзри , зегъэбзэхыр,

Зэрилъагъуу Музэриф.

 

НАПЭНШЭМ

«НэхъыфIщ,– жи,–

Сыкъанэу щытмэ пэншэу,

Сыкъанэ нэхърэ

Сэ напэншэу».

 

ХЬЭЧИМ

И къалэнхэр игъэзащIэу

Къыщохъужыр, щэ щыкIийм

КIэлындорым, хьэщхьэрыIуэм хуэдэу,

УнафэщIу а Хьэчим.

 

ДЗЫХЬ ХУАЩIЫЖЫРКЪЫМ

ЦIыхухэм щэху ирахьэлIэжкъым,

КъацIыхуащи фIыуэ, Ленэ:

А я щэхухэр нахуэ ищIу,

КъыфIидзэнущ объявленэ.

 

ЕДЖАКIУЭ ГУНЭФЫМ И ТХЬЭУСЫХЭ

«Сыхуежьа нэужькIэ

ЗэзгъэщIэну рифмэр,

Сщогъупщэжыр,– жи,–

ЗищIысыр логарифмыр».

 

МЭН И «КЪУРМЭН»

Зегъэлъагъуэр

ЦIыху хьэлэлу Мэн:

Куэдым и псэр

ЯхуищIащ «къурмэн».

 

«ЕДЖАКIУЭ ТУРЭ И «ФИЗКУЛЬТУРЭ»

Урок ямыIэу

Тхьэ щеIуэжыр Турэ:

«Иджыпсту,– жи,–

ДиIэр физкультурэщ».

 

КЪУЛЫКЪУ ЩIЭКЪУМ

ИмыщIэн щымыIэ

Къулыкъу щхьэкIэ ТIанми:

IэплIи, баи хуищIыфынущ,

Уеблэмэ, шейтIанми.

 

ЗЕУБЫЖ

БлэкIа зэманыр фIэауану,

Мэпсалъэр куэдрэ Турэ –

Щыгъупщэжащ зэрыхэтар

И курыкупсэм партноменклатурэм.

 

ГЪЭУЖЬ МЫХЪУ ТЕМЭ

Февраль мазэм и улахуэр

Маим и кIэм ят,–

ГуфIэщауэ, долъей, къолъых

ПхъэнкIакIуэу лажьэ Мурзият.

 

АБДУЛЧЭРИМ И «КРИТИКЭ»

«Хьэзим-чэрим,

Дымыхъу, дымыщIэ»,– жи Абдулчэрим.

 

ГЪУЗЕР

ЩимыщIэжым деж

Зыщыщри, зейри,

Дэпсэлъейуэ щIедзэр

Щхьэщытхъужхэ я къуэ а Гъузери.

 

АУАН И АУАН

«ИщIэркъым,– жи,–

ЗищIысыр граммыр,

Грамм дапщэ хъуми

Паралеллограмыр».

 

ЖЬЫР КЪЫЩЕПЩЭР ЗЫМЫЩIЭ ЗАРИФ

«IумыщIэр лIыфIщ»,– жи

А Зариф,

Емынэ гуэрым IущIа хуэдэу

Зыкъыщигъэхъуу Музэриф.

 

МУРАТ И ПЭЖ

Джэд нэхърэ

джэдыкIэ нэхъ Iущщ.

Адыгэ псалъэжьщ

«Фызэрымышх,– жи,–

КъывэхъулIэнкъым фи мурад»,

Къэзылъхуахэм я дежкIэ плъэурэ,

Зи ныбжьыр илъэсихым ит Мурат.

 

ЯДЫГЪУАХЭР МЫЛИЦЭМ ХЭТХЭМ

КЪЫЗЭРАЛЪЫХЪУЭР

ЩIахащ– къалъыхъуэр бауэ-папщэу:

Зи уэлиигъуэм ар и шинэщ.

Iуахуащ – хъымпIар ямыщI:

Ар тхьэмыщкIэжьым и машинэщ.

 

ФАДЭМ ИТХЬЭКЪУАМ

Псыдыуэм хуэдэу

Иреш кумбыгъэм фадэр Надэ –

И лъащIэм щIэлъми, мыгузавэ,

Хломидомонадэ.

 

ЕЗЫМ ЕЩХЬЫЖУ ИГЪЭСАЩ

Езым ещхьыжщ

И пщIантIэм дэсыр МаскIэм:

Утеувэу щытмэ и кIэм,

КъыпкIэщIопхъуэ щэхуу и хьэмаскIэр.

 

ЩХЬЭХЫНЭМ И ХЬЭЛ

Пэщащэ хуэдэу зещIыр Зыхьым,

Ягъэлэжьэну хагъэзыхьмэ.

 

ЩИМЭР ЗЭРАГУЭША ЩIЫКIЭР

КатетитIыр иратащ зи жьэр джатэ Нусэ.

Жьэмей Лусэ лъагъэсащ и гипотенузэр.

 

БАНАН ЗЫIУМЫХУА НАНЭМ

«Фщэху, фыщIегъуэжынкъым»,– жи –

Бэзэрым тетщи нанэ.

ДокIуейри уафэм, ар къохыж

Фоупсым хуэдэу и бананыр.

 

«ЛIЫХЪУЖЬ»

Щымышынэу тхьэ щеIуэжыр зыми

А зи ныбжьым къигъэскIэж Чэзыми.

 

ЖАНТИНЭ И «БГЭКIЭ»

«Мо тхъуцIынэр

Си бгъэм тинэ»,–

«Зобгыж» тхъуцIынэ

Зигу къихьа Жантинэ.

 

НОБЭРЕЙ АДЫГЭКЪУЭМ

Пхолъэтри пшэм,

Больничнэм тесу, Были

МэкIуэф щэхуакIуэ

Тыншу Истамбыли.

 

БЭЗЭРЫМ КIУЭ ЦИНЭ

ФIэнащ хьэр гъыуэ

И гъунэгъум Цинэ:

ЗэпиупщIащ и гъуэгур

И джэду фIыцIэм Бабыцинэ.

 

ДЖЭДУ ХЬЭЛ

КъищIамэ ису дзыгъуэр дум,

ЗекIуапIэ ещIыр дур джэдум.

 

ЖЬЭНАХУЭМ И ПРОГНОЗ

«Дыщэ медалыр къратынущ,

Шэч хэмылъу, Женэ:

ЕгъэджакIуэр дэIэпыкъумэ,

Хуотхыр изложенэ».

 

ТХУЕДЖЭН ИМЫДЭ

Тхуеджэн имыдэ

Юрэми юристу:

«Сэ сыхэмытми, дрокъу, – жи,–

Дэ диIэу хъуам юрист-авантюристу».

 

БИБЭРЭ ХЬЭБИБЭРЭ

«Сэ сыкъалэщ» жери,

Хеш и напщIэр Бибэ.

– «Уэ укъалэм, сэ сытопщ»,– жи–

КъыхуикIуэтыркъым Хьэбибэ.

 

ТIАЛЭ

Ущылъым убзи, ущытым далъэ.

Адыгэ псалъэжьщ

И хьэсэпэр кIыхьу

Фи мыгугъэ ТIалэ:

Зэрыщылъым хуэдэу,

И Iэр егъэдалъэ.

 

КУШМЭЗ И «ТХЬЭУСЫХЭ»

Жыг щIэмыту

Тхьэ щеIуэжыр мэзым

Зи гур мыплъэу

Зи нэр плъэ Кушмэзым.

 

ЖЬЭНАХУЭМ И ПРОГНОЗ

«Къулыкъушхуэ къратыну

КъыщIэкIынщ Хьэлимым:

УнафэщIхэм пщIэ лей хуащI

Иджы подхалимым».

 

ФАТIИМЭТ

И гуапэ мэхъу,

ЩыжепIэм и деж «мэт»,

«Мыдэхь» псалъэр зи мыщIасэ

Унэгуащэ ФатIимэт.

 

БАТЫРРЭ ХЬЭЖБАТЫРРЭ

Имытхыф тэмэму «т»-р,

Ауан ещIыр а Батыр

«Т-р «ш»-м хуэдэу зытх зи хабзэ

ТхэкIэмыщIэ Хьэжбатыр.

 

«РИНЭ И ВИТРИНЭ»

IуплъапIэм кърилъхьа хьэпшыпхэм

Къамыгъэлъагъуэ, хэтми Ринэ,–

КъэщIэф уэ, лIыгъэ уиIэм,

ЩIилъхьар Ринэ и лъабжьэм и витринэм.

 

МАЦЭ КЪЭЩIЭРЕЙ

«КъэсщIащ,– жи Мацэ,–

Апхуэдизу фийр:

И ныбэ изу шха нэужькIэ,

Фиин къыщIедзэ Мустэфир».

 

ДЫГЪЭМ ЧУБАЙС КЪЫХУИГЪЭХЬА

ТЕЛЕГРАММЭ

«Укъытхуемыуэт куэдрэ, Толэ,

«Си щIыхуэ фтелъщ» жыхуэпIэ пшынэм:

Уи щIыхуэу ттелъыр уэ къэпщIэнщ,

Си щIыхуэу птелъыр

ЩIэздзэм къозгъэпшыну…»

 

ЛЪЭМЫТХЬЭЩIЫМ И «ЛЕКЦЭ»

«Фытыншынущ, гъуэлъыжыгъуэм

Быдэу фи лъэр фтхьэщIым»,–

Къытхуоджэ лекцэ гъуэлъыжыгъуэм

Зи лъэр зымытхьэщIыр.

 

ХЬЭКIУЛИНЭ

ХьэкIулинэ кIуэн имыдэ

И деж Линэ:

«Хъуакъым,– жи,–

Абы иджыри и малинэр».

 

НАРКОТИК (АФИЯН) ЗЫЩЭ ТIУРЭ

И пащIэкIэм щIогуфIыкIыр

Афиян зыщэ ТIурэ:

Махуэ къэс я бжыгъэм хохъуэ

Абы и клиентурэм.

 

ТАНЭРИ ЗЭРЫБГЪАСЭЩ

(IЭБУ И МЕТОДИКЭ)

Хригъэнащ и хьэл мыхъумыщIэр

И танэ куэдрэ бум,

Iусыпхъэм и пIэкIэ

Хьэуазэ хуихьурэ Iэбум.

 

«ДЫГЪУЭН ЗИ ЖАГЪУЭ» ЖАНТЫГЪУЭН

«Мэдыгъуэр Iейуэ –

Хьэл мыгъуэу хэлъщ,– жи,– ар Тыгъуэн»,

Мыдыгъуэу щытмэ, ишхыр

Зи дзажэ дэмыхьэ Жантыгъуэн.

 

«ПIЫТI И ГЪЭХЬЭЩIЭКIЭ»

Уежьэжыну къищIамэ, ПIытI

И джэдыжь цIыкIур,

ПIащIэ-тхъытхъыу,

ПхуфIигъэжыну къеубыд.

 

МЫХЪУР ЗЫIЫГЪ ХЪУРЫМ

Хьэрычэтыншэу

Щыткъым Хъурыр:

Абы шыгъупIастэ Iэнэ къелэжьыф,

ТхылъымпIэм тригъауэм и мыхъурыр.

 

ЩЫТЫКIИТIЫМ ИТ БОРИС

ЛэжьакIуэ вузым кIуамэ – ректорщ,

Унэм къэкIуэжмэ – фызыр и директорщ.

 

ТОЛЭ ЩЫГУФIЭ ЗЭМАН

Сомым (и пщIэр къецIэнтхъуэхмэ)

ЩогуфIыкIыр Толэ:

Iэджэ щIащ абы зэрищIрэ

Сом иIахэр доллар.

 

ГУАЩЭМЫГЪУЭ ХЪАНИГУАЩЭ

И нысащIэгъуэм гуащэм пщIэ хуищIар

КъыхуищIыжати, хъуа нэужькIэ гуащэ,

Зокуэфауэр, зечэтхъэжыр

И нысэм щхьэкIэ Хъанигуащэ.

 

ЖЬЫНДУМ

«Сотынш»,– жи,–

КъимыкIыу исщи дум:

Дунейм щекIуэкIыр

ИщIэркъым жьындум.

 

ДАНИЛ ЩIЕГЪУЭЖАЩ

И анэ еплъи, ипхъу къашэ.

Адыгэ псалъэжьщ

КIритI-мэритIт и анэ Динэ –

Данил, щIегъуэжри, къимыша Мадинэ.

 

ЗЭМАНЫМ IУЩ ИЩIАЩ

ИIэ ахъшэр хъумапIэ кассэм

Хилъхьэн имыдэ Ринэ:

ЕщIэж къэралым кърищIар

И шыпхъу нэхъыжь Маринэ.

 

ХЬЭСЭНБИЙ И ДЕРС

«Умайорми, Iур зыIыгъхэр пщIымэ бий,

ГъащIэу уиIэр усержанту

Уагъэхьынщ»,– жи Хьэсэнбий.

 

КЪУТКЪУCЫЖЬ НЭХЪУПЩ

И мэкъу пыпхъуэр еугъуейри,

Ирегъэшхыр гъупщ –

И жэм закъуэр Iуэм щегъалIэ

Къуткъусыж Нэхъупщ.

 

АУАНЩIАКIУЭ МАМЭМ

ГУ ЗЫЛЪИТАХЭР

«Ди зэманым и уэрэдхэр

ПыIэ щыгукIэ къыбоцIыху,– жи Мамэм: –

ЩагъэзащIэм и деж ахэр,

ЗыгъэзащIэ псори мэцымамэр».

 

АДЭ-АНЭМ Я ТХЬЭУСЫХЭ

«Жэщи махуи къыдыхьэжкъым –

ШыгъушыпсыпIэм дес.

Ди къуэм щхьэкIэ, дыунэхъури,

Къэтщэхуащи «Мерседес».

 

ХУЭМЕЙ И ТХЬЭКIУМЭМ

Хьэлэмэтщ и тхьэкIумэр

ЩхьэзыфIэфI Хуэмей:

Ар едаIуэу и мыхабзэ

Хъыджэбз щхьэпсыр зыхуэмей.

 

ХЬЭЖМУДАР И БЖЭКIЭ

«Загъэсысу сценэм итхэм

(Хуэхейуэ щытхэм дарым)

Я сом зырыз сиIауэ щытамэ,

Миллионер сыхъуат»,– жи Хьэжмударым.

 

ПЦIЫР ЦIЫХУ ГЪЭКIУЭДЩ

ХуамыщIыж дзыхьыпцIэ ТIали:

Дэкум хуэдэу къигъэпцIащ и ныбжьэгъу БетIали.

 

ТРАНСПОРТИРЫМ И ПЭЖ

«Зигъэпщ щхьэкIэ апхуэдизу

Доктор ПIытIэ мыпщ:

Сыхэмыту зы плIанэпи

Абы къыхуэмыпщ».

 

БУЛЬДОЗЕРИСТЫМ

«СощIэжыр фIыуэ,– жи,– си дозэр».

Иримыфауэ фадэ литр ныкъуэ

ДэмытIысхьэну ар бульдозер.

 

ЖЬЭРЫПЛЪЭМ

Еууей! Iуха щхьэгъубжэм

Къиплъми ар и рамэм,

ХокIыж – илъагъуркъым

Дуней дахащэм иIэ панорамэр.

 

«АДЭГУ-АНЭГУ»

Къакъэу яIэр ищIа пэтми «тIыкъ»,

И адэ-анэр щогуфIыкI ПIытIыкъ.

 

КУЛИЖАН И «АУАН»

ЕщI ауан,

Илъагъумэ лъапцIэу Жан,

НыкъуэпцIанэу къэзыкIухь

Зи хабзэ Кулижан.

 

ИДЖЫРЕЙ ХЪУЭЖЭ И ПСАЛЪЭ

Делэм уэ фIэкI,

губзыгъэр езыр къыпфIэкIынщ.

Адыгэ псалъэжьщ

«СыфIэкIынщ сэ тыншу зышхам бжьын,

Уэ уфIэкIыфмэ зыIухуам гынбжьын».

 

ДОХУТЫР ЛИДЭ

Больничнэр ещэ,

И напэр мысу, Лиди:

«Аращ,– жи,– ищIэр ди зэманым

Дохутыр цIэрыIуэ Айболити».

 

БАГЪЫМ И ПЭЖ

«Хьэ къэрабгъэри

(Къритхъуу щIыр),

Мэбанэ,– жеIэр Багъым,–

ЗылъэкI зыгуэр,

«Уирэ» жиIэу, къыдэтым и щIыбагъым».

 

АВТОБУСЫМ ИС БИБЭ

Автобус уасэ итын Iуэху

Зэримыхуэ Бибэ:

И бохъшэ цIыкIур кърихащ

Къыбгъурыс Хьэбибэ.

 

ЗЕГЪЭКЪУЛЕЙ ПIЫТIИТI

«Жылэ псом зытI фIэкI ямыIэм,

СиIэщ,– жеIэр,– тIитI»,–

Къулеижьу зелъытэжыр

Мэлыхъуэжь ПIытIитI.

 

СОНДЭДЖЭР КIУШЫМ

И джэдыжь цIыкIур пхуиукIынущ

ШейтIаным зи гур иIыгъ КIушым,

ХуэбукIыжыну ищIэу щытмэ

КъыпхуэмыIэту хьэлъэ уи гуэгушыр.

 

ИСХЬЭКЪ

ЩыгуфIыкIкъым,къратами, мазэ хьэкъым

Кризис щIопщыр зытехуа Исхьэкъыр.

 

ДАХЭЖАН И ПЭЖ

Дахэм къимышэ щыIэкъым.

Адыгэ псалъэжьщ

«ЩымыIэр пэжщ, къимышэ дахэм:

КъишэнкIи хъунущ, – жи,– абы хьэдыгъуэдахэ».

 

НЫБЭ ЧЕЙМ

Мывэ, мысэ, мыхэ,

МытIэ, мыIуэ, мыпщIэ –

Хьэдагъэ кIуэн, ишхахэр

Абы къыкIэрымыпщIэу!

 

ЩХЪУХЬ ЗЫЩЭ САТIУ И УНЭМ

Колорадэ цIывым и сурэтыр

Ину щIауэ щIэлъщ СатIу и унэм:

А цIыв цIыкIум, зыкъом игъэунэхъуми,

СатIу хуэдэ цIыхухэр егъэунэ…

 

ХЪУЭЖЭ-МУХЬЭЖИД

«СиIатэм сэ пхъэIэщэ

(Абы щIэщIауэ шитI),

Фхуэзвэнт фи шыгъуэгу хадэр»,–

КъыджеIэр Мухьэжид.

 

ХЬЭЩIАПIЭ ЩЫIА НЫБЭМ

ЗдэкIуа къуажэр къыщыхъуащ

Бэлыхьлажьэу ныбэм:

«Абы дэсхэм сагъэшхащ,– жи,–

ТIэпIу тхьэмщIыгъуныбэ».

 

ЗЫЗЫГЪЭБИЗНЕСМЕН ТIЫМ

«Фейдэшхуэ къезгъэщIынущ»,– жиIэу тIым

Ишат Бахъсэн бэзэрым шыкIуртIым…

 

ЗЭДЕФАИТIЫМ

Бжьэм и уасэр кърихыну

Хьэжысуфыр поплъэ Суф,

Щогугъ Суфи, къишиинум

И ефэгъуу Хьэжысуф.

 

АЛЬБЕРД И АРГУМЕНТ

«Дэ Iэхъуэ,– жи,– тхуэмыхъуну Берд: –

Iэхъуэн щIимыдзэу,

IэхъупщIэр къыIихащ Биберд».

 

АЖЭМ И ХЪУЩIЭ

«Иджы,– жи,– ягъэкIыр жьакIэ

Нэмысхэми си лъэхъуамбэжьакIэм».

 

ЛЪЭБЫЦЭ ЗИIЭ БЫЦЭ

БжэгъукIэ йоуэр Бадзэм Быцэ:

«Къедзэкъащ,– жи,– а нэжэсыр нетIэ си Лъэбыцэ».

 

ТIЫМ

ЩымыIэ мыгъуэ къыгурыIуэ тIыми:

КъыIехыр тыгъэу, кърат закъуэм, шыкIуртIыми.

 

БЕРД И АДЭМ И УПЩIЭ

«Хэту пIэрэт бжьыпэр зыубыдынур,– жеIэр Берд и адэм,–

ЩекIуэкIатэм ди районным бюрократиадэ?»

 

ШУРЭ

ИмыщIэ кафем пщафIэу щылажьэ Шури

Лы упщIэтар шыгъукIэ зэрашури.

 

МЫВЭ ЗЫГЪАЖЭ МЫКХЪЭМЫВЭМ

Губзыгъэ хъуркъым мыкхъэмывэ Гъажэ:

Хуэзэжрэ пэт, мывэ хъурейр и пэкIэ егъажэ.

 

ПIАТIЭ И МЭКЪУ IЭМБАТЭ

«Тхьэ щаIуэжыр сымыгъэшу батэ.

АтIэ хэт,– жи,– изылъхьар

Шыгум мэкъу Iэмбатэр?»

 

ЕФЭН ЩЫЗЫГЪЭТЫЖАМ

Къриту щытми, и мэм аллергие,

ХуоплъэкIыр фадэм, хуиIэу ностальгие.

 

ЩХЬЭХЫНЭ ИНАЛ И НАЛ

Уадэ цIыкIукIэ кIэриIулIэм и куэбжэжьым нал,

ТхьэмыщкIагъэм къыхэкIыну къыщохъуж Инал.

 

ПРОКУРОРЫМ И ЛЪЭIУ

«Суд екIуэкIым сыщогъуагъуэ,

Си къалэнщи сэ гъуэгъуэн.

СыволъэIур:

Хэвмылъагъуэ абы зыри гъэщIэгъуэн».

 

ТУТЫН ЕФЭ БАКЪЫМ

ЩIыхьышхуэ хуещIыр

И бий бзаджэм Бакъым–

КърехьэкIыр ар, дилъхьауэ

Дыжьын пэртэбакъым.

 

ЩIЭНЫГЪЭ ИЩХЬЭ ЗИIЭ ЛЫХЪУЭМ

Тримылъхьэу зищIми и щхьэм

Мэлыхъуэныр, Лыхъуэм,

Лъакъуэубыдыр игъэпщкIуауэ,

Щэхуу мэмэлыхъуэр.

 

«ДЕДОВЩИНЭ»

Гауптвахтэм, ирадзауэ, исщ Къадирыр:

Къыхуихьакъым, тыкуэным кIуэуэ,

Бжьэ и командирым.

 

ЛИЛЭ ХЪУАЩ ДЫХЬЭШХРИЛЭ

Дыхьэшхыным узыншагъэр игъэбжьыфIэу

Дохутырхэм жаIэу зыхихати Лилэ,

Делэ дыдэ хъуа фIэкIа умыщIэу,

Лилэ хъуащ дыхьэшхрилэ.

 

ЛЭТРЭ БИБОЛЭТРЭ (ПЦIЫУПСИТI)

Биболэтым къегъэпцIэжыр Лэт,

Зэгуэрым Лэт

КъигъэпцIэгъащи Биболэт.

 

НИНЭ И «ЩХЬЭУСЫГЪУЭ»

ПшынэIэпэм хуехь къуаншагъэр Нинэ,

Зыхуей къафэр къыхуимыгъэкIым пианинэм.

 

ПОРТФЕЛЬ ЗЫМЫIЫГЪ МИНИСТРЫМ

«ХьэлIамащIэ кIэрыщIэну,

ЗэрызбгъэщIынур сыт а IэмпIэр,–

ЖеIэр портфелыншэ Мырзэ,–

Къызатмэ мазэм,

Хуашийм хуэдизыбзэ

Портфель зехьэныр зи фэм дэкI Жамырзэ?»

 

ФЫЗИБЛ ЗИIА ТIАКЪЭ

Нэчыхь хурегъэтхыж япэ фызу иIам ТIакъэ:

Абы хуэбгъадэ хъун

Мыдрей фызихым хигъуэтакъым.

 

ЗЫХЬЫМ И ПЭЖ

«Къутэнущ абы и тхыхьыр,–

ЖеIэр Зыхьым,–

КъарукIэ болътри хэбгъэзыхьым».

 

НЭПСЕЙ IИЛ

Уэншэку къэп къищтауэ макIуэ

И ныбжьэгъум и деж Iил,

ХуэнщIейр ауэ къритыну

Къепсэлъащи МэчрэIил.

 

НАХЪУЭ ИГУ ЕГЪЭФI

Тригъэлъыжщи и ныбэ нэщIым и Iэр, Нахъуэ

«Сысымей мылъкум си Iуэхущ,– жи,– сэ сытеунахъуэм».

 

ЗЭЗЫР КЪЫЗЭБЭКIЫМ

«А и хьэмаскIэми

Къысщыхуэ,– жи,– и ней»,

И ней щыхуакIэщи

И хьэмэшыпхэ благъэ Зулъкъарней.

 

ХЬЭБАС И «БАЗ»

Нэхъ тэмэму къыдолъытэ, упимыхьэм баз:

КъыфIэпхьэхухэм я пIэкIэ

«Мохьыр»

Къуетыр пцIыупсыжь Хьэбас.

 

ДАХЭУЭС ФЫГЪУЭНЭДЫМ

Езым нэхърэ фIэнэхъ хужьщи

КъесагъащIэ уэсыр,

Сабэ къищтэурэ, трепхъэ

Уэсым Дахэуэсым.

 

МЭХЪУЩIЭ ЛЭН

МэхъущIэри

МэщIатэр Лэн:

Улахуэр игъуэу кърамытми,

Налог итыну и къалэнщ.

 

ХУЩХЪУЭ ЗЫЩЭ РОЗЭ

ИкъусыкъужкIэ хуэарэзыщ

КъэкIыгъэхэр зыхъумэ станцым Розэ:

Абы и фIыгъэкIэ икIащ

Зи пIалъэр икIа и гъуаплъэ купоросыр.

 

ЗЕРЭ

И гурыIупсыр нэхъ кIащхъэу къажэ хъуакъым Зерэ,

Зэрихьэ фом гъэпщкIуауэ зэребзейрэ.

 

ТАУЧЭЛМЫЩI МУСЭ

«Щхьэгъусэ сщIымэ и шыпхъу Лусэ,

Къэнэнущ,– жи,– къэзмышэуэ Лалусэ».

 

ХЬЭСЭН И УПЩIЭ

«КъызжеIэт,– жи-, сыт къикIыр мыщIэм?»–

ЙоупщI Хьэсэн мыщIэр сыт ищIысми зымыщIэм.

 

IЭЩ ДОХУТЫР ПIАТIЭ

Хуэныкъуэ хъуащ и бохъшэр ахъшэм ПIатIэ:

«Къежьам арат,– жи,– зи узыр мыкIуэдын мы

мэлхьэпIатIэр»…

 

ПIЕТI И ВЕЛОСИПЕД

Бензин уасэм къигъэдзыхэрти,

Ищэжащ и «Волгэр»ПIетI.

Бензиныншэу къижыхьыфти,

Къищэхуащ велосипед.

 

ХЬЭМЗЭТХЪАН И УПЩIЭ

«Шы пшэр уанэжьщ

ХьэкIэпычыжьхэ я къуэ Хъан.

Иджы къызжеIэт, хэту щытми

Хъан и ныбжьэгъуу Залымхъан?..»

 

НЭПСЕИЖЬЫМ И ХЬЭЛ

Дуней фIыгъуэм хэсу щытми,

ЖимыIэну Бэч:

«Срикъунущ мылъкуу сиIэм –

Куэдщ ар, къызобэкI».

 

БЖЬЭ НЫБЖЬЭГЪУ

«Ар си ныбжьэгъу пэжщ»,– жи Мэт,

Къыдефащи зы бжьэ дыгъуасэ Къанэмэт.

 

ДАХЭ-ДАХЭУ ЕМЫДЖАХЭМ Я ГЪУМЭТIЫМЭ

«Тэмэм дыдэу тхуэмытхыфми «ф»-р,

ПэкIэ зэи демыфа чыфыр».

 

ЦИНЭ И ТХЬЭУСЫХЭ

Илъэс щэ ныкъуэ дигъэкIауэ,

Мэтхьэусыхэ Цинэ:

«Иджыри къэс ипшыныжакъым

КъандескIэ къыфIэсхьа капрон лъэпэдыр Бабыцинэ».

 

МЫIЭРЫСЭ ЗЫЩЭ ЖАНТЕМЫР

МыIэрысэр еугъуейри,

Ешхыр мыр:

«Мыр щащэхуркъым бэзэрым»,–

ЖеIэр Жантемыр.

 

ПАРТФУНКЦИОНЕРЫМ И УАЗ

«Политикэм фыхэкIи,

КъэкIуахэр хасэм

Фытепсэлъыхьыт, зывгъэнщIыхукIэ,

Бжьын, къэб, къэбыстэ зэрыхасэм».

 

МАЩIЭР ФIЫЩIЭ ЗЫМЫЩI НЭХУ

«Дагъэхуабэркъым»,– жи,– фIыщIэ ищIкъым Нэхум

Уафэ лъащIэм ипхъа вагъуэ цIыкIухэм

Дунеижьыр къызэрагъэнэхур.

 

ТIАКЪЭ И ЩХЬЭУСЫГЪУЭ

Щхьэусыгъуэ къигъуэтащ

Ефэн щхьэкIэ ТIакъэ:

Илъэс ныбжьыр иIэ хъуащ

Нобэ и адакъэм…

 

ЗАВЫМРЭ АБЫ И КЪУЭДЗЭМРЭ

ЛIэнкъэнэну щошынэ

Замым завыр:

«Ар мэхъур,– жи,–

Хуэдизыбзэ динозавр».

 

ЛИЙМ И ЧЭНДЖЭЩ

«Умыгъуэтмэ къыщытхъун,–

ЖеIэр Лийм, –

Щытхъуж уэр дыдэр

Уи балийм».

 

АСТЕМЫР И «ЛЪЭIУЭКIЭ»

Япэ щIыкIэ, щхьэщIэ ищIу,

«Къызэт,– жеIэр, мор е мыр».

«Мыр»-р ептмэ, «мор»-м щхьэкIи

КъолъэIужыр Астемыр.

 

МАРТИН И ЧАСТУШКЭ

«Сэбэпышхуэ» къысхуэхъуащ

Дзэ дохутыру Абдулыхь:

Си дзэр, мащIэу хэсысыхьти.

СхуищIащ ину хэлэлыхь».

 

БЕРЫЧЭТ БЕСЫН БЖЫЗОIЭ СИ IЭМ

Нэм фIэбэр Iэр Iэбэм еух.

Адыгэ псалъэжьщ

БжызоIэ берычэт бесыныр

Емышыжу мы си Iэбэм:

Хьэгъапхъэу щыт мы си нэм фIэбэр

Уоухыр, псынщIэуэ уIэбэм.

 

АНЭ ГУ МЫГЪУЭМ

Анэ гу мыгъуэм уи быныр балигъ умыщIу сощIыр шэч:

Мысабиижми, а уэ уи къуэр и Iэпэр пIыгъыу къыбошэкI.

 

БЫШ И НЫШ

НэхъыфIщ зыIуумыгъахуэм

Быш и нышыр:

ПхузэфIэмыкIрэ, ныш хуумыукIыжым,

Уигъэшха и нышыр

Бышым къуехъуэныжыр.

 

НЫБЖЬЭГЪУ НЭПЦI ЖАН

«Бегъымбаррэ пэткIэ, зэ щыуащ»,– жи Жан,

Игъэзахуэу махуэ къэскIэ щыуэ Абужан.

 

ЩХЬЭХЫНЭМ И ГУРАЩЭ

«Езыр-езыру, емыIусэуэ си Iэпэр,

СиIам арат лажьэуэ пхъэIэпэ».

 

МУРАДИН

«Дыгъуасэ лъандэм

Сыхьэт имыгъуэтыжым хуэдэ Дин.

Пщэдей къысхуащэхунущ»,– жи

Iэбэн-лъэбэн зи «жагъуэ» Мурадин.

 

КЪИДЖАР МАЩIЭЩ

ХузэфIэкIкъым и акъылым ментым

Фактыр хуигъэкIуэну аргументым.

 

ГЕНДИРЕКТОРЫР КЪЭСКIАКЪЫМ

Уафэгъуагъуэу щхьэщыкIащ

Хьэсамыр ревизэр,

Къыхуищэхури Хлестаков

«Самсунг» телевизор.

 

ДИНЩIЭКЪУ ТХЬЭМЫЩКIЭМ

Бытыр иретыр МуIэзин,

ЗэриIэм хуэдэу «Лимузин».

 

«ПЕДАНТЫМ» И ФIЭГЪЭНАПIЭ

«Хуэмытх,– жи,– дахэ-дахэу «у»-р

Фэ апхуэдизу фызыщытхъу Заур».

 

ЩIЭНЫГЪЭЛI БГЪЭЖЬНОКЪУЭМ

ПащIэу щыIэр тIууэ игуэшащ

ЩIэныгъэлI Бгъэжьнокъуэм:

«Тетщ,– жи,– зыр тхьэкIумэкIыхьым,

Адрейр – нартхэ Бэдынокъуэ».

 

ПЦIЫУПС КIУШЫМ

ЩиупскIэ пцIы,

ЩIегъалъэ куууэ КIушым:

ЩеIуэж страус джэдыкIэ

КъикIэцIыу и гуэгушым.

 

НАНЭ И «УРЫСЫБЗЭ»

«Си гугъащ,– жи,– ар урыс»–

УрысыбзэкIэ епсалъэрт нанэ Наурыз.

 

ТЕОРЕМЭМ И ШХЫДЭ

«Къехь,– жи,– сэ зы мазэм ахъшэу къэсхьым

Хуэдиз дыдэ Лемэм,

Щхьэкъутэ куэдхэм, схуэдэу,

ЯмыукIыу щытми я проблемэм».

 

ЖЕНЭ И ПЦIЫ УПСЫКIЭ

«Диктант схуэмытхми, –

ЖеIэр Женэ,–

Тхьэ дыдэ, сотхым «тхукIэ» изложенэ».

 

СУРЭТ И ХЬИЛАГЪЭ

И гукъанэр япэ кърегъэщ

Бажэм и бажэкIэуэ Сурэт:

Пхын хуейщ и жьэр япэ щIыкIэ

Гукъанэпэр зыубыдыпхъэу щыт а Жансурэт.

 

ФАДЭМ ИТХЬЭКЪУА БОТ

Iэл фIыцIэжьым хуэдэу

КъызэкIуэкIырт Бот:

И фадэбжьэр зэрытыпхъэм

ИракIат компот…

 

«УНАГЪУЭ ПЕДАГОГИКЭ»

Пэжырытхэм тету

Итхыфащи «у»-р,

Ядэ-янэм къыхуащэхур

«Сникерс» Азнаур.

 

ЛАЦЭ И «АППЕЛЯЦЭ»

Арэфым хуэдэу къуаншэ Лацэ

Зигъэфочыкуу итхащ верхсудым аппеляцэ.

 

ДАУТРЭ ХЬЭЖДАУТРЭ

И ныбэ изу шхащ Даут –

Шхын щхьэкIэ лIэми едэ Хьэждаут.

 

IУЭХУНШЭ ХЬИД

ИщIэн ищIэжкъым,

Iуэхуншэу щысщи Хьид:

Къищтауэ уадэр, екъутэж

Шэнтжьей ищIахэр Муштэхьид.

 

ЗЭТЫМ

Зэпэзэву пцIы еупсыр

Иксым и къуэ зэтым –

Ар щылажьэу къыщIэкIынущ

Щхьэхуимыт газетым.

 

ДЫГЪУЭГЪУАКIУЭ ГЪУЖЫМ

Дыгъуэу яубыдми,

ХъымпIар ищIкъым Гъужым:

Къадыгъуа хьэпшыпхэрщ

Гъужым къидыгъужыр.

 

ЛИУАН

ЗэхифыщIэрт, зэхисыпэрт уанэр:

Зытес уанэр ейтэкъым Лиуаным.

 

ТУТЫН ЕФЭ ДИН

Аккумуляторым зыкъомкIэ

Изогъэщхьыр тутынафэ Дин:

МащIэ-мащIэурэ и ныбэм

Щызэхуехьэсыр никотин.

 

«ТIУ»-Р ЗЫГЪЭПЩКIУ ПIЫТIУ

КъэсщIащ, ибзыщIми,

Къихьауэ зэрыщытыр «тIу»:

И дневникыр пхъуантэ щIагъым

ЩIигъэпщкIуат ПIытIу.

 

«МАШЭБЗЭ»

Дахэ-дахэу имыщIэ Машэ зы бзэ:

Зэрыпсалъэр мыадыгэбзэ е мыурысыбзэ.

 

ХЬЭРФ «Ы»-М И ХЪУЩIЭ

«У»-м иужькIэ сыщатхыпхъэм,

Сэ сатхакъым,– жеIэр «ы»-м.–

Тхьэр си бийщ, езмытым судым

Сэ и гупыр а Щыхьым».

 

БЫХУ И ПЭЖ

«Уахъшэншэм,– жеIэр Быху,–

ЩыпщIэн щымыIэ Бытырбыху».

 

ЕРЫЩ КЪАНТЕМЫР

ЗэрыжепIэм хуэдэурэ

«УмыщIэ мыр»,

ИщIэнущ «мыр»-р

Къантемыр.

 

ЩЫЛЪЫН ЗЫФIЭФI АЗНАУР

Линэм телъу

Етхыр «у»-р –

Щылъын тIэкIур «зэрижагъуэр»

Къегъэлъагъуэр Азнаур

 

АЛБИЙ И ГЪУЭМЫЛЭ

Албий ещIэж и «адыгагъэр»

Дэнэ нэсми и къуэш нэхъыщIэ Мылэ:

Абы и деж хьэщIапIэ кIуэркъым,

Къыздимыщтауэ зрикъун гъуэмылэ.

 

ЧЭРИМ

ЗэщIигъэхьауэ щытми Кърымри Римри,

Губзыгъэ хъуакъым иджыри а Чэримри.

 

ШХЫН ЩХЬЭКIЭ ЛIЭУЭ ЩЫТАМ

ЗигъэнщIу ишха нэужькIэ

Дэм и купщIэр, дафэм

Йолъэпэуэжыр, удэфауэ

Зи ныбэ из хъуа Хьэжмэстафэ.

 

И АДЭР ЕГЪЭСЭЖЫР ПIЫТIЭ

«Къаплъэ мыдэ,– жреIэр и адэм ПIытIэ,–

Уэзгъэлъагъуни шху шынакъым итым

Хьэлур зэрыхапIытIэр».

 

IИСРАФИЛ

ФIэIэфIыбзэу и хъарбызыр фIишхырт Iил,

«Сысейр иужькIэ сшхыжми хъунущ»,– жиIэу Iисрафил.

 

ХЬЭIИШЭТ

Шэми шхуми сес.

Адыгэ псалъэжьщ

КъэтщIащ иужькIэ и пэжыпIэр: зысыр шэт,

ЗищIа щхьэкIэ шэми шхуми ису ХьэIишэт.

 

ТЫГЪУЭНРЭ ЖАНТЫГЪУЭН БЗАГУЭРЭ

ПIэрэпIэрэн

Зи хьэл Тыгъуэн

ЩецIэлъ и лажьэр

Зи бзэр мыпсалъэ Жантыгъуэн.

 

МОДЭМ И ГЪЭР ХЪУАМ

Мэшынэ

КъыкIэрыхункIэ модэм:

И бостей щIэрыпсыр зыщидзауэ,

Гъуэншэдж лъапэ зэвыр

ПсынщIэу зыщетIагъэ Квазимодэ.

 

ЗЭГЪУНЭГЪУХЭМ Я ЗЭПЕУЭ

Къатищ ещIыж

И унэр Хьил:

Зы къаткIэ хъуат нэхъ лъагэ

ЗыщIэс и унэр Исмэхьил.

 

МЫКIЭ И КIЭСТУМЫКIЭ

ГушыIэрейщ

Бынунагъуэшхуэ зиIэ МыкIэ:

И щхьэгъусэм щеIуэж игъуэту лажьэ,

ИмыщIэу ецырхъам и кIэстумыкIэр.

 

ИНАЛ И НАЛ

Нарт Сосрыкъуэ и Тхъуэжьейм

ЩIэлъынкIэ хъуну щыта налым

Тритхыхьащ и диссертацэр

Аспирантурэр къэзыух Иналым.

 

КЪУРЭ И «ЕПЛЪЫКIЭ»

Псым итхьэлэр шхийм йопхъуэ.

Урыс псалъэжьщ

Псым щитхьэлэм шхийм епхъуар

Егъэкъуаншэ, зигъэIэзэу Къурэм:

«НэгъуэщI мыхъуми, ар епхъуэн хуеящ,– жи,–

Псы гущIыIум телъа къэрэкъурэм».

 

«Р»-М И АФЭРЫМ

«П»-м къыхуищIа Iуэхутхьэбзэм щхьэкIэ «р»-м

ЖреIэ «Б»,

ФIыщIэшхуэ хуищIу, «афэрым».

 

РЕПЕТИТОР ЗИIЭ «РЕПЕТИТОР»

И щIэныгъэр зэрычэнжыр къегъэлъагъуэ ТIитIэ –

И щхьэм щхьэкIэ къищтэжауэ, иIэщ репетитор.

 

ГЪУМАР И ТХЬЭУСЫХЭ

«Убыдыгъуейщ и IумпIэр,

Ешхыр цIынэу ди лыр,

Фадэшым тесу къытхыхьауэ,

Аркъэ бамейр къызыкIэрих Iэдилым».

 

УРЫС ШИЩЫМРЭ МЫЦIУТIРЭ

«Фыздэжэр дэнэ?» –

УпщIэр сэ щестам,

КъызжаIакъым шищми цIутI,

Хэбгъэзыхьмэ,

Езы дыдэхэми здэжэр ящIэу

Си фIэщ хъуркъым»,– жи МыцIутI.

 

КЪЭРАБГЪЭ ХЬЭЖ

Къэрабгъэщ: мэшынэр сытым щхьэкIи Хьэж:

Мазэгъуэ жэщым

И ныбжьым къигъэщтэжати,

Иджыри къэскIэ и гур къимыхьэж.

 

ФЭРЫЩI ТИНЭ

Иригъэпщхьэным хуэдэу и Iум,

Ирегъэблагъэ хьэщIэр Тинэ:

Хьэхрэ щIыхэу къыхуэкIуащ

И ныбжьэгъу Iужажэуэ Жантинэ.

 

ПIЫТIЭ «ГУМАНИСТ»

Гуманизмэм теухуауэ

Лекцэ къеджэ ПIытIэ,

Илъэгъуам факъырэ къакIуэу,

IункIыбзитIкIэ и бжэр къегъэбыдэ.

 

НЭПСЕЙ ХЪУЭТЫМ

Еугъуей

И мылъку хьэрэмыр Хъуэт,

ФIэауанщ зи ерыскъы хьэлэлыр

ФIэIэфIыпсу зышхыжыф Жанхъуэт.

 

БЭЗЭР ХАБЗЭМ ТЕТЩ

Къыхуищэхукъым «сникерс» Быцэ,

«Тху» къимыхьу щытмэ, и Лъэбыцэм.

 

КЪАНШУМЭС

«СщIэркъым,– жи,–

Си напэр нобэ Iейуэ мэс....»

Напи топи зимыIэжу

Дзажэпкъ зиIэ Къаншумэс.

 

ЩХЬЭЩЫТХЪУ ЧЫЛАНИЙ

ИукIащи щIэхуа тузкIэ щIэхуа нийр,

ЛIым я лейуэ зелъытэжыр Чыланий.

 

«ЛЪЭIУЭКIЭ»

Къратакъым,

ЕлъэIуати, дыщэ грамм.

ЙолъэIу итIани:

«НытIэ, къызэфтыт,– жи,–

Зи гугъу тщIым хуэдэу килограмм».

 

МЫКЪЭ И «ДЕМОКРАТИЕ»

Зыхуей дыдэр елэжьыр Мыкъэ,

Йочэнджэщри и гъунэгъу Хьэмыкъэ.

 

НЫКЪУЭДЫКЪУЭ ДЫКЪУЭ

«Ныкъуэдыкъуэхэм защIэгъэкъуэн хуейщ»,– жеIэр

Дыкъуэ,

Езыри хъуауэ щытщи ныкъуэдыкъуэ.

 

ЩХЬЭХЫНЭМ

Имыдэ тхуиупсын и жьакIэр Махуэм:

«Сэ сыупсащ,– жи,– ар дыгъуасэ мыхъу вэсмахуэ».

 

НЭХУРЭ ЖАНСИНЭХУРЭ

ЗэмыщхьитI зэрихьэлIэркъым

Адыгэ псалъэжьщ

И хьэсэпэр кIэщIщ а Нэхуи.

КуэдкIэ абы къыкIэрыхукъым и щхьэгъусэ

Жансинэхуи.

 

ПЦIЫ ЗЫУПС ЗИ ХАБЗЭ БИЙ

МэбампIэри,

Ихуэжкъым и фэм Бий:

«СыкъигъэпцIащ,– жи,– дэкум хуэдэу

Бакъ делэм и къуэ Адэлбий».

 

ТХЬЭКIУМЭКIЫХЬЫМ

Мыщэ жеям и хадэм

Иридзэжынут мывэ:

Мэшынэ:»Къэушмэ,– жи,– сысейм

Къридзэжынущ абрэмывэ».

 

ЖЬЫНДУМ

«Сыщыхуейм деж дзыгъуэ сещэу,

Сисыжам нэхъыфIт»,– жи,– дум»

Зэрыдыгъуэм щхьэкIэ

Тутнакъэщым ирадза жьындум.

 

КЪЭМЫЛАНДЖЭ УЭС

Езым щхьэ фIэмытми,

Къэмыланджэ Уэс:

«Схуигъэпсэу,– жи,– куэдрэ

И щхьэр Кулиуэс!»

 

ШЫ ПШЭР УАНЭМ

Шы пшэр уанэм хуэдэщ уанэр:

Шы пшэр уанэм трищIащ тIуанэ.

 

ДЗЫГЪУЭНЭФЫМ И НАСЫП

Зелъытэжыр дзыгъуэнэфым

НасыпыфIэ хъуауэ:

Нэхум щхьэкIэ ахъшэ иткъым,

Зэм хэщIауэ, зэм хэхъуауэ.

 

КЪУТКЪУС МЫЛЭ И ГЪУЭМЫЛЭ

Ишхын къыздищтэркъым,

ЛэжьакIуэ кIуэмэ, Мылэ:

«Дрокъу,– жи,– тIури

Си гъусэ Ломэ къихь гъуэмылэм».

 

СУДЬЯ МЫЗЭ

IыIы химылъхьэу,

Йобакъуэр щыIэ хабзэм Мызэ,

Зэ телефонкIэ къекIэпсауэм

Зи уэлиигъуэ Къарэмызэ.

 

АЖЭЖЬ ХУЭДЭ ИСХЬЭКЪ «ФАКЪЫРЭМ»

«Зыгуэр къызэфт,

ВгъэзащIэ,– жи,– фи хьэкъыр» –

ЙолъэIур псоми игъащIэм псапэ

ЗымыщIа Исхьэкъыр.

 

КЪУТКЪУСЫЖЬЫМ И «ГУФIАПЩIЭ»

Тхьэлъанэ ещI: къэзыгъуэтыжым

Дыгъуасэ кIуэда и тIыр,

КъемыхьэлъэкIыу иритыну

И жып сэмэгум илъ щаитIыр.

 

ХЬЭМЫКЪЭ И ХЬЭНЦЭГУАЩЭ

УридэкIуей хъун хуэдэу къешхми

(«Зэрыгубзыгъэм» хэлъкъым шэч),

«Къегъэщэщэхыр» ину хишу,

И хьэнцэгуащэр кърешэкI.

 

ТIУТIЫР МЭДЫХЬЭШХ

Хэтхъэным хуэдэу и ныбафэр

Мэдыхьэшхыр доктор ТIутIыр:

«ЩIэныгъэм хъури Уэс и кандидат,

Къэнащ,– жи,– пхъэнкIакIуэншэу институтыр».

 

ПЩЫЗЭБИЙ И БИЙ

«Зыгуэрхэм

Дызэбийуэ я гугъэнщ»,– жи Бийм,

Нэщыпхъуэ белкIэ

И лъабжьэр къетIри Пщызэбийм.

 

«УХУАКIУЭ» БЫШ И ЧЫРБЫШ

«Сэращ зыщIар мы унэр,– жеIэр Быш,

Къатибгъуу зэтет унэр щащIым,

Хилъхьэгъати блыным зы чырбыш.

 

ЛАЦЭ И ИЗОЛЯЦЭ

Йобий гъунэгъуу иIэм Лацэ–

Езыр-езыру зещIыжыр изоляцэ.

 

ЛЪАКЪУЭРЫГЪАЖЭМ И ПЕДАЛЫР

ЗЫЩОТХЪУЖЫР

«Дунейр къутэу зэгъэжыху

Си Iуэхути бжьыпэр къихьтэм ТIалэ,

Сымылэжьатэм, бзэпсым хуэдэу,

Лъакъуэрыгъажэм и педалыр».

 

РЕВИЗОРЫМ И ХЬЭДРЫХЭ ПСАЛЪЭ

«Урамыгъафэуэ махуэпс,

Уагъэухыни а уи ролыр,

ПхъэIэщэм хуэдэу,

Ебдзыхыу щытмэ

Куууэ уи контролыр».

 

СУФФИКСЫМ И ГЪУМЭТIЫМЭ

«Минрэ ситу щытми

Лъабжьэм и кIэм,

Зи щхьэр зыIэт префиксым нэхърэ

ЗызмыгъэнэхъыкIэ».

 

КОРРЕСПОНДЕНТ Ю.

ИщIэн игъуэткъым

Газетым и лэжьакIуэ Ю:

Бюрократым бгъэдыхьауэ

КъыIех мыхьэнэ зимыIэ интервью.

 

УСАКIУЭМ И ЖЭУАП

«УсакIуэ нэс сыхъуами, сэ сымыщIэ.

СщIэр зыщ:

УсакIуэ нэсхэр къахэкIащ

Илъау щытахэм си IэмыщIэм».

 

IЭЗЭ НЭ ЗАКЪУЭМ

«Къызэфтыт микроскопыр»,– жеIэр Махуэм,

Мурад ищIащи еплъыну Iуащхьэмахуэ.

 

ПЭЖЫР ЗЫХЭМЫЗАГЪЭМ

ПIехыж, къогубжьри, къуитауэ щыта уагъэр,

ХущIэпIужмэ и нэм и щыуагъэр.

 

КЪУЛЫМ

ИмыщIэ жьыр къыщепщэр Къулым:

Ар къуэтщ и къуагъым Мэремкъулым.

 

«УЭРАМ ГЪЭБЖЬЫФIЭ» МЫЦЭ

ФIэлIыкIт зыгуэрхэм япэм щыгъуэ Мыцэ,

Иджы шотыжьым зыри къримыдзэ.

 

ЛАНДЫЩЭ И «ДЫЩЭ»

Дыжьыным хэтщ къыхищIыкIыну дыщэ.

Сыту тхьэмыщкIэ а нэпсей Ландыщэ!

 

ХЪУНУ ХУЕЙЩИ…

Хъуну хуейщи хьэм и щIасэ,

Хьэм хьэIус ирет ХьэмщIасэ.

 

МАДИН

КъещIэжыр псынщIэу

ЗэриIэн хуейр дин,

Гузэвэгъуэр къылъыкъуэкIмэ

Iимансыз Мадин.

 

НИТIЭ И ФИЛОСОФИЕ

«Ухъун щхьэкIэ уэ инышхуэ,–

ЖеIэр НитIэ,–

Япэ щIыкIэ

Укъежьэн хуейщ цIыкIунитIэу».

 

ТХЬЭМЫЩКIАГЪЭ КЪЫХУАХЬАЩ

ТхьэмыщкIагъэ къыхуахьащ

ПцIы иупсхэм Мызэ:

Къабжыр цIыхухэм ар пцIыупсу,

Пэж щыжиIэм дежи зэзэмызэ.

 

ПАРТЫМ ХЭТХЭМ Я «ДЖЭГУКIЭ»

ПхыкIыжтэкъым и Iуэхур «МыIэрысэм» –

ФIащащ я партым цIэуэ«КхъужьIэрысэ».

 

МЭТРЭ ЧЭЛИМЭТРЭ

Чэлимэт еубыр Мэт,

Мэт еубри Чэлимэт.

 

ГЕНДИРЕКТОР ТIУРЭ

«Си закъуэ си гугъати…

(Мэдыхьэшхыр ТIурэ)

Си замми иIи,

ДымыщIэ щхьэкIэ, агентурэ…»

 

ЛАМ И СЭЛАМ

Къищэхуащи, щышынэжкъым

Гендиректор Лам –

Ревизорым Iэ сэмэгукIэ

Ирихащ сэлам.

 

ИНАЛ И ШЫЩIЭ НАЛ

ШыщIэ къамылъхуам уанэ трелъхьэ.

Адыгэ псалъэжьщ

ШыщIэ къамылъхум къыхуещэхур нал –

НэгъуэщI зыгуэру къыщIэкIащ Инал.

 

ХЬЭЛЭМЭТЩ И ХЬЭЛЫР…

Хьэлэмэтщ и хьэлыр

ЩхьэзыфIэфIхэ КIуакIуэ:

«Iуэху мыублэм блэ хэсщ»

Жылэм жаIэм,

Абы жеIэр хэсу хьэндыркъуакъуэ.

 

ТХЬЭГЪЭПЦIЫМ

Махъшэ къищэхун мурадыр иIэу

Нобэ макIуэ Данием –

Тхьэлъанэ ещIыр,

IуащхьитI зи тхыцIэм тетым хуэдэ

Щимыгъуэтауэ Иорданием.

 

ЗИ ЗАКЪУЭУ ПСЭУ ДЫГЪЭ

Жэщым щIэсщ и унэ кIыфIым,

Iэбэрабэу, Дыгъэ:

«Ехьыж,– жи,– си пенсэ тIэкIур,

Згъаблэмэ уэздыгъэр».

 

ГЪУЖЫМ

Зыкъыщохъужыр бэлыхьлажьэ гуэру Гъужым,

Щытхъупсыр и щхьэм къебгъэжэхрэ,

И мыхъумыщIагъэр

Иумыгъэлъагъужым.

 

НЫБАБЛЭМ

ЩынэщIа къыпщохъур къумым,

Ар щедзакъэм деж лэкъумым.

 

ХЬЭЛАХЪУЭ И АРГУМЕНТ

Ди деж Путин къызэрыкIуэр

ЕщI ди фIэщ Хьэлахъуэ:

«Щат зэманыр къэмыс щIыкIэ,

Къыдатащ,– жи,– мазэм и улахуэр».

 

МАХЪШЭ ШУМ И ПЭЖ

Насып уимыIэмэ,

махъшэм утесми, хьэ къодзакъэ.

Адыгэ псалъэжьщ

«Къодзакъэр хьэр,– жи,–

Утесу щытми махъшэм,

Дэмылъу щытмэ уи гуфIакIэм

Бгыр джэдыкIэкIэ зыкъутэфыну ахъшэ».

 

УЛАХУЭМ ТЕУХУА «ЛЪАГЪУНЫГЪЭ»

Къэгубжьауэ, и щхьэгъусэм

БгъэдокIыжыр Нади:

«Сом минитхущ,– жи,– мазэм къихьыр

Си лIыжь цIыкIу Геннадий».

 

РЕВИЗОР МАРИНЭ

«Сыпхуейкъым» жери, ревизор Маринэ

ЩIехужыр и лIыр унэм башкIэ:

Пэжщ, езы Маринэ хуэдэу,

Iэхъуэ и лIыр еуэфыркъым шабашкIэ.

 

МЫЛЪКУМ ЩХЬЭКIЭ ЗЕУКIЫЖ

Гъавэ из хуэмыщIурэ

Абы и щIэншэ дум,

Псэууэ хэгъуащ и псэр

Нэпсеижь ПIытIум.

 

«ГУЭШЫКIЭ»

Ирагъэшхыр лыпцIэр

Зымыгъашхэм гуу.

Гуу зыгъашхэ хабзэм

Ирагъэшх рагу.

 

ХЭХАКIУЭМ И МАКЪ

«Хэтха нэужькIэ,

ЗытфIагъэкIуэдри,– жи Гъуэтыжым,–

Къэса нэужькIэ Iэ Iэтыгъуэр,

Абыхэм дэ дыкъагъуэтыжыр».

 

РИТЭРЭ МАРИТЭРЭ

И ныбжьэгъум зэгуэуду

Щодыхьэшхыр Ритэ:

Псым хыхьа нэужькIэ, и кIэр

ИIэтащ Маритэ.

 

БРИГАДИР ХЬЭЧИМ

ХъымпIар ящIыжкъым

Уафэ-псыхъуэр зэщIигъэсту кIийм:

И кIий макъым псори

Есэжащ бригадир Хьэчим.

 

КЪУЛЕИЖЬ ФАКЪЫРЭ КЪУЛЭ

Напи топи имыIэжу

Къэнащ къулеижьу щыт а Къулэ:

Къулейсыз Уэлий и деж ар кIуауэ,

ТабущхьэщкIэ йоуэкъулэ.

 

ЗЫЗЫГЪЭКЪУЛЕЙ КЪУЛЕЙСЫЗЫМ

«СиIэщ,– жи,– щIэрыпсу шинэ,

СимыIэу щытми сэ автомашинэ».

 

РЕЦЕНЗЕНТЫМ И ЕПЛЪЫКIЭ

«Си фIэщ хъуркъым,– жи,–

ПхагъэкIыну и трактатырТIатIэм:

Хигъэувакъым текстым,

ГукъэкI ищIу, Топтыгин генералым и цитатэ».

 

АРЕНДАТОР ГЪАЖЭМ

Зэпэзэву пцIы еупсыр

Арендатор Гъажэм:

«Си нартыхум щхьэц къыдедз»,– жи,–

КъимыщIауэ гъашэ».

 

БЫРЫМ И СЫБЫР

ЕукI хьэпцIащхъуэ и пцIым Бырым:

Банан къыщыкIыу тхьэ щеIуэж Сыбырым.

 

ФАРИЗЭТ

И бынунагъуэр махуэм зэригъашхэр зэт,

Бэзэрышхуэм бизнес щызыщI Фаризэт.

 

ЗЭЧЫРРЭ МУЗЭЧЫРРЭ

И лъатэр узми,

Стэчаныр игъэщIейт Зэчыр.

Фадэ уасэр къикIт и жыпым

ШабашкIэ еуэ Музэчыр.

 

НЫХЬЫМРЭ АБЫ И ГУЭНЫХЬЫМРЭ

ЩытыкIэ хьэлъэм итщ ихуауэ

Нобэ Ныхьыр:

ТIорысэ хъуауэ епшыныжыр

И щIалэгъуэм къилэжьа гуэныхьыр.

 

АДЭШХУЭМРЭ МУРАТРЭ

ИрещIэкI адэшхуэм

И къуэрылъхум той:

Псалъэухам Мурат

Хегъэувэфыр запятой.

 

МЭДЫХЬЭШХЫР ЗЕД

Мэдыхьэшхыр Зед:

«ПцIы зыупсми,– жи,–

«Пэж» фIищауэ, къыдегъэкI газет».

 

«АХЪШЭ ЛЪАГЪУНЫГЪЭ»

И хьэпшыпхэр къищтэжауэ,

«СокIыж»,– жеIэр Сарэ:

Махуэ къэскIэ унэм къихькъым

Ахъшэ Iэбизарэ.

 

IУЖАЖЭ ЛАМ И СЭЛАМ

Езым иIэжщ фIэхъус ехыкIэ Ламым:

Зи хьэмтетыгъуэхэрщ зрихыр и сэламыр.

 

«ХЪУЭЖЭ И КОМАНДИРОВКЭ»

«Къэсщэхун папщIэ

ХьэфIанэ зэралъ ир,

Къэхъуащ,– жи,–

СыщагъэкIуа Каир».

 

ЦИЦЭ И ИНВЕСТИЦЭ

«Сом мин хилъхьамэ,

И ныкъуэрщ къыхихыжыр Цицэ –

СытипкIэ,– жи бизнесмен Мурат,–

Апхуэдэ Цицэм сэ и инвестицэм!»

 

ТIУРЭ И «КУЛЬТУРЭ»

Зригъэужь и гугъэщ ТIурэ,

ПхъэнкIий къыхепхъэри нобэ ди культурэм.

 

ЖЭЩ ДИРЕКТОР

Хуеймэ – йофэ, хуеймэ – къофэ,

Хуеймэ – тоуэ, хуеймэ – къоуэ.

Хуеймэ – щIэсщ, хуеймэ – щIэлъщ –

Щхьэри лъакъуэри IэщIэлъщ.

 

КЪУЭШЫМ И ПЭЖ

«Уи шыдым фIэпщу щытми шы,

Ар шы пхуэхъункъым»,– жи Къуэшым.

 

БОМЖЫМРЭ АР ЗЫГЪЭБОМЖЫМРЭ

Хамэ пщIантIэм пщылI къалэныр

ЩегъэзащIэр Чим –

Махуэ къэскIэ зы бжьэ уасэ къыхуеший

ПщIантIэр зей Хьэчим.

 

ДЫГЪУАКIУИТI

ФIэмыхьэрэм къыфIидыгъуар

Къэралым ТIыхъуэм:

«Къэхъуащ,– жи,– нэхъ Iеижу ар

Сэ къыщызэдыгъуэ».

 

ЭКСПЕРТЫМ И ДЕРС

«Губзыгъэщ и гур,

Ефауэ щытми, Мусэ:

ЕщIэж мыIейуэ и цIэр

Зэрымы-Хьэжмусэр».

 

«ФАДЭ НЫБЖЬЭГЪУ»

Пичауэ, кIуэжкъым

И ныбжьэгъум и деж Бий:

Сымаджэ хъуауэ,

ЗыIуилъхьэжкъым фадэ Индэрбий.

 

КЪЭЩIЭРЕЙ И УСЭ

Мылъкуу мащIэ къыщIэкIынт

Къидыгъуар а Кумэ:

А цIыхубзым илъэс куэд

Къритащ хьэкумым.

 

МУТIЭ И ХОМУТ

ШыщIэ къамылъхум уанэ тезылъхьам

ТекIуэжащ а МутIэ:

Ныбэм илъ шыщIэм уанэ трилъхьэри,

ПщIэхилъхьэжащ хомутыр.

 

ДОХУТЫРЫМ И ЧЭНДЖЭЩ

«ФхэмыкIыжыну,

Къыхэфхынщ,– жи,– уз»,–

Телехъыбархэм куэдрэ демыплъыну.

Чэнджэщ къыдетыр Фардэус.

 

ДЗЫГЪУАНЭМ

Гъунэгъурэ гъуэншэджрэ.

Адыгэ псалъэжьщ

«Гъуэншэджхэми къахокIыр гъуанэ –

Си гъунэгъур гъуэншэджыну

Сыхуейкъым»,– жи Дзыгъуанэм.

 

АКАДЕМИК ХЬИД И ДЕРС

Мылъкум цIыхур жьгъей зэрищIыр

КъихутакIэщ Хьид:

«Нэхъ къулей хъуху,

КIэричырт»,– жи,– и адыгагъэм Муштэхьид».

 

СЫХУ И КЪУАЛЭБЗУ ПЫХУСЫХУ

«ДехъулIатэкъэ, къежьатэм,–

ЖеIэр ди гум къишхыдыкIыу Сыху,–

А коррупцэ куэдрэ зи гугъу ящIым

И псэр хиудыну бзухэм я пыхусыху».

 

МАХУЭМ И УПЩIЭ

«Микроскоп ухуей,– жи Махуэм,–

Убгъэдэту уеплъын щхьэкIэ

Щхьэдыкъуакъуэу Iуащхьэмахуэ?!»

 

МИЛИЦИОНЕРЫМ И ХЪУЭХЪУ

И зы Iэр IитIкIэ иубыдауэ,

И гъунэгъум йохъуэхъу

Милицэм хэт Джэрий: «Уи жэмыжь закъуэр

Ныжэбэ ядыгъуами,

Къэнащ,– жи,– псэууэ

Уи щхьэр, Матджэрий».

 

«ЗЭМАНЫМ ДЕКIУ» САТIУ

Калькуляторыр иIыгъыу

ТIум хелъхьэфыр тIу –

Техпрогрессым къыкIэрыхуу

Зибжыжыркъым СатIу.

 

ХУЭГЪЭВКЪЫМ БАМПIЭР ХЬИДЫМ

БлэкIа зэманыр игу къэкIыжмэ,

Iэл фIыцIэу къызокIуэкIыр Хьидыр:

«А бажэжьым и натIэм иукIащ,– жи,–

Къыслъыса ваучерым

КъысхущIэкIа «ВолгитIыр!»

 

ТIУМ ТIУ ХЭЗЫЛЪХЬЭФ ПIЫТIУ

КъригъэщIащи плIы зэрыхъур,

ТIум хэплъхьэу щытмэ тIу,

Я егъэджакIуэри игъэпсэлъэжкъым

Езанэ классым щеджэ а ПIытIу.

 

ОЛИГАРХ ЛИОНЫМ

Зегъэфакъырэ

Олигарх Лионым:

«Нэсакъым,– жи,– си доллар бжыгъэр

Иджыри триллионым».

 

ШУРЭ И РЕКЛАМЭ

Шыд шыгъу ишхрэ?!

Адыгэ псалъэжьщ

«Шыд ищэжыр

ЕгъэлъапIэ Шури:

«Хэплъыхь имыщI – фIэIэфIыпсу

Ешхыр,– жи,– шыугъэри мышури»

 

ХЪАН

Хъан хуэмейт,

Зэрихьэну цIэуэ Хъан:

«А «хъан» псалъэр хэжыхьауэ.

Хэтщ,– жи,– и цIэм Чингизхъан».

 

«ЕДЖАГЪЭШХУЭ» КЪАСЫМ

Чэф щиIэм деж, макъ дэгухэм фIэкIа

Зымыджа Къасым

Макъ жьгъыжьгъхэмкIэ къыхуоджэ лекцэ

Профессор Хьэжкъасым.

 

АУАН ЕЩIЫР КЪУАЖЭДЭСХЭР ЛИЙМ

Щодыхьэшхыр

Къуажэдэсхэм Лийр:

«Къулейсыз езыхэм защIри,– жи,–

Бей ящIащ я жылэм и уэлийр».

 

ДЫГЪЭМ

Тхьэм къыпхуищIэ

ФIыгъуэ нэхур:

ПщIэ тIумыхыу,

Дунеижьыр къогъэнэхур.

 

КIУЦЭ-БЗЭГУЦЭ

Уафэм сабэ дрепхъей,

Къэгубжьауэ КIуцэ:

Илъагъу псори иIуэтэжти,

КъыфIащащ бзэгуцэ.

 

ГЕНДИРЕКТОР МЫКЪЭ

Ещэж и «сотовэр»

Гендиректор Мыкъэ:

Апхуэдэ дыдэ къищэхуащ

И гъунэгъу Хьэмыкъэ.

 

ХЬЭБАШЭ И ПЭЖ

«ЦIывым (пщIыуэ щытмэ пашэ)

ТхьэмыщкIагъэми ухешэ»,– жи Хьэбашэ.

 

ДЭЛЭЛ МЕНТЫМ

«Пхурезгъэтхэнщ, къызэти ахъшэ,–

ЖеIэр дэлэл ментым,–

Узыхуей дыдэр мыхъур зыIыгъым

А уи документым».

 

ХЬЭБЫЖ

Къищэхуащи бгырыпх иту быж,

ЗегъэщIагъуэр щхьэщытхъужь Хьэбыж.

 

ГУМ ИЛЪЫР ФАДЭМ КЪРЕХУ

Гын-бжьыну къыщIэкIынт зэфар –

ИщIэжкъым зыри Музэфар.

 

«ЗЭМАНЫМ И ЛIЫХЪУЖЬ»

Iэ ижьымкIэ IуеIыгъэр

И тхьэкIумэм «сотэр»,

СэмэгумкIэ – еIуантIэр

И рулыр «шестисотэм».

 

КЪЕРБЭЧ И УПЩIЭ

«ХъуретI» псалъэр дахэ-дахэу хужымыIэ Лыхъуэм,

АтIэ, дауэ а Мысхьуд зэрагъэмэлыхъуэр?!»

 

КЪУЭНЫМ

Къулыкъушхуэ къратауэ

КъыщIэкIынущ Къуэным:

Зиущэхуащ, мыщэбзым хуэдэу,

И хабзэжкъым абы ныкъуэкъуэныр.

 

ДАУТРЭ ХЬЭЖДАУТРЭ

Диплому щы зэриIэм хуэдэу,

Къулыкъу къритыркъым Даут:

Мин зыбгъупщIу къыщIэкIынкъым

Къыхуигъэлъагъуэр Хьэждаут.

 

ГЕНДИРЕКТОР НОКЪУЭМ

ПхъэнкIий дэлъхэр дрегъэшыр

Завод пщIантIэм Нокъуэм:

Зэхихауэ къыщIэкIынущ,

КъакIуэуэ Къанокъуэр.

 

ТIИТIЭ И РЕПЕТИТОР

Къулейщи, здихьын имыщIэ

И ахъшэр ТIитIэ –

И шыдшыщIэжьым есэпымкIэ

Къыхуищтащ дыгъуасэ репетитор.

 

КОРРУПЦИОНЕРЫМ

Жэм лъакъуэ шкIэ иукIрэ?!

Адыгэ псалъэжьщ

ХъымпIар имыщI и бийхэр:

«Къысщыхуэ,–жи,– я нейр…

Коррупцэм «ебэныр»

Коррупционерщ».

 

ДЕКАНУ ЛАЖЬЭ ХЬИД

И ныбжьэгъум и сурэтыр

И пэш блыным

КъыфIехыжыр Хьид:

Нобэ махуэм щыщIэдзауэ

Ректорыжкъым Муштэхьид.

 

ХЬЭСИН И ФЫЗЫМ

ЖиIэурэ «си унэ кIуэцIым

Къестын хуейщ екIуу сэху»,

Мазищ нэсауэ

Хьэсин и фыз щхьэхынэм зегъэпсэху.

 

ДИНЭ

Къулыкъу гуэрым ещэу

КъыщIэкIынущ Динэ:

ЛъэIу тхылъ щIилъхьащ,

Хыхьэн мурадыр иIэуэ «Единэм»…

 

БЫХУ И ПЭЖ

«Къулыкъушхуэ къызатыным

Шэч хэмылът,– жи Быху,–

Сыщалъхуауэ щытыгъатэм,

Сэри Бытырбыху».

 

ФАДАФЭ ТIОРЭ И «МОРАТОРИЙ»

ХузэфIэкIкъым бжьэ емыфэу,

Тхьэ иIуами, ТIори:

Махуищ дегъэкIри, трехыж,

Трилъхьами, фадэм мораторий.

 

ПХЪЭIЭПЭ «ПЕДАГОГЫМ»

Къыптеувэхэр пхуэмыщI губзыгъэ,

Уеуэми я натIэм…–

Хэзмылъагъуэ сэ хъуапсэгъуэ

УзыIут IэнатIэм.

 

РОМ ЕФЭУ ЩЫТА РОМЭ

Ирифыжкъым Ромэ ром –

Щылажьэжу къыщIэкIынкъым ар политбюром.

 

ЗИ НЫБЭ ИЗ ХЪУАМ

ЗигъэнщIащи, йолъэпауэ

ЩIакхъуэ бзыгъэм –

ЗэрылъэкIкIэ къегъэлъагъуэ

Зэрымыгубзыгъэр.

 

СОНДЭДЖЭР ДЫДЖЭМ

Уасэр лъагэу дрихуейуэ,

Тетщ бэзэрым Дыджэр:

Джэдым нэхърэ нэхъ лъапIэжу

Ещэ и джэдыкIэр.

 

НАБДЗЭГУБДЗАПЛЪЭ БОРЭ

ХэуныкIар прихватизацэм

Къехутэр тыншу Борэ:

«Сщхьэрохур,– жи,– си пыIэр,

Сыдэплъея нэужькIэ и заборым».

 

ДЖЭШЫДЗЫМ

Едзри едз и джэшыр

Щхьэгурахъэ Лерэ:

Сыт имыщIэм къыхуимыкI,

Ишэуэ Валерэ.

 

ГЪУАМИТIЫМ

Мэхъу и жагъуэ гъуамэм гъуамэр,

Гъуамэр къакIуэу илъэгъуамэ.

 

ЛЪХУКЪУЭЛI ДУДАКЪЫМ

Ягъэшэсами шы пщIэгъуалэм,

И джатэр къримых Дудакъым:

Уанэгур хуиту

Абы иджыри иубыдакъым.

 

МАЛЪХЪЭ ГУМАЩIЭМ

Хуозэш Iей дыдэу ар и щыкъум:

Махуищ дэкIащ, яхуимытхьэщIу я хьэкъущыкъур.

 

ТIЫХЪУЭМ И ПЭЖ

Мыпхуэдэ дерс ищIащ

Уэчылу куэдрэ лэжьа ТIыхъуэм:

«Утету хабзэм, махуэ шэджагъуэми,

УхэмыщтыкIыу, хъунущ,– жи,– удыгъуэ».

 

ЖЬЭРЭIУРЭ ЗУРЭ

Псалъэ фIейкIэ еуцIэпIыр

Хьэуа къабзэр Зурэ:

ЩыIэн хуейуэ къилъытэжкъым

Напэм и цензурэ.

 

ЛЫХЪУЭМ

МащIэ мыгъуэщ къиубыдыр

И къэухьым Лыхъуэм:

Гъущэпсыщэу пцIы щаупсым

Пэжыр къыщелъыхъуэ.

 

УНАГЪУЭ ТЕРРОРИСТЫМ

«Ди Iэр едзыхауэ дыщигъэтщ,– жи Берд,–

Аркъэ фIыуэ ефэм,

Ди адэжь Биберд».

 

НАХЪУЭ И ПЭЖ

Зэгуэщэщу мэдыхьэшхыр

Куэд зи нэгу щIэкI Нахъуэ:

«Хэти етх,– жи,– къыхэкIауэ

Пщыжь-уэркъыжь унагъуэм».

 

ХЬЭМИД

«Сыщолажьэр,– жеIэр,– МИД-м»

МИД бжэIупэр къэзыпхъэнкI Хьэмидым.

 

ХЬЭГЪАПХЪЭ ЧЭРИМ

Тхьэ щеIуэж, дэтауэ Рим,

Рим пщIыхьэпIэу зылъэгъуа Чэрим.

 

«Р»-М

Iуэхутхьэбзэ

ХуэпщIэ хъунукъым «р»-м:

ЛъэгущIыхь уи щхьэфэр хуэпщIу щытми,

КъыбжимыIэну «афэрым».

 

КОЛОРАДО КЪИКIА ЦIЫВЫМ

Хуэдэщ мацIэм, хэтса кIэртIофыр,

ДыкIэрыщIауэ,

ТфIешхыр цIывым,–

«Еу-уей» псалъэр хужыдмыIэну,

Ер ихьэу щытми нобэ и пэнцIывым.

 

ШУРЭ И ПЭЖ

Зытеджалэр и былыму

ХьэкIэпычыр мэпсэуф,– жи Шурэ,–

И кIэм нэсу емыджами

ПIащIэ цIыкIуу зы брошюрэ».

 

ПРОКУРОРУ ЛАЖЬЭ ТIАКЪЫМ

Ебэнын коррупцэм

И мурадкъым ТIакъым:

«Си нэхъыщхьэм,– жи, – абыкIэ

Карт-бланш иджыри къызитакъым».

 

ХЬЭЛИМ И УПЩIЭ

Зэманым декIур лIыфIщ.

Адыгэ псалъэжьщ

«Зэманым декIур лIыфIу щытмэ,–

Прокурорым хуэдэу къыдоупщI Хьэлимыр,–

Здэфхьынур дэнэ,– жи,–

ИтIанэ подхалимыр?!»

 

ЩАКIУЭМ И ПЭЖ

«НэхъыфIщ уисыжмэ уи пIэм,–

ЖеIэр ЩакIуэм,–

УкIуэ нэхърэ

Акъыл зимыIэм и деж чэнджэщакIуэ».

 

ДИРЕКТОР МАЦЭ

«ТхьэмщIыгъуныбэр псынщIэу гъавэ»,–

ХуещI унафэ пщафIэм Мацэ,

Ревизорыр и деж къакIуэу

Къратащи информацэ.

 

КЪЫГУРЫМЫIУЭТ ЛЫКЪУЭ

Щихьэмтетыгъуэм

Сэлам езым кърах и гугъэт Лыкъуэ,

Щхьэщэшхуэ хуащIу,

ФIэхъус щрахым и деж и къулыкъум.

 

ХЬЭКIУРИЦЭ И НОСТАЛЬГИЕ

«ДыщыIусар нэхъыфIт,– жи,– дэ и Iуфэм Рицэ»,

Шэд Iуфэм Iусщи нобэ ХьэкIурицэ.

 

ДИРЕКТОРЫМРЭ АБЫ И ЩХЬЭГЪУСЭМРЭ

Заводым и унафэр

ЗыщIыр и фыз Женэт,

Езым ищIахэр –

Абы и приложенэт.

 

ДЫКЪУЭРЭ ЕЛБЭЗДЫКЪУЭРЭ

Нэпсей Дыкъуэ и къуэр

Къилъэтауэ хъужащ Дыкъуэ –

ФIамыщами хъунут

ЦIэуэ Елбэздыкъуэ.

 

МЕДАЛ «ТЫКIЭ»

Къэзыхьар медалыр

Жьэмей Далт –

Дал къагъанэри, медалыр

Иратащ хьэкIэпыч БетIал.

 

НАНЭ И «НАНОТЕХНОЛОГИЕ»

Игъэпсэлъэжкъым

Нанэм дадэр:

«Иджы щымыIэ,– жи,– дадэтехнологие,

ЩыIэм щыIэр НАНЭтехнологиещ».

 

ПЭЖ

Уи гуапэ хъуркъым,

IупскIэ ппIа уи джэдыр,

Хамэ джэдэщым

Плъагъумэ къыщIэджэду.

 

ДИН ЗИМЫIЭ СЭЛЭДИН

Ирехужыр и унагъуэр диным,

Iухуэу щытмэ фадэ, Сэлэдиным.

 

БАШ КЪУЭЛЭН ЗЫIЫГЪЫМ

Фо зезыхьэм Iуигъэхуам и фор –

Къыхуегъаблэр щхъуантIэу светофор.

 

ПЩАФIЭМ ИЩIА «ДАГЪУЭ»

Тхьэ щеIуэж компьютерым

ИмыIэну гъащIэ:

«Флъагъукъэ, хъуркъым,– жи,– абы

Лы гъур ирибгъажьэ»…

 

ГЪУБЖЭМ

Гукъыдэжышхуэ хуиIэжкъым

Гъубжэм хэным:

Иджыр къыздэсым зыми игу къэкIакъым

Ар Гинессым и тхылъым иритхэну.

 

ПIЫТIЭ ХЬЭЛЫНШЭ

СхутепIэ банэ

А и хьэлым ПIытIэ:

Iуэхутхьэбзэу пщIы хуэпщIар

Зы хуумыщIэжам щIрегъэпIытIэ.

 

ЖЬЭРЫIЭЗЭ IЭПЭ ЗАДЭМ

Щыпэмылъэщым и деж

И акъылыр ребусым,

Трелъхьэжыр ягъэр

Зэрыса троллейбусым.

 

IЭЩIАГЪЭНШЭМ

Иролажьэр белым, ломым –

Зыри къикIкъым къищэхуа дипломым.

 

САБЫР ЩIЭГЪЕЙМ И ХЬЭЛ

Бжьэ щидзамэ,

Ари мэхъур хъыжьэ:

БлэкIми, къыблэкIыжми кIэрохъыжьэ…

 

ВАКЪЭМ

Хьэр дзакъэрэ мыдзакъэрэ

Зэхимыхуауэ жеIэр вакъэм:

«Абы и кIэм,– жи,– иджыри къыздэсым,

Iуэху сщIыуэ, сэ сытеувакъым».

 

ХЬЭУЕЛЭ И ДЕРС

Дэтхэнэ псыми

Зэрымыхъунур уелъэ,

КъищIащ, псым епкIэ пэтрэ,

Псым хэпкIа Хьэуелэ.

 

БЮРОКРАТЫР МЭГУФIЭ

«КIэщIэтхыхь зи хабзэм,– жи,–

Хъуащ и Iэпэр шын,

НэгъуэщI мыхъуми, ар хъужыху,

Сэри сытыншынщ».

 

ПЫIЭЖЬЫНЭУ ЩЫТА ЖЬЫНЭ

ЩхьэритIэгъэжкъым, щхьэрихауэ

И пыIэр Жьынэ:

ЩхьэритIэгъэжмэ, къыфIащыжынущ

ЦIэуэ ПыIэжьынэ.

 

КЪУТКЪУС ЗЫХЬЫМ

Нэхъ къещтэ фIыщIэ къихьмэ,

Къуткъус Зыхьым:

И ныбэ изу шхауэ къэкIуа Зерэ,

Зэрымышхэнур

ФIыуэ ищIэу,

ШхэнкIэ хегъэзыхьыр.

 

СЭЧИНАТ-СААКАШВИЛИ

«Сыхыхьэнущ сэри «НАТО»-м»,–

И щхьэгъусэм

Къигъэгубжьмэ,

ЖеIэр Сэчинатым.

 

УАУЭ И ХЬЭЛ

Езэуам зыгуэрым Уауэ,

Тхьэ щеIуэж Уауэ, а зыгуэрыр

Япэ щIыкIэ езым къезэуауэ.

 

ПIЫТIЭ ЦIЫКIУМ

Хэтат нэгъаби –

Къратакъым фетэ –

Мы гъэм хыхьэн

Идакъым эстафетэм.

 

ПЫЖЬЫМРЭ КЪЭПЫЖЬЫМРЭ

Индыл лъэмыжым зэрижам щхьэкIэ,

ЗимыгъэщIагъуэми

Хъунут Пыжьми:

Апхуэдэ «лIыгъэ» зэрехьэфыр

МафIэгум илъу кърашэкI къэпыжьми.

 

БАЖЭЖЬ ХЬЭБАШЭ

И гугъу пщIымэ, мыхъу и фIэфI

И бажагъэм бажэм:

И бажагъэр къыщIэбгъэщу,

Ар къыщохъу Хьэбашэ.

 

КЪУЛЕИЖЬ ФАКЪЫРЭМ

Ахъшэр хъушэуэ зэриIэр

ЩIехъумэфыр Берым:

Тумэн щIыхуэхэр къыIех

ТхьэмыщкIэжь Зуберым.

 

ЗЫ НАТIЭМ ИС НИТIЫМ

«А тIум я Iуэхур

Сыту гугъу,– жи Гъуж: –

Зэрызэгъунэгъуу

Зэрымылъагъуж».

 

ГУЗЭВЭГЪУЭР КЪЫЛЪЫСАЩ

Шэхум хуэдэу пыкIащ и фэр

ПцIы зыупс зи хабзэу

Думэм депутату хаха ТIурэ:

Зэхихащ абы къежьауэ

Детектор –

ПцIыупсыр къызэрыщIагъэщ аппаратурэ.

 

ГУГЪАТ ЦIЭ ЛЪАПIЭР КЪЫФIАЩЫНУ

АЖЭЖЬ БОРИС

КъыфIащын щамыдэм цIэуэ «бардыр»,

Къэгубжьри, иупсыжащ абы и бакенбардыр.

 

КУЛИСУМ

«Блэр щахъу» жери,

Щылажьэжкъым СУ-м

Зытеджалэр зи былыму щыта Кулисум.

 

ПЦIЫУПС БИТ

И нэпситIыр къыщIэщэщу,

Мэдыхьэшхыр Бит:

Дэкум хуэдэу къигъэпцIащ

ПцIы зыупс Забит.

 

МЫХЪАН И ДЕРС

«Зэман утхъуами,– жи,–

Ущопсэуфыр, хуэдэу хъаным,

Зи хьэмтетыгъуэр

Уи кIуритIэхъаным».

 

ЗИ ЩIЫФЭР ШХЭ ТIЭХЪУМ

ЗэмытIэхъуж,

И щIыфэр шхэуэ щытми, ТIэхъур –

Ябгъэдыхьауэ,

Зи щIыфэр мышхэхэм йотIэхъур.

 

«ПРИХВАТИЗАЦЭ»

Къищэхуащ мэкъу пыпхъуэ БатIэ,

Мэкъу пыпхъуэм фIащри цIэуэ мэкъу Iэмбатэ.

 

НАПЭР МАГЪ ЗЭЩЫДЖЭУ

Магъри магъ, зэщыджэу, напэр,

Зритауэ къуэгъэнапIэм:

«Ахъшэ къралъхьамкIэ и IэмыщIэм

Сищэжащ,– жи,– сэ сызей Хьэмыщэм».

 

«СЫКРАНОВЩИКЩ» ЖЫЗЫIА ПIЫТIЭ

ЖиIар пэжщ а ПIытIэ –

Иролажьэ «краным»:

Пивэ ищэурэ, къихьащ

Ар телеэкраным.

 

ДЫЖЭМ

И ныбжь нэсами,

Губзыгъэ хъуакъым Дыжэр:

Къищтауэ маисэу щIэлъыкIа и джыдэр,

Зытес жыг къудамэр гуеудыжыр.

 

ПАГУЭ

МыщIалэжми,

Хабзэ мыщIэщ Пагуэ:

Хамэ унэм ар щIохьэфыр,

Уеблэм, накIуэпакIуэу.

 

МЫКЪУЭМРЭ МЭРЕМЫКЪУЭМРЭ

ЗэгъунэгъуитI я мэл бжыкIэ зыкъым.

Адыгэ псалъэжьщ

КъамышыкIэ екъум йоуэр Мыкъуэр,

Емыкъу зи хабзэм –Мэремыкъуэр.

 

ШЫМ И ХЪУЭХЪУ

«Тхьэм дищI пэIэщIэ,–

ЖеIэр шым,–

Фадэ ефэу делэ хъуам

Дэ и къамышым!»

 

ГУМЭМ И ПЭЖ

«Уи Iуэхур мыщIагъуэжу

Аращ,– жи Гумэм,–

Гуо макъыр зэхимыхыжу щытмэ уи тхьэкIумэм».

 

ХЬЭБИЙ И ЛЪЭIУ

КъыдолъэIур ди гъунэгъухэр

ДымыщIыну бий,

Зи гъунэгъури, зи жэрэгъури

Зыгъэбийуэ щIегъуэжа Хьэбий.

 

МИНИСТР НАЖМУДИН

И КЪУЭШ НЭХЪЫЖЬ ДИН

Е мыгъуапэ, е мыпщампIэ Дин.

Иропагэ и къулыкъум и къуэш Нажмудин.

 

ЗИ ХЬЭМТЕТЫГЪУЭУ ЩЫТА

ЗЫХЬЫМ И ЩХЬЭГЪУСЭМ

Аукцион иригъэкIуэкIт

И щхьэгъусэм Зыхьым:

Лъигъэст къулыкъу нэхъ лъагэр

Доллар нэхъыбэ Iулъхьэу къыхуэзыхьым.

 

ГУ МАХЭ ЗИIЭ ДАУТ

«Магъри магъ, зэщыджэу,

Илъэситху зи ныбжь Даут:

«Къысхуредз,– жи,– сэ и бзэгур

Си къуэш нэхъыщIэ Хьэждаут».

 

ПСОРИ КЪЫХУЭЩЭХУНУКЪЫМ

КОРРУПЦИОНЕРЫМ

(IУЛЪХЬЭ ЗЫТ ЗИ ХАБЗЭ ОЛИГАРХЫМ)

Портфель зыIыгъхэр къищэхуа нэужь,

ЩIэщхъушхуэ къыщыщIащ а КIакъым:

Ажал мыгъуэжьым деж кIуати,

Абы и деж и Iулъхьэр щыпхыкIакъым.

 

ПЦIЫУПСИТIЫМ

ПцIы щиупсым деж Талий,

Ину къепсырт Хьэталий.

 

ХЬЭЖ И ПЭЖ

Къебгъажьэр хабзэщ.

Адыгэ псалъэжьщ

«Пэжщ, къебгъажьэр зэрыхъур хабзэ,–

ЖеIэр этнографием

ФIыуэ щыгъуазэ Хьэжым,–

Къедгъажьэ псор хэдгъэхьэурэ,

Адыгэ хабзэр къуэдмылъхьэжым».

 

ОЛИГАРХ МЫХЬЫМ И УЭСЯТ

И IитIыр къыщIэхауэ кхъэм яхьыну,

ЙолъэIур и ныбжьэгъухэм Мыхьыр:

«Ирелъагъу,– жи,– къысхуэпсэлъахэм

А сыздэкIуэм зыри зэрызмыхьыр».

 

IУЖАЖЭХЭМ

КъащIа иужькIэ зэриблагъэр

А Iур зыIыгъ Мыщэм,

Гендиректор къулыкъу лъагэр

Къратащ е мыгъуапэу, е мыпщампIэу щыт Хьэмыщэ.

 

ГЕНДИРЕКТОР АЛИХЪАНРЭ

И КЪУЭДЗЭ ХЪАНРЭ

Идзащ, къиIэтри, Алихъаным Хъаныр:

Хъан ипкIэну и мурадт и пIэм Алихъаным.

 

ХЬЭЖЫСМЕЛ И ПЭЖ

«Дэтхэнэ зы зыIыгъри мел,

ЕгъэджакIуэ нэскъым»,– жи

Куэдым щыгъуазэ Хьэжысмел.

 

ЛУЦЭ И РЕЗОЛЮЦЭ

Иримыту Iулъхьэ,

И лъэIу тхылъымпIэм Цуцэ

Тридзакъым Луцэ

Резолюцэ –

СытипкIэ лъэщу, лъакъуэ зэбгъурыткIэ

Апхуэдэ Луцэм сэ и резолюцэм!

 

IИТIКIЭ СЭЛАМ ЕЗЫХЫУ ЩЫТА ЛАМ

ХеящIэхэм я Iэтащхьэу

Зэрагъэуврэ, зэIыхьащ и хьэлыр Лам:

Iэ сэмэгукIэ фIэкIа цIыхухэм

Ярихыжыркъым сэлам.

 

БЖИЙМ И ШЫБЖИЙ

«Сыхуейкъым» жери, сырым хуэдэ

Къищэхун имыдэ Бжийм:

«Срикъури, къыздэхуэжащ,– жи,–

Си фыз Iэнусэ къызита шыбжийм».

 

ХЪУМАКIУЭ-ДЫГЪУАКIУЭ ГЪУН

КъыIуокIыжыр, хуэмеижу,

И лэжьапIэм Гъун:

Ихъума пщIантIэшхуэм

Дэлъыжкъым зыри къидыгъун.

 

ЗЭМАНЫМ КЪЫКIЭРОХУР ГЪАЖЭ

И хьэсэпэм мащIэ мыгъуэщ

Къиубыдыр Гъажэм:

Кризисыр и пщIантIэм дигъэхьауэ,

Ирегъэлъэдэж и куэбжэм пхъэрыгъажэр.

 

АКЪЫЛ ЗИIЭМ

Акъыл зиIэм ищIкъым зэи бий,

КъекъуэншэкIыу щытми, зы сабий.

 

ТУРЭ И «АРХИТЕКТУРЭ»

И щIалэгъуэм хьэщпакъ

ЗыщIауэ щыта Турэ

«Дэри зыгуэр

ХыдощIыкIыр,– жи,– архитектурэм».

 

ДУНЕЙР ЗИ ЩЫПЭ ЛЪАГЪУМ

Тбилиси зымылъэгъуауэ щыт а Ули

Къалэшхуэ дыдэу къыщохъур Марнеули.

 

 

ЖЫГЪУЭМ И ЭКСПЕРИМЕНТ

ХъумпIэцIэджым и кIуэдыжыгъуэм

дамэ къытокIэ.

Адыгэ псалъэжьщ

«Си гъэунэхуныгъэми къигъэлъэгъуащ,– жи

Биолог Жыгъуэм,–

ХъумпIэцIэджым къызэрытекIэр дамэ,

Къэса нэужь абы и кIуэдыжыгъуэр».

 

ПЦIЫУПСЫМРЭ ПЭЖЫМ И ТЕЛЪХЬЭМРЭ

ЗэрыщIащ хьэIупс Бийрэ Мухьэрбийрэ:

ПцIы щиупсым и деж Бий,

Къекъурт абы и кIэстумыкIэм Мухьэрбий.

Марнеули – Грузием и райцентрщ.

 

МИН ЩИЩ ЗИIЭ САРЭ

«Сызытехуащ»,– жи–

Хуотхьэусыхэ Сарэ

Сомищ фIэкIа

ЗимыIэ Думэсарэ.

 

«БЭНАКIУЭ» НЫН

Ирауд бэнэнкIэ

зигъэнщIыркъым.

Адыгэ псалъэжьщ

Нобэр къэсыху абы текIуа

ЗэрыщымыIэр ищIэ пэтми, Нын,

Ерагъпсэрагъыу къотэджыжри,

ЩIедзэж щIэрыщIэу фадэм ебэнын.

 

СРЫКЪУЭМ И ГУБЖЬ

«СхузэфIэкIамэ,

Мы щIы фIыцIэжьым къыщIэсхыжынти,–

Къэгубжьауэ жеIэ Срыкъуэм,–

Мы дунеижь зэхавыхьар

Зэтес езгъэщIыжынт,

Къэзгъэхъужынти нартхэ Сосрыкъуэ».

 

НЭПСЕИЖЬЫМ

Зэхуелъэфэсри, зэхуелъэфэс –

Иримыкъу итIани мылъкукIэ Ижьыр –

Псы ипкIэ щхьэкIэ, из пхуэщIын

Зи лъащIэр щIэмытыж чеижьым?!

 

ТЫЖЫМ

Хуэмыфащэ

ХуэпщIыну тыгъэ Тыжым:

Гум къыбгъэдэкIыу хуэпщIа тыгъэхэр

Абы нэгъуэщIхэм яретыжыр.

 

IУЭРЫIУЭДЗ IЭМИН

Мэдыхьэшхри мэдыхьэшх

IуэрыIуэдз Iэмин:

«Къидыгъуа пщIэгъуалэм тесу

Бэзэрым кIуащ,– жи,– БырIэмин».

 

ПРОКУРОРЫМ И ЖЭУАП

«Сыубыд мыхъуну

Сэ и пщампIэр ТIыхъуэм:

Хабзэм тетущ,– жи,–

А зи гугъу фщIы ТIыхъуэр зэрыдыгъуэр».

 

ГЪАЩТЭМ И ПЭЖ

«Пыпхэри мыпыпхэ,– жеIэр Гъащтэм,–

Къуалэбзу нэхъ мыхъуми,

Имыгъащтэм».

 

ШЫДЫМ И АУАН

Шыд шыгъу ишхрэ?!

Адыгэ псалъэжьщ

Ауан ещIыр шыдым шыхъур:

«Ешхыр-, жи-, абы зэзмыпэса шыгъур».

 

БЫН ГЪЭКIУЭД ЛИНЭ

Къыщхьэщож, щаубым деж,

Ипхъу хьэлыншэм Линэ,

ИщIэж пэтми и «гъэфIэныр»

Зэрымымалинэр…

 

ЗИ ЖЬАКIЭР УЭСУ ТХЪУА ХЬЭМИД

«КъищIэнт,– жи,– а Думэм щIэс Борис

Къызэрызатыр ахъшэ самэ,

Си пенсэ тIэкIум къытемыкIыу

Зы мазэ закъуэ тезгъэсамэ».

 

ФIЫУЭ ШХА БУХГАЛТЕР ТIУРЭ

Ревизорым Iуэхутхьэбзэшхуэ

Къелъытэжыр къыхуищIауэ ТIурэ:

Iулъхьэр ахъшэу щыхуемытым,

ЗимыхъунщIэу, ар Iихащ натурэу.

 

«БАНАН ЛЪАГЪУНЫГЪЭ»

ПIытIэ цIыкIум хуещIыр IэплIэ ину Нанэ,

Къыхуишийуэ щытмэ нанэ и бананыр.

 

АЛГЕБРЭ ЗЫМЫЩIЭ УДЫМ

Алгебрэ зымыщIэ удым

Ирехъуэныр удым:

«Уэ умыщIэ,– жи,– а алгебрэ предметыр

БжэгъукIэ къраудым».

 

УНАФЭНШЭХЭМ

Япэ щIыкIэ ещI

Унафэр Iил.

Iил ищIа унафэр

Екъутэж итIанэ МэчрэIил.

 

ДАМЭЛЕЙМ И ПЭЖ

«Ухуэмей уиIэну

Ахъшэ лей,

Ахъшэ лейм зыкъом делэ

ИщIащ»,– жи Дамэлейм.

 

КЪУЭН И ПЭЖ

«Ди зы къуажэ лъэхъуэщ Iуэхур

ЩхьэщыкIау щытащ,– жи Къуэн,–

Къигъуэтыфри, ищIа щIэпхъэджагъэр

Арэзыуэ зи щхьэ фIэзыкъуэн».

 

УНАФЭЩI ТIЫПЩЫМ

ИутIыпщын имыдэ

Зы тIи тIыпщ:

ИутIыпщу щытмэ зы тIыр,

Адрейхэми жаIэнущ: «ДыутIыпщ!»

 

ПIЫТIЫМ

Узижагъуэн и махуэуэ жыIэщIэщ,

Къуэдзэ къулыкъум щIокъури, ПIытIыр:

Директор ПIатI унафэ къыхуищIамэ,

Iэгу пцIанэкIэ цыжьбанэри епIытIыр.

 

ЩIЫМ И ТХЬЭУСЫХЭ

«Гущэм хуэдэщ,

И пIэм икIыркъым си Iуэхур,

Сратыжыркъым сызейм –

«Уетщэжынущ» жари къысхуаIуэхур».

 

ДИНРЭ IЭУЛЭДИНРЭ

Дэр екъутэри, гугъу ехьу,

ЕуткIэпщIыр Дин.

Дин икъута дэм и купщIэр

Ешхыр Iэулэдин.

 

ДЖЭРПЭДЖЭЖЫМ

ЗэхыдощIэ,гугъу демыхьу,

Къэдыгъуа уи макъыр,

Ар къикIауэ зэрыщытыр

Хамэм и тэмакъым.

 

ДЖЭДУ ХЬЭЛ

Къиубыдамэ дзыгъуэр, къегъэлъагъуэр

Джэдум сценэ гуауэ:

Гъэр ищIар ишхын щIимыдзэ,

ЩыгуфIыкIыу, тIэкIу дэмыджэгуауэ.

 

УАТРЭ ЩЭЛЭУАТРЭ

ТхьэIухуд нэ закъуэу

Щытащ Уат,

ЩыдэмыкIуэм щыгъуэ

КъынтIэ-сынтIэжьу Щэлэуат.

 

КЪИЦIЫХУЖЫПАЩ ЧЭФЫНЭ

И гъунэгъум йоплъри,

«Мы си нэр нэжым…

Тхьэр согъэпцI,– жи,–

Уэ умы– Понэжым…»

 

ХЪАНРЭ ЗУЛИХЪАНРЭ

Башым хуэдэу игъэгъуащ и щхьэгъусэ Хъан:

ЗэщIех жьэшхуэ,

Хуэмыфащэ кърепэс

Хъаным Зулихъан.

 

ГЪУЭНШЭДЖИЩ ЗИIЭ ДЖЭРИЙРЭ

ЗЫ ГЪУЭНШЭДЖ ФIЭКIА ЗИМЫIЭ ХЪАНДЖЭРИЙРЭ

«ХьэгъуэлIыгъуэм срикIуэну,

Уи гъуэншэджыр къызэт»,– жи Джэрий,

ЕжэкIауэ и деж

Зы гъуэншэдж фIэкIа зимыIэ Хъанджэрий.

 

ДЖЭДУМ

«Сэри стетщ,– жи,– пащIэ» –

Игъэпсэлъэжыркъым

ПащIэшхуэ

ЗыгъэкIа ХьэхъупащIэр.

 

ПЩАФIЭМ И ХЪЫБАР ПЭЖ

«Лыр зэрыхъурэ лъапIэ,

Исхэм мы ди куейм,

Хуэмыхъуу, зратыжащ

КIэртIоф жьэрыкуейм».

 

ЗЫЗЫГЪЭГУСЭН ЗЫФIЭФI ХЬЭЛИЙ

Етта нэужькIэ упщIэ гуэр,

Жэуап къыдитыжын идэркъым Хьэлий:

«ФеупщI,– жи,– а фымыщIэмкIэ

Фи дотэ нэхуу Нурхьэлий».

 

ХЬИД

Итхын идэжкъым

Усэ Хьид:

«Тхылъ псо итхати,– жи,–

Щай къратакъым Муштэхьид».

 

ЛЭДИНРЭ IЭУЛЭДИНРЭ

«ЗумыгъэщIагъуэ куэдрэ,

Завод пщIантIэр къэзыпхъэнкI Лэдин:

Уэ лэжьакIуэ укъыщыкIуэм деж,

Сэ сыкъокIыж»,– жи

Заводым и хъумакIуэ Iэулэдин.

 

ФЫЗ ДЭУБЗЭ ЛЭН

Тхъупсыр кърекIыхыр

И щхьэгъусэм Лэн:

«Мазэм зэ схуепщэфI,– жи,–

Сэ абы дэлэн».

 

НАХЪУЭ И ПЭЖ

«Зи нэр вынду фIыцIэ Ленэ

ПхуэмыщIыну нагъуэ,

Минрэ цIэуэ фIэпщу щытми

Абы Дахэнагъуэ».

 

ФАДЭР ЗИ НЭРЫГЪ ЛЭХУ

Мэгъуагъуэ, мэхъущIэри мэщIатэ Лэху:

Фэнд ирафым ар хигъэкIыжащ,

И фызыжь цIыкIум ежьэурэ, и Iупэ ухуэлар

Дэп маскIэм хуэдэу ицIэлэху.

 

МЫШЭ И ПЭЖ

«Малъхъэдисрэ пэт,

Хэплъыхь ещIыр,– жеIэр Мышэ,–

Iумпэм ещIри зыхуэмейхэр,

Япэ къэсыр абы зыщIимышэ».

 

ДЭХЪУМ И ПЭЖ

«Къэсхутащ,– жи,– хьэлэмэтыр,

ТхьэкIумафIэ Дэхъум: –

Бзууэ щыIэхэм я макъыр

Къидыгъуащ бжэндэхъум».

 

КОРРУПЦЭМ «ЕБЭН» МЫХУЭ

Химыбжэну гъащIэм

Махуэр Мыхуэ,

Мин зы тIощIыр, икIэрауэ,

Iулъхьэу къыIумыхуэм.

 

ЩЫГЪЫН ХУЖЬ ЗЫЩЫГЪЫМ

КъыщIэкIынущ

И цIэр IейкIэ Iуну:

КъохьэлъэкIыр, зыгуэр хуумышиймэ,

Аркъудейуэ, мастэ къыпхиIуну.

 

СЫМАДЖЭЩЫМ ЩIЭЛЪА ЛИТ

Хьэлэмэтыр матэм илъу

Илъэгъуауэ еIуэтэжыр Лити:

«Щэхуу ещэр,– жи,– больничнэр

Тхьэпэлъытэ дохутыр Айболити».

 

IЭМАЛ ЗЫЩIЭ ДИН

«Пхъу ямышэ уиIэм, ар

Зэребгъэшэнур сощIэр,– жеIэр Дин,–

Апхуэдэ иIэти, машинэ телъхьэ хуищIри,

Иригъэшащ и пхъужьыр Мадудин».

 

ШЭЩIЭХУ МАШИНЭР ЗЫГЪЭЛАЖЬЭ ТIАСЭ

«Сэ сымыщIэ,– жеIэр ТIасэ,–

Къитын хуейкъым

ЗэикI ИТАР-ТАСС-м.»

 

РОМАН ЗИМЫIА РОМАН И «РОМАН»

Хуэмытха роман Романым:

И гугъат ар тетхыхьын имыIа романым.

 

ГАЗЕТЫМ ЕДЖА ЗЕДЫМ

ЕгъэщIагъуэри егъэщIагъуэ Зедым:

«Пэж гуэрхэр щитхи къохъури,– жи,–

Мы пцIы зыупс газетым».

 

ШОФЕРЫМ ДЭКIУА ЗАРЭ

Ету тредзэ

И лIым и гум Зарэ:

«Щытащ,– жи,– сэ къыстелIэу

Иджы министру лажьэ Iэбизарэ».

 

ЛАМЭ И РЕКЛАМЭ

Къэдмыщэхумэ, ди IэфракIэм

Дедзэкъэжыну щеIуэжыр Ламэ:

«Фщэху,– жи,– нанотехнологием тету

Ягъэвауэ щыт мы си хьэлIамэр».

 

МЭНРЭ СУЛИМЭНРЭ

Сулимэн къепсамэ,

«Упсэу!» жеIэр Мэн.

Мэныр къепсмэ, хьэтхым тесу

Псафэ кIуэну йохъуэхъу Сулимэн.

 

ЖЬЫНЭ ЧЭФ ЗИIЭМ И «ХЪУЭХЪУ»

КъыфIыдокIуэр хъуэхъум хъуэныр –

Иухами хъунут Жьынэ и хъуэхъуэныр.

 

ЕПЩЫКIУЗАНЭМ ЩЕДЖЭ САНЭ

ЗепIытI, зехуз, мэщатэ –

ЕГЭ-р итын хуейщ Санэ –

Къалэщхьэгуэжьу ар щогугъ

«Сотовэ» къыхуищэхуам Хьэсанэ.

 

КЪУЭН И ПЭЖ

ПыIэ зэфIэхьым и зэманым

Къелъытэр дыщыпсэууэ Къуэн:

«Бгъуэтынущ,– жи,– гъунэжу

Къулыкъум щхьэкIэ уи хьэдэм ебэкъуэн».

 

ВИЦЕ-ПРЕМЬЕР КЪАСЫМ

Унэ Хужьым щIэсхэм

Къуэш иIэххэу закъригъащIэркъым Къасым:

Къуажэ Iэхъуэущ зэрылажьэр

И къуэш нэхъыщIэ Хьэжкъасым.

 

СТАТИСТЫМ И ДЕРС

«Я бжыгъэр

Хэхъуэркъым губзыгъэм,

Илъэс къэсыху нэхъыбэ мэхъу,– жи,–

Я бжыгъэр зызыгъэгубзыгъэм».

 

НАУЭ

«Теплъи Iуплъи хъуркъым

ПцIанэу къэзыкIухьхэм Науэ:

Арыншауи дрокъу,– жи,–

Телеэкранхэм къихьэм упцIэнауэ».

 

IЭМИНАЛ И ПЭЖ

«Шыр, мэцIантхъуэри, мэджалэр,– жи,–

ЗэрыщIэлъу нал,

Абы и бгым ибгъэтIысхьэм

ЖьэIурыхухэ я къуэ а Инал».

 

КУЭД ЗИ НЭГУ ЩIЭКIА МЫЩIЭ И ДЕРС

«Уи Iуфэ-лъафэр къажыхьынущ

ХьэкIэпычхэм,– жеIэр МыщIэ,–

Къэрал мылъкур къралъхьауэ

Илъу щытмэ нобэ уи IэмыщIэм».

 

ДЖЭДУМ ХУЭГЪЭЗА УПЩIЭ

Уэ махуэ къэс

«Къызэт,– жыбоIэр,– лы,–»

Апхуэдиз ахъшэ

Къыздизбгъэхынур дэнэ, Угъурлы?!

 

ХЪАНРЭ IЭМЫРХЪАНРЭ

Хъан ( зэрицIэм щхьэкIэ Хъан)

Къыщохъужыр хъуауэ хъан:

Къыпэпсэлъэжуи имыдэну

И къуэш нэхъыжьу Iэмырхъан.

 

АРКЪЭМ ГЪЭРУ ИУБЫДА ПIЫТI

Ефауэ, бдзэжьей псым хэсхэм

Ящодыхьэшхыр ПIытIыр:

«Мыхэра,– жи,– хьэмбылухэмкIэ

КъагъапцIэурэ, гъэру къаубыдыр?»

 

ЩIЭНЫГЪЭХЭМ Я ДОКТОР ГЪУКIЭМ И ПЭЖ

«Дунейм и зэхэлъыкIэр

КъыпхуэмыщIэну,– жеIэр ГъукIэм,–

Укъиплъу щытмэ

Николай Сванидзе и нэгъуджэм».

 

ЮРЭ И ХЬЭЛ

Хьэлэмэтщ и хьэлыр

Усэ зытх а Юрэ:

ЩымыIэ оперэм,

ТIысауэ, хуетхыр увертюрэ.

 

ГЪУЭТЫЖЫМ И ПЭЖ

Псалъэ пэжхэр

И жьэм къыжьэдокI Гъуэтыжым:

«Псапэ умыщIахэр,

Си Iуэхущ,– жи,– бгъуэтыжым».

 

КЪЭЩIЭРЕЙ И УСЭ

Дунейр къутэу зэгъэжыхукIэ

Къамыхьыну лавр,

Зи гугъу ящIхэм, фIащу щытми

ЦIэуэ «бакалавр».

 

МЫХУЭ И ПЭЖ

«ЕгъэджакIуэхэр ямыгъэлажьэ,– жеIэр Мыхуэ.–

Ирагъэтх тхылъымпIэхэм ахэр къыдэмыхуэ».

 

МИЛЭРЭ МАМИЛЭРЭ

Къупщхьэ гуащэм хуэдэт Милэ,

Къыщимышэм ар Мамилэ.

 

КЪУЛЕЙ МЫЛЭ

Щодыхьэшхыжыр делэм Мылэ,

Пэшх ищIауэ абы и гъуэмылэр.

 

ДИРЕКТОР ЗЫХЬЭМ И ЛЭЖЬЭКIЭ

Дурэшым дегуэр гурэ псэкIэ лажьэр Зыхьэм,

Лъегъэсри жьантIэр фIыуэ бзэгу зезыхьэм.

 

СТУДЕНТ ТУТЫМ

МэхъущIэри мэщIатэ студент Тутыр:

«ЗэщIищтащ,– жи,– Iулъхьэм институтыр».

 

ХЕЯЩIЭМ И ДЕРС

ПыIэхуабафэ къуеплъыр боксер Штымым,

Иумыгъэлъагъуу щытмэ хузэфIэкIынур уи IэштIымым.

 

РИНЭ

ТIэпIу шха нэужькIэ, жеIэр зи ныбэ из хъуа Ринэ:

«ИIэт, дывгъэджэгут иджы викторинэ».

 

ЩЫЧЭФЫМ ЩЫГЪУЭ НЭРЫПЛЪЭР

ТЫГЪЭ ЗЫЩIА ХЬИД

Теужа нэужь и чэфыр,

«Сэри сиIэщ»,– жери,– «нитI»

КъыIехыжыр (щIегъуэжауэ),

И нэрыплъэр Леонид.

 

РИТЭРЭ МАРГАРИТЭРЭ

ЩIыхуи хьэхуи иритыжкъым

И гъунэгъум Ритэ:

Хьэхуу мастэкъуаншэ къритакъым,

ЕлъэIуауэ щытати Маргаритэ.

 

ДЫГЪУЭРАБЗ ПЫКЪУМ

МэгуIэжыр дыгъуэу еса

Пыкъур:

Къидыгъунут (къыхуэдыгъукъым)

Уафэ джабэм кIэрыт лэгъупыкъур.

 

ХЬИД И МУШТЭХЬИД

ЕгъэщIагъуэр IуэрыIуэдзхэ я къуэу

Педагогыу лажьэ Хьид:

«ТрагъэкIа нэужь директор къулыкъум,

ЦIыху хъужащ,– жи,–

Хьэ дзакъэным хуэдэу

Щыта Муштэхьид».

 

ЩХЬЭХЫНЭ ХЪУА ЧЭТЫМ

Хьэрычэт ищIэну

И мурадкъым Чэтым:

Къалэщхьэгуэжьу ар щогугъ

Уафэм къехыну берычэтым.

 

МЫЛЪКУМ ИГЪЭУДЭФАМ

ИбзыщIыжкъым зэрыпсэур,

ЖригъэIэуэ уей-уей:

КIэрахъуэкIэ, зигъэлIыхъулIыбжьэу,

Къохъур куэдрэ ар уафэм щыдэуей.

 

БЛЭР ГЪУЭМБЫМ КЪИЗЫШ ЛЕРЭ

И щхьэгъусэр зэIыхьауэ

Къелъытэжыр Лерэ:

«Шыбжий хэлъу зыгуэр ишхмэ,

Хуит сымыщIыу къопсыр,– жи,– Валерэ».

 

ЖАНТЕМЫР И РИТОРИЧЕСКЭ УПЩIЭ

«ЗэрысщIэжщи, акъыл щай и уасэ

ИмыIа Даут.

Къыздрихынур дэнэт,– жи,– акъыл

Абы и къуэжьу Хьэждаут?!»

 

ЗЭМЫГУЭГЪУИТIЫМ (УАТРЭ ЩЭЛЭУАТРЭ)

Щызэпсалъэм деж,

КъыпыткIурт зэз и бзэгум Уат –

ИрегъэкIыж и фызыр,

Хуэмышэчыжу, Щэлэуат.

 

УЭЛЭХЬИ, ПЭЖЫМ

Уи хьэм фIэпщ и цIэщ.

Адыгэ псалъэжьщ

Мыпхуэдэу щетх и усэм

Си ныбжьэгъужьу МыкIэ:

«Цыцэ и хьэм фIищащи, цIэуэ «Быцэ»,

Зыри абы «ЦуциккIэ» къемыджэ».

 

ШЫДЫМ

Шыдрэ пэт, илъэсым зэ мэфтрей.

Адыгэ псалъэжьщ

Шыдрэ пэт,

Иджы мэлажьэ тету НОТ-м:

Илъэс къэс щыфтрея махуэр, щIыпIэр

Къыщегъэлъагъуэр кIэщIу и блокнотым.

 

«ТIУ» КЪЭЗЫХЬУ ЩЫТА ЖЕНЭ И ИЗЛОЖЕНЭ

ДылъэIэсыжкъым и пэм Женэ:

Итхащ дыгъуасэ «щы» цIыкIукIэ изложенэ.

 

ОЛИГАРХЫМ

КъэдбжынкIэ хъунут,

Утехьэжауэ пэжым,

Сабий джанэншэхэм

Зебгъэхуэпэжым.

 

АХЪШЭРАЩ УНАФЭР ЗЫБГЪЭДЭЛЪЫР

Ахъшэ иIэт, имыIэу щытми дар,–

ЩIэхуащ консерваторием Мудар.

Дар иIэт, ахъшэншэу щытми,–

ЩIэхуакъым вузым Хьэжмудар.

 

ЗЭЧИЙ ЗИМЫIЭ МУЗЭЧИЙ

Бэзэрым кIуат,

Къищэхун мурадыр иIэуэ зэчий:

И гугъэт, хъуну ар къэпщэху

Ахъшэшхуэ зиIэ Музэчий.

 

МАНЕКЕН УНАФЭЩIЫМ

Къыдимыт жэуапу «да» е «нет» –

Ар къытхуэмыщIэ щIыщIагъэсыр,

Къратауэ

Iэхуитлъэхуиту кабинет.

 

ДИ ЖАГЪУЭ МЭХЪУР…

Ди жагъуэ мэхъур:

ХуэщIыркъым сурэт,

Сурэтым хуэдэу

Набдзэкъурашэ Жансурэт.

 

ЖЭБАГЪЫ И ПЭЖ

«Къысщохъу зыкъомым,– жи,–

Я вагъуэр уафэм хъуауэ иж:

Ирафрэ зы бжьэ, щIакхъуэм епэмыжым,

АфIэкI хъуащ ахэр зыми хуэмеиж».

 

ТАМЭМ И УПЩIЭ

ПыIэ щхьэрыхкIэ къедауэ демагогым

Ирет мыпхуэдэ упщIэ Тамэм:

«Ебгъэбэнынур хэт,– жи,– уэ коррупцэм,

Коррупцэм къэрал псори зэщIищтамэ?»

 

ЗЕДРЭ IЭБУЗЕДРЭ (IУЛЪХЬЭ IЫХЫКIЭ)

КъыIихкъым Iулъхьэр

ЗанщIэу судья Зед,

Щхьэщэшхуэ хуищIу емылъэIумэ

Ахъшэр зи жып къикIыну Iэбузед.

 

ХЬИДАН И ШЫДЫМ И ХЪУЭХЪУ

«Тхьэм тхуигъэузыншэ, тхуигъэпсэу

Ди нэхъыжьу мы Хьидан!

Тхьэм димыщIкIэ пэхуу щыIэр

Ещхь и шыдым Буридан!»

 

ЖЬЫНДУМ

Имыдэну и шыр цIыкIухэр

Ирагъэщхьу киндым:

Абы ахэр къыщохъужыр

Хуэдэу вундеркиндым.

 

ДЫГЪУЖЬ МЭЛЫХЪУЭ ЛЭТ

Дыгъужьым ишхар мыщэм щецIэлъ.

Адыгэ псалъэжьщ

Зэрыдыгъужьыр къегъэлъагъуэр Лэт:

ЩецIэлъ гъэлъэхъу ишхахэр хьэрэмыгъэншэ Къасболэт.

 

АКЪЫЛ ПХЭНЖ МЫЗЭ

Жылэм пщыхьэщхьэпэм

Пхъэ кърашмэ мэзым –

Мызэ ешэр мэзым

Пхъэр пщэдджыжь нэмэзым.

 

МЫТIУТIЭ

Къидыгъуа пщIэгъуалэм ар тотIысхьэ

ИрикIуэн и гугъэу дудэ 2 –

Дудэ – сабиибзэкIэ – жыжьэ

Сыту делэ, сыту щхьэпс

ХьэкIэпычхэ я къуэ а МытIутIэ!

 

МЫЛЪКУ ФIЭКIА НЭКУРЭ НАПIЭРЭ

ЗИМЫIЭЖЫМ И ПСАЛЪЭ

«Къызэтыт ахъшэ!

Апхуэдэ псалъэ сэри си бэщ,

ЗэрызбгъэщIынур сыт,– жи,–

Сэ а уи «спасибэр?!»

 

ХЬЭБЫЖ

Имытми едэ и бгырыпхым быж

ТхьэмыщкIэ былымхэ я къуэ а Хьэбыж.

 

НАМЭ И ПЭЖ

«Куэд щIат дунейм дызэрехыжрэ,–

ЖеIэр дунейм и пIалъэ зыщIэ Намэ,–

Ди адэжьхэм гугъэу диIэр

ЩIэиныфIу къытхуамыгъэнамэ».

 

ШЫНАГЪУЭ ЗЫКЪУЭЛЪ УНАФЭЩI МЫХУЭ

Iуимыхуну,

Iухупхъэ щыIэу щытми, Мыхуэ,–

Езыр мэгуфIэ, зыIут IэнатIэм

Фийуэ къыIуамыхумэ.

 

УПЩIЭ

Хъун гуэр хуищIауэ щытамэ

Къыщалъхуа и лъахэм,

Дэнэу пIэрэт и пэр здихьынур

Зэрымылъ пэ лъагэм?

 

НЭХЪУ И ПЭЖ

ЕкIуэкI кризисми нэфI-ней

Зэрихъэу къебжыр Нэхъу:

 «Абы,– жи,– унахэр нэхъри егъэунэ,

Унэхъуахэр нэхъри егъэунэхъу».

 

ГУГЪЭР – АДЭ ЩIЭИНЫФIЩ

Ди кIий-гуо макъыр

Зыхихакъым Дэгум.

Зыхихын ди гугъэщ

Иджы Батырдэгум.

 

TIАНЫМ И ДЕРС

Мыпхуэдэ дерс ищIащ

Педагогхэр зыгъэлажьэ ТIаным:

«Гъэсэным къещтэр шейтIан хьэл,

Игъасэу щытмэ ар шейтIаным».

 

ХЬЭМАСКIЭМ

ДыгъуакIуэ щыкIуэм деж,

ЗыIуимылъхьэу хъуркъым маскIэ:

КъацIыхур фIыуэ къалэм дэсхэм –

Ар прокурорым и хьэмаскIэщ.

 

БРАКОНЬЕР БЫЛУ

ЭлектротоккIэ

Бдзэжьей ещэ Былу

«ЗэрызбгъэщIынур сыт,– жи,–

Зепщыпщэжу хьэмбылур?!»

 

БОМЖЫМ И ГУКЪЕУЭ

«Думэм щIэсу олигарххэм щхьэкIэ

Зи Iэр гуфIэжу зыIэт Зинэ

Щхьэ къимыплъэрэ зэзакъуэ

Ер зэуа мы си потребкорзинэм?»

 

АБРАМОВИЧ РОМАН

Хъуни мылъкуу къыхэпхар

Псоми дыдей сферэм.

НэгъуэщI мыхъуми, къытхуэгъанэ

Дрибауэ хъуну атмосферэ.

 

УСАКIУЭ ЩIАЛЭ ДИН

КIыхьу фIэкIа тхэжкъым Дин:

КIэщIыу щытхэм щыгъуэ,

Гонорару мащIэт къылъигъэсыр

Газетым и редактор Заудин.

 

ЗИ ЩХЬЭР ПСЭУУЭ ПЫIЭ ЩЫЩIАМ

Щхьэр псэууэ пыIэ щыщIэркъым.

Адыгэ псалъэжьщ

Псэу щхьэкIэ и щхьэр,

Мыпсэу пэлъытэщ Iил:

Илъэс щIигъуауэ къеджэдыхь,

Щхьэрыгъыу и пыIэр МэчрэIил.

 

IЭХЪУАМБЭЖЬАКIЭКIЭ

ДЭР ЗЫКЪУТЭ МУСЭ

СощIэр Мусэ зыгъэ-Мусэр.

Мы-Мусэнут Мусэ,

Къуэш нэхъыжьу имыIамэ

Прокурор Хьэжмусэ.

 

ЧЭЗЫМ И ПЭЖ

«И зэраныр зым

ЦIыхуищэм

ЕкIынкIэ хъунщ»,– жи Чэзым.

 

ЗЭТIОЛЪХУЭНЫКЪУИТIЫМ

Унэ кIуэцIыр къипхъэнкIыну

И мурадкъым Дул:

«Хуейуэ щытмэ, кърепхъэнкI,– жи,–

КъэзыуцIэпIа Абдул».

 

МЫРЗЭРЭ БЕЙМЫРЗЭРЭ

КIуэн идэжкъым

И ныбжьэгъум и деж Мырзэ:

Нэпсеягъэм и къэпхъэным

ПэщIэхуащ Беймырзэ.

 

ГЪУАПЭМ И ПЭЖ

«Ебгъэлеяуэ пшэщIу щытмэ,–

ЖеIэр зыкъом зыщIэ Гъуапэм,–

«ДампIэ» макъ игъэIуу

Щызэпочыр кIапсэр и псыгъуапIэм».

 

МЫУЭ И ПЭЖ

«Зэманыр хъуащ апхуэдэу,–

ЖеIэр Мыуэ: –

Пэж гуэр щызекIуэм,

Хъуркъым пцIыи щыземыуэу».

 

ПЦIЫ УПСЫНЫР ЗИ ХАБЗЭ ХУАНЭ

ХуэIэзэ хъуащ пцIы упсыным Хуанэ:

ПцIым и кIапсэр

Щиухуэным деж,

Абы пэж тIэкIуи хеухуанэ.

 

КЪЫПЭМ

Хьэ самырым хуэдэу къыщIэкIащ

КъэхутакIуэу лажьэ Къыпэр:

Бажэм джэдыр зэришхар къищIащ

Джэдыц кIэрылъамкIэ и жьэпкъыпэм.

 

ФЕРМЕР МЫЛЭ И ГЪЭУНЭХУНЫГЪЭ

Мэкъумылэр мащIэм,

шкIащIэр шхэрей мэхъу.

Адыгэ псалъэжьщ

«Псалъэжьым жиIэр зэрыпэжыр

СпхыкIащ,– жи,– хьэкъыу Мылэ: –

Си шкIащIэ цIыкIухэм псынщIэу шхэн щIадзат,

Зэрыхъум хуэдэу мащIэ си мэкъумылэр».

 

IУГЪЭ-ЛЫГЪЭМ

КъыпщIидзэнкIэ хъунущ лыгъэ:

МафIэм хуэдэщ и бзэр Iугъэ-лыгъэм.

 

ХЪУПЫМ

ЩиIауэ гъащIэм зэманыгъуэ

Къебжыжыр нобэ Хъупым:

«Сэ сиIэбащ,– жи,– Iэджэрэ

Лэпс щIэту лы гъэва зэрылъ лэгъупым».

 

МЭТ И «ЛЪАГЪУНЫГЪЭ»

«Си псэм хуэдэу, си ныбжьэгъур

Солъагъу»,– жеIэр Мэт,

ФIишхыжу щысщи, зыIурыбзаеу,

И джэдыл Iыхьэр Чэлимэт.

 

МЫСТХЭ ДАУДИЙ

Щыпсалъэм деж

ЖиIэ щхьэкIэ «ди»,–

КърихуэкIыр и щхьэ Iуэхущ

Мыстхэ Даудий.

 

ПАЩIЭ ЗЫГЪЭКIЫМ

Щай фIыцIэжь и уасэкъым

ПIийуэ пащIэ бгъэкIыр,

Бжьынэ зэрынар

ПхузэрымыгъэкIым.

 

ПIЫРЭ

ЩищIалэгъуами

Щытакъым щIагъуэу ПIырэ:

Дэтащ уэрамым,

Джэгуу пхъэ цIампIырэ.

 

БЗАДЖЭНАДЖЭМ

Iуэхутхьэбзэ хуэпщIэу щытмэ,

ЩIиудынщ уи накIэр –

ПщIэ гуэр и дежым къыщыпхьыну

Ущымыгугъыт зэи бзаджэнаджэм.

 

ЦЫКIУЭКIЫМ

Ущытынут и псэм урихъуахуэу,

ЛэжьакIуэу уриIатэм

Бюрократ Джэрэзым:

Бзэпсым хуэдэу, узыIыгъым и Iэпэм,

«Хурсэ» макъ ебгъэщIу,

Укъыдоджэрэзыр.

 

ПЫПХЭМ

Хуэгузавэу тлъагъукъым зыми,

И мыхабзэ кIуэуэ жэнэзыми.

 

ЦИЦЭМ И ЧЭНДЖЭЩ

«Зыдебгъэхьэхыу мылъкум,–

ЖеIэр Цицэм,–

Ахъшэ хэплъхьэми,

Хыумылъхьэ уи щхьэр инвестицэм».

 

ЦИНЭ И «ВАКЦИНЭ»

Зыгуэр игъэхъужауэ къытхуэщIэжкъым.

ЖьэрыIэзэ Iэпэ задэ Цинэ –

Дыуэ-дыуэпсу къыщIэкIынущ

Зи гугъу тщIы Цинэ и «вакцинэр».

 

БЭДЖЫМРЭ ТИНЭРЭ

Бэджым теплъи– Iуплъи хъуркъым Тинэ:

Зэрыщхьэхынэр сэтей къещIыр,

ХудещIыхьри и пэш плIанэпэм

ГъэщIэрэщIауэ «паутинэ».

 

МЭТ

Жьым тесу псым зэрепыджым щхьэкIэ

Къулыкъу лъагэм кърадзыха Мэт

Къыхуэнэжащ и ныбжьэгъужьу

Iумпэм ищIауэ щыта Чэлимэт.

 

ХЬУД И ПЭЖ

«ЩIэпхъэджагъэ злэжьу щытми,

Къысхуэгъунут,– жеIэр Хьуд,–

Ситатэм и пIэм

Парламентым и депутат Мысхьуд».

 

ЗЕДЫМ

Дуней гуфIэгъуэр иIэщ

Хейм и телъхьэ Зедым:

Зи мыIуэху зезыхуэм и щхьэм баш ихуауэ

Къытехуащ районым и газетым.

 

КЪАСЫМ И ХЬЭЖКЪАСЫМ

МэгъумэтIымэр гъущI мастэ зиIэу

ГъущI куэбжэ зимыIэ Къасым:

«Жылэр зыхуегъэпсалъэ,– жи,–

ГъущI мастэ щхьэкIэ,

ГъущI куэбжэ зиIэ Хьэжкъасым».

 

ГУ ЗЫКIУЭЦIЫМЫЛЪ «ХЕЯЩIЭ» СИБЭ

ИригъэщIа нэужь

И унэр пщIэншэу, судья Сибэ

ИгъэпщылIахэм жриIэжакъым

КъызэрыгуэкI «спасибэр».

 

ДИНРЭ СЭЛЭДИНРЭ

ЩIэпщхьащ занщIэу

ГъуэлъыпIэ щIагъым Дин:

Щхьэгъубжэм дэплъри, къилъэгъуат,

И деж къакIуэу

Ахъшэ щIыхуэ зритыжын хуей Сэлэдин.

 

ЗИ ХУЩХЬЭ ХЪУМ Я БЗУР

Къимылъэтыхь –

Исыжщ и гъуэмбым Зур:

ЩIымахуэм деж

Ар зыми и мыбзу.

 

ШУРЭ ЗЭМАНШУРЭ

И псалъэм шыгъу хидзэну

Чэнджэщ къретыр Шу,

Мышу щыжиIэм деж

Хэвыхь зи хабзэ Зэманшу.

 

ХЬЭХЫМ И ПЭЖ

Бюрократым

Щодыхьэшхыр Хьэхыр:

«Абы,– жи,– докладхэр щитхым деж,

И пIэм ису,

Бжыгъэ зыхуейхэр, доIэбейри,

Унащхьэм тыншу кърехьэхыр».

 

МУРАТ И ФIЭГЪЭНАПIЭ

Еджэн идэжыркъым Мурат:

«Еджами, емыджами

А «щы» цIыкIур хуегъэув,– жи,–

Ди егъэджакIуэ Хьэжмурат».

 

СТУДЕНТ ХЬЭСБИЙ ГУ ЗЫЛЪИТАМ

«ЗэбгъэщIами «тхукIэ»,

Пхуегъэувыр «тIу»,

КIэщIумыдзэм ахъшэ

А доцент ПIытIу».

 

ДОКТОР МАТIРЭ СТУДЕНТ ПIАТIРЭ

НэбгъузкIэ къоплъыр

МатIыр ПIатIым:

Студентхэр щысу,

ПIатI сэтей къищIащ

МатIым хищIыкIыр зэрымащIэр

Сопроматым.

 

МУЩТЭФА И «ЕПЛЪЫКIЭ»

«Сыхуейкъым,– жи,–

Слъагъуну фар»

Фар зи жагъуэ

Мущтэфа.

 

IЭДЭБ ЖАНРЭ ЖЬЭ

ДЖАТЭ КУЛИЖАНРЭ

Емыпсалъэ

Кулижаным Жан:

Жаныр хуейкъым къитIэщIыну

И жьэр Кулижан.

 

БОЛЭТ И «ПЕДАГОГИКЭ»

Ефэм, зауэм, фыщIэм, дыгъуэм,

И къуэ закъуэм къыщхьэщож Болэт:

«ЩIалэщ, делэщ,– жи,– иджыри

Си псэ закъуэр зышхын Къасболэт».

 

БАДЗЭМ ИГУ ХОЩI

Гъынанэу тесщ

Щхьэгъубжэ дапхъэм бадзэр:

«Бжьэвейм сримыуасэу къызжиIащ,– жи,–

Мобы фIэкIа номыр зимыIэ Бацэ».

 

БЫЦЭРЭ АБЫ И КЪУЭ ЛЪЭБЫЦЭРЭ

Щисабиигъуэм

ДригъэкIуеяуэ щытащ ар и щхьэм Быцэ.

Иджы, ин хъуащи, а зытес лъагапIэм

Быцэ къыхуехухыжыркъым Лъэбыцэ.

 

АЛИЙ IУГЪУЭ ИЩIА «ЖИГУЛИ»

Тутыну ирифам ахъшэу тригъэсхьар

Къибжыжати, мыпхуэдэ дерс ищIащ Алий:

«АбыкIэ,– жи,– шэч лъэпкъ хэмылъу,

Хуиту къэсщэхуфынут «Жигули».

 

АПТЕКЭМ ЩIЭТ МЭЛЫМ

Мэлыр щIэтщ, щызехущыхь

Хущхьэ-щатэуэ аптекэм:

ЗэIепщIыкI цырыцу (зыгуэрхэр къищIэ хуэдэу)

Хущхъуэ щIэлъхэр

Зэрыт картотекэр.

 

МУЛХЬЭБА И ПЭЖ

«Лицензэ зытым

Щэней хуэтщIын хуейщ и лъэм ба!» –

МэкIий-мэгуо

ЕджапIэм и директор Мулхьэба.

 

ХАМЭШЫМ ТЕС ШУУЕЙМ

«Тесын и фIэфIщ

Хамэшым Багъым:

«Абы щIиудкъым,– жи,–

Сыхуэсакъыпэу схъумэ си щIыбагъыр».

 

ФЕРМЕР ХЬЭМТIЫКЪ

Iуэм итащ, игъашхэу танэ, –

Яритакъым

И бын цIыкIухэм

Яхуэфащэ воспитанэ.

 

КЪУЭ БАЛИГЪ ЗИIЭ НОСОВЫМ

Къищтауэ хьэнцэ,

Третхъуэ бзаджэр школым Носов:

«Уи зэранкIэ хъуакъым,– жи,–

Си бын Iущыцэр хъуну Ломоносов».

 

ЗЫХЬЭМ И УПЩIЭ

Фо зезыхьэ и Iэпэ йобзей.

Адыгэ псалъэжьщ

«И Iэпэм емыбзей фи гугъэ,–

КъыдоупщI РУБОП-м и полковник Зыхьэр,–

Нацпроектым и IуэхущIафэхэр

Иджыпсту зезыхьэр?!»

 

МЭГУФIЭ АДЭР…

МэгуфIэ адэр, балигъ хъуауэ

ЗэриIэм щхьэкIэ зы къуэ.

И насыпти, къуэ тэмэм иIамэ.

ИIэщ къуэ,

И пыIэр лъахъшэу

И щхьэм щхьэрызыкъуэ.

 

ГУ КЪАБЗЭ ЖАНРЭ

ФЫГЪУЭНЭД КУЛИЖАНРЭ

Тригъаплъэркъым къищэхухэм

И гъунэгъур Жан:

Дагъуэ гуэрхэр къыхуищIынущ

Къищэхуа хьэпшыпхэм Кулижан.

 

МЭЛ КУЭД ЗИIЭ БОТ

Игу пымыкI къыхуэкIуэ хьэщIэм

ХуиукIыну ныш –

Ныш зыукIыу Бот езыгъэшхахэм

Ишха нышыр Бот кърахъуэныж.

 

БЭЧРЭ ЛЪОСТЭНБЭЧРЭ

ЗАГС-м щылажьэ Лъостэнбэч

ЖреIэ щэхуу и адэ Бэч:

«Апхуэдэ тхылъ ухуейуэ щытмэ,

Пхуезгъэтхынщ, урикъуэу Лъостэнбэч».

 

НЭХУ И ЖАНСИНЭХУ

И нэпситIыр щIиутхыкIыу,

Мэдыхьэшхыр Нэху:

«НалогхэмкIэ инспекцэм я Iэтащхьэ

СащIати, си адэ шыпхъуу зэрыщытыр

КъищIэжащ,– жи,– нобэ Жансинэху».

 

ЗАУРБИЙ И «ЛЪАГЪУНЫГЪЭ»

Заурбий и адэ Бий нэхърэ нэхъыфIу

Елъагъур и ныбжьэгъуу Хьэсэнбий:

Заурбий иIыгъ къулыкъур къезытар,

Пэжым фыхуеймэ, Бийкъым – Хьэсэнбийщ.

 

МУЗЭЧЫР И ЗЭЧЫР

ЩыщIалэм щыгъуэ и пщIыхьэпIэм

Къыхэхуакъым жиIэну зэчыр,

Иджы, жьы дыдэ хъуащи,

Кърешыр и зэчырыр Музэчыр.

 

ВУНДЕРКИНД КИНДЫМРЭ

ЗЫЗЫГЪЭВУНДЕРКИНДЫМРЭ

Киндерсюрприз зэхьэзэхуэм

Къыщихьащи, киндым

«Иджы къысщыхуэ,– жи,– и ней

Сюрприз къудей къэзымыхьыфа

А зызыгъэвундеркиндым!»

 

ОЛИГАРХЫМ И «ЕПЛЪЫКIЭ»

«Уи мыпщIантIэпскIэ къэлэжьа хъуа ахъшэм

(Абы хэлъыжкъым зыри щэху),

Хамэ къэралым укIуэуэ,

Хъунущ,– жи,–

Топджэгу командэ «Челси» кърипщэху».

 

ЗЕГЪЭЗЭХУЭЖЫР ПЦIЫУПС МУХЬЭЖИД

«Къэздыгъуатэкъым,– жи,–

Зэуэ шитI»,–

И хуэмыхуагъкIэ ягъэтIысауэ,

Тхьэлъанэ ещIыр Мухьэжид.

 

ЦИНЭ И БАБЫЦИНЭ

Нахуэ хъуащ

И щэхур Цинэ,

Иригъэзри ар

Микрофоным хуэдэ Бабыцинэ.

 

ФАДЭМ ИТХЬЭКЪУА ХЬЭБАС

Къыщохъу квадратыр

Ебгъэлъагъуу щимэу,

БгъэтIысрэ уи гъунэгъуу,

Хьэбасыр зэрефэм щхьэкIэ буущиймэ.

 

ЩХЬЭХЫНЭ ХЪУА НЭХУ

Щхьэхынэ хъуащ

ЕплIанэ классым щеджэ Нэху:

Псы зэфэн къригъэхьыну,

Сенэм егъакIуэ и анэ Жансинэху.

 

ХЬЭЛIАМЭ ГЪЭВЭКIЭ ЗЫМЫЩIЭ БЭЧ

И ныбжьэгъур ауан ещIыр Бэч:

Хуэмыгъавэ,– жи,– хьэлIамэ

ЖьэрыIэзэ Iэпэ задэ Батырбэч».

 

КЪАСБОЛЭТ И КЪУЭ ЛЭТ

ПцIы упсынкIэ пщIэ жыхуаIэр

Къытенакъым Лэт:

Тхьэ щеIуэжыр ислъэмей ищIауэ,

Щауэ щрашыжым Къасболэт.

 

НЭГЪУЭЩIХЭМ Я АКЪЫЛКIЭ ПСЭУ МЫЖЬЭ

Лажьэ зимыIэ щIалэм

Бгъэдыхьэри тежьащи, Мыжьэ:

«Псори тежьэти, хъуакъым,– жи,–

Сэри а Хьэмидым сытемыжьэу».

 

ГУБЗЫГЪЭ ТХУЭЩIКЪЫМ…

Губзыгъэ тхуэщIкъым,

Сыт дымыщIэм, Дыжыр:

Тутыным тфIекъуурэ,

И узыншагъэм джабэу иIэр

НикотинкIэ щIеудыжыр.

 

ДЗЫГЪУАНЭМ

Хьэрэмым и щIэр гъуанэщ.

Адыгэ псалъэжьщ

Зэгуэуду

Мэдыхьэшх Дзыгъуанэр:

 «Кризисми къигъэлъэгъуащ,– жи,–

Хьэрэмым и щIэр зэрыгъуанэр».

 

ЮРИСТ ТIОРЭ И ПЭЖ

Тачри таури жрегъыIэ

Хабзэ щыIэм ирилажьэ ТIори:

«ЯукIхэр нэхъыбэ хъуащ,– жи,–

ЗыукIахэр укIыжыным

Тралъхьа нэужькIэ мораторий».

 

ИНСПЕКТОРЫМ И УПЩIЭ

КъоупщI инспекторыр

КъэкIухьлъакъуэ хъуа Батий:

«Узыгъэсар хэт,– жи,– ущыцIыкIум

Дахэ-дахэу пщIыфу лъабэдий?»

 

ПЭЛЪЭЩКЪЫМ И ЗЭФIЭКIЫР

Иксым и пIэкIэ

Хагъэуващи зэт,

Къегъэлъей – хуэщIыжкъым уравненэр

Накъэ-дыкъэу Iэбузед.

 

ДУНЕЙМ ПЫПХЭУ ТЕМЫТ ЛАЦЭ И ПЭЖ

Льготэр ахъшэ щIащIыжар

Тэмэм дыдэу ещIэр Лацэ:

«Ар,– жи,– и дзэм (ахъшэм хуэдэу)

Хуэшхыркъым инфляцэм».

 

ЩХЬЭЩЫТХЪУМ

Щхьэусыгъуэ иIэщ

Зыщытхъуж а Хъужым:

Къыщытхъун игъуэткъым,

И щхьэм щымытхъужым.

 

МЭН И АУАН

Мэдыхьэшхыр зэгуэуду Мэн:

Мунафикъми нэмэз ещIыр – зегъэмуслъымэн.

 

ДЭРБЗЭР IЭЩIАГЪЭ ЗИIЭ НЫСАЩIЭР

«Дэрбзэрщ –

Хъарзынэ дыдэу мадэ –

Сигъэдэнукъым» жери,

ЩогуфIыкIыр

Къаша нысащIэр и тхьэмадэм.

 

ХЪЫДЖЭБЗЫЖЬЫР МЭХЪУЩIЭРИ

МЭЩIАТЭ

МэхъущIэри мэщIатэр

Къыдэнэжауэ дэса Рири:

«Сашэн хуей хъуати,– жи,–

Мы дунеишхуэм текIыжащ дарийри…»

 

ТЕЛЕФОН ДЫГЪУМ

Тутнакъ дерсыр Мац и дежкIэ

ИкъукIэ «щхьэпэ» хъуащ:

Дуней хуитым къытехьэжри,

«Сотовэ» аргуэру къидыгъуащ.

 

ЖЬЭРЫIЭЗЭ IЭПЭ ЗАДЭ ХЪУАМ

Лажьэурэ

Жэщи махуи жьэкIэ,

Iуэхуншэ хъуа и IитIыр

Щигъэужащ лэжьэкIэм.

 

ЦIЭ «ФIЭЩЫКIЭ»

ЦIэ лъапIэр, зэрыхуэфащэм хуэдэу,

КъыфIащкъым Багъым –

ПхызыгъэкIын и Iуэхур

Къыдэткъым и щIыбагъым.

 

БОМЖЫМ И ГЪУМЭТIЫМЭ

«Жьыр къыщепщэр къищIэнт,– жи,–

Депутату Думэм щIэс а Зинэ,

Мазэ закъуэ тезгъэсатэм,

Си «шхыныгъуэр» къызэрыкI «корзинэм».

 

КЪЭПЩЫТАКIУЭ Ю.

Си щхьэфэцым зрисат,– жи

КъэпщытакIуэ «Ю»-м,–

Япэ дыдэу сыщеплъам

Олигарх Абрамым и менюм».

 

БЫХУЭ И ПЭЖ

Зи мыIуэху зезыхуэм

и щхьэм баш къихуэнщ

Адыгэ псалъэжьщ

«Тобэ! Тобэ! –

ЕгъэщIагъуэр Быхуэ:

Зи мыIуэху зезыхуэм

И щхьэм баш къимыхуэ…»

 

МЭГУIЭЖЫР ТЕНЭР

«Си телевизорым зыкъом

Къезгъэубыдати,– жеIэр Тенэм,–

Щытамэ тету адыгэм

И иужьрей акъылым и антеннэ».

 

НАЩ И ТХЬЭУСЫХЭ

«Куэдыщэм пцIы яупсри,–

Мэтхьэусыхэ пэжыр

Зи щIасэ Нащ,–

Зыри си фIэщ мыхъужу сыкъэнащ».

 

ЗИ ГУР КЪАБЗЭ ЗЫБЭ

Уафэм сабэр дрепхъей

Зи гур къабзэ Зыбэ:

 «Интернетри ящIыжащ,– жи,–

ПхъэнкIиижь идзыпIэ!»

 

МЭРЫМ ЕIУЯЩIЭМ ХУИIЭ ЛЪЭIУ

«Уэрам гъуэгум мывэ телъхэр

ЩытумыдзкIэ,–

ЙолъэIу мэрыр щхьэщэ ищIу Мыцэ,–

Темылъахэр, гугъу зебгъэхьу,

Къэпхьу къытумыдзэ».

 

МОЦЭ И ПЭЖ (ДЕРС)

«Ауэ сытми емыкIушхуэ къуигъэхьыну,–

ЖеIэр психологиер хъарзынэу зыщIэ Моцэ,–

И шхуэмылакIэр бутIыпщмэ

Шы емылыджым хуэдэ уи эмоцэм».

 

ФУТБОЛИСТУ ЩЫТА ТIОПIЭ

Бригадир ящIами,

Имыхъуэж и хъэтIыр ТIопIэм:

Игъэлажьэ цIыхухэр кърехуэкIыр,

Хуэдэу хьэфэ топым.

 

КЪАЛЭ МЭРЫМ И ЖЭУАП

«Зи гугъу пщIы пэшыр

КIэрыпщIыхьми содэр

УзыщIэс уи унэм,

КIэрумыщIыхь закъуи

Ар си Iупэм,

Ныбжьэгъу АфIэунэ».

 

НЭФ КЪЭПЛЪЭЖА МАРЭ И «ПЛЪЭКIЭ»

И пащхьэ нэхум зэритым хуэдэу,

И Iыхьлыми, къулейсызыр

Илъагъукъым Марэ.

Жыжьэу щытми,

Зэрихамэу,

Елъагъур фIыуэ къулеижь Тамарэ.

 

КЪУЭРЫЛЪХУ УГЪУРЛЫМ

ЕгъэгуфIэр и къуэм и къуэм Сашэ:

«Ухэплъэнущ,– жи,– си дадэр

Си къуэм сэ и къуэжым

И нысашэм».

 

НЭ ЖАНРЭ АКЪЫЛ ЖАНРЭ ЗИIЭ ДЫЖЫМ

ЕкIуэкI уасэр ирегъэщхьыр

Гъэпща шарым Дыжым:

«КъэмыувыIэу ар докIуей,– жи,– уэгум,–

ИщIа кIапсэр IэщIэплъхьамэ

Нэпсей удым и удыжым».

 

УАСЭР «КЪИГЪЭПЦIАЩ»

ЖиIа псалъэм Борэ тетыжакъым:

ДригъэкIуейри уасэр лъагэу,

Тегъуэлъхьэн

ГъущI гъуэгум идэжакъым.

 

МАТIЭ И УПЩIЭ

«ЗыхъумэжынымкIэ а ди министрым, –

КъыдоупщIыр МатIэ,– ищIэу пIэрэ,

НэгъуэщI мыхъуми,

Зэрагъауэр автоматыр?»

 

РИТОРИЧЕСКЭ УПЩIЭ

ЦIыхубэ мылъкум зэрепIэскIур

Флъэгъуауэ къыщIэкIынщ а пIаскIуэр.

ИмыщIэуэ пIаскIуэкIэ

ХужыфIэфыну ДерипIаскIуэ?!

 

НЭЩЭНЭ

Бадзэуэгъуэм и зэманми

Бот къекIухьыр щыгъыу ботэ –

Акъыл пхэнж абы зэриIэм

ЗанщIэу гу лъыботэ.

 

ЕГЭ-Р АХЪШЭКIЭ ЗЫТА ПIЫТIАЩ

Мэдыхьэшхри мэдыхьэшхыр

ЕГЭ-р ахъшэкIэ зыта ПIытIащ:

«И гугъат,– жи,– коррупцэр ипIытIын,

ЕГЭ-р коррупцэм щIипIытIащ».

 

КЪУАРГЪЫМ И ПСАПЭ «ЩIЭКIЭ»

ХуищIащ къуаргъым

Дзыгъуэнэфым тыгъэ:

Къыхуищэхури, иритащ

Фэтыджэн уэздыгъэ.

 

НЫБАБЛЭ ЛЭН

Ныбэ Iуэхущ нэхъыбэу

КърихуэкIыр Лэн:

Дэлэн бэлыхь щапщэфIу зэхихащи,

ХьэщIапIэ макIуэ Гундэлэн.

 

КЪУАРГЪЫМ

Хьэрэму лIа былымхэм

(Егъуэт жьэпэпсу)

Щыхуейм и дежым,

ЗыIурыбзаеу ешхыр я лыр.

Хуэмей, зэребгъэщIынур

Сыт абы гум ешыкъылIэу

Бетховен и макъамэр

ЗыгъэIуф роялыр?!

 

КIУНЭ ГУ ЗЫЛЪИТА ПЭЖ

«Джэдумрэ хьэмрэ,

Зыхуей псор ягъуэтмэ,

Зэдопсэу,– жи КIунэ,–

Уеблэмэ, зэтауэ я кIэIунэр».

 

СЫМАДЖЭ УГЪУРСЫЗЫМ

И IэпкълъэпIкъым хэлъкъым

Къемыузу зы хуэ.

Ар яхэтщ итIани

Зи мыIуэху зэзыхуэм.

 

ПЭКIУМ И ДЕРС

Ирегъэщхь тыкуэнхэр

Псэ зыпытхэм ПэкIум:

«Ди зэманым къокI,– жи,– ахэр

Хуэдэу Iэгъэбэгум».

 

ТIАЛЭ И ПЭЖ

Зытетын лъэгапIэ

Къимылъыхъуэ ТIалэ:

«Фыгъуэнэдхэм кърадзых,– жи,–

Тетхэр пьедесталым».

 

МЫХУ И ПЭЖ

«Нэхъ къищтэнущ куэдкIэ,–

ЖеIэр Мыхум,–

Къуийм и пыIэр

Махуэм щхьэрымыхум».

 

ЛАЛ ЗЫФIЭФI ХЬЭЖБИЛАЛ

Ишхынут махуэ къэскIэ лал

Лэжьэн зи жагъуэ Хьэжбилал.

 

ЩЫХЬЫМ И ХЬЭЛЭБЭЛЫКЪ

«Адрейхэм хуэдэу,

Сэри щхьэ къызэвмытрэ ахъшэ?–

ЖеIэр, биржэм кIуауэ щыхьым,–

Сылажьэу къикIрэ,– жи,– сэ

Жэщи махуи

Мэз сызыщIэсыр къэсхущыхьым?!»

 

ЗЕРИ ГУКЪЫДЭЖ ИIЭ ХЪУАЩ

«А фор сэри зесхьэнт»,– жи Зерэ,

Фо зезыхьэхэм я Iэпэм зэребзейрэ.

 

МИЛИЦЭМ И ИНСПЕКТОРЫМ

Егъэлеяуэ фадэ ефэхэм

Яхэуащи хъуркъым Мызэ:

Езыми къохъур бжьэ щиIэт

Буфетым щIэсу зэзэмызэ.

 

ХЭПЛЪЫХЬ ЗЫЩI ТIАКЪЫМ

Хэплъыхь Iыхьэншэщ.

Адыгэ псалъэжьщ

МыщIалэжми, иджыр къыздэсым

Фыз къишакъым ТIакъым:

ЩIыпIэ куэдым уэздыгъэ нэхукIэ щылъыхъуати,

Темыту банэ, розэ игъуэтакъым.

 

ЩХЬЭЩЫТХЪУ ДЭРБЗЭР ДИНЭ

Iэзэ дыдэу IуидыкIыфу кхъуакIэ

Зелъытэж Щхьэщытхъухэ япхъу а Динэ:

«Сэ абыкIэ къыдэзнащ,– жи,– хьэрэкъуакIэ

Модельеру ягъэIуа Мадинэ».

 

ЗИ ЩХЬЭ И ПIАЛЪЭ ЗЫМЫЩIЭЖ МАДИН

«Щхьэ имыщIрэ,– жи,– нэмэз

Махуэ къэскIэ Дин?»

Нэмэз игъащIэм зымыщIа

Iимансыз Мадин.

 

ДИН И ПЭЖ

«А щIалэжьым сеубзэн хуей хъуащ»,– жи Дин:

Ахъшэ щIыхуэ къыIихащ

КIэпIейкIэм цIэ тезыукIэ

Зи хабзэ Iэзэдин.

 

ЧЭФЫЖЬЫПКЪЭ УТIЭ

Зэтескъым и щхьэр

Чэфыжьыпкъэ УтIэ:

Ерыскъы шыугъэ хъуам

Аргуэру шыгъу хеудэ.

 

ХЬЭБАС И БАЗ

Ирауд бэнэнкIэ зигъэнщIкъым.

Адыгэ псалъэжьщ

ЛъэщыгъэкIэ

Узыпегъыхьэр баз

Зи базыр гъущэу сытым дежи

КъызыфIэпхь Хьэбас.

 

МАРТИН И ПЭЖ

«Семыхъуапсэ,– жеIэр Мартин,– иным,

Псом хуэмыдэуэ а иныр къыхэкIамэ

ДыгъуэгъуакIуэу дунейм тетахэм я щIэиным».

 

ГУАЩЭ И ПЭЖ

«ЦIыхухэри хьэпшыпым и пIэм

Иуващ,– жи – Гуащэ: –

Яритри ахъшэ, щыхьэт нэпцIхэр

Къищэхуащ Лэгуащэ».

 

ДЖЭРЭЗ

ЩIэныгъэшхуэ бгъэдэмылъми,

Къулыкъу лъагэ къратащ Джэрэз:

Ар чыным хуэдэу (ухуейм ижьымкIэ, ухуейм

сэмэгумкIэ)

Мэхъур бгъэджэрэз.

 

МЭКЪУ IЭТЭР IЭМБАТЭКIЭ

ЗЫГЪЭФЫЖАМ

Къуажэ уэлийуэ лэжьа Лонэ

Хуэфащэщ теттхъуэм

Дунейм бзаджэу тетыр:

Аркъэ птулъкIэкIэ дэуейри,

Къриудыхыжащ жылэр зыщыгуфIыкIыу

Лъагэу дрихуеяуэ щыта и авторитетыр.

 

СОНДЭДЖЭРИТIЫМ

Iэстофрилэхь! А тIум я Iуэхур

Хуэдэщ мафIэ гуащIэм:

Ахъшэ тумэныр зэпаубыдауэ,

Зэрошх,зэролIыр,зэрогъэлъэгуажьэр.

 

НАРКОМАНЫМ

ИщIащ афияным делэ Лыхьыр:

ЙолъэIур ар Алыхьым

И бын къилъхуахэм

Къытрилъхьэну и бэлыхьыр.

 

ЩIИДЗАЩ КЪЭУШУ…

ЩIидзащ къэушу

И акъылыр Д-ым:

«Сэ жысIэр щIэи,сэ сщIэр умыщIэ»,–

ЖреIэр ефэндым.

 

ЕМЫДЖА МАДИНЭ

«Сщыгъупщэжащ,– жи,–

ИщIэр егъэджакIуэ Динэ»

Динэ ищIэр зэи

ЗымыщIа Мадинэ.

 

ЗЕУЦIЭПIЫЖЫР…

ЗеуцIэпIыжыр хьэрэмыгъэншэ НакIэм:

КърекIыхыр тхъупсыр,

Утыкум къиувауэ,

Бзаджэнаджэм.

 

МУРАТ И ЕПЛЪЫКIЭ

Урокым щIэсщи,

Мурат жреIэ къыбгъурысым щэхуу:

«А Чичиковым ваучер

Къищэхун хуеящ,

МэкъумэшыщIэ лIахэр къимыщэхуу».

 

ШКIЭЖЬЫМ И УПЩIЭ

Iур зыIыгъхэм ярет мыпхуэдэ упщIэ ШкIэжьым:

«Апхуэдизу щхьэ вгъэпудрэ

Гурэ псэкIэ къилэжьа и гъавэр

ТхьэмыщкIэжьым?»

 

ЖУМЭРЭНХЭ Я КЪУЭ МЫХУ

Мыгузавэ зыкIэ

Жумэрэнхэ я къуэ Мыху:

ГъэтIылъыгъэр зэрылъ и гъуэм исщи,

ЕкIуэкI кризисым и жьы дыджыр къыщIимыху.

 

ТАНЭ КЪЭЗЫДЫГЪУА ГЪУАМЭ И ПЭЖ

«Сэ тутнакъым нобэ

Симысынт,– жи Гъуамэ,–

IэщIэвыщIэу Iуэм итахэр

Псори къэздыгъуамэ».

 

ЩIЭДЖЫКIАКIУЭ КIУЩЭ

«ТекIуэжащ» Маниловым

Тхылъ еджэнкIэ КIущэ:

Илъэсищым щIиджыкIащ

НапэкIуэцI пщыкIущыр.

 

УЭРАМ ХЬЭЦУ МЫХУЭ

ХущIэмыхьэу тхьэ щеIуэжыр Мыхуэ:

Ар къэджэдыхьыным къыдэмыхуэ.

 

ЖЫIЭМЫДАIУЭ ФОЗЭ

ЗыхуэмышыIэ пщтырафэм

Ещхьщ зыкъомкIэ Фозэ:

Ди гуо макъым къемыдаIуэу,

ТфIилъэдэну хуожьэ и пэм паровозым.

 

ЩОТХЪУР И БЖЭНЫЖЬЫМ ТАУР

КърекIыхыр тхъупсыр

И бжэныжьым Таум:

«Слъэгъуакъым,– жи,– ар сэ зэи

Псы икIыпIэм нэмыс щIыкIэ и кIэр иIэтауэ».

 

ВУНДЕРКИНД НЭГЪУЕЙМ

Биологием хищIыкIыу куууэ

Зелъытэж Нэгъуейм:

ЕщIэр фIыуэ гъуейм щIэс гъудэр

Зэрымыаргъуейр.

 

IЭ IЭТЫНЫР ЗИ МЫХАБЗЭ МЫЦЭ

Iэ щаIэтым мыкIуауэ щытми,

Мыгузавэ зыцкIэ Мыцэ:

 «Си бюллетеныр къамыгъэнэну,– жи,–

«Единэм…» щхьэкIэ комиссэм хэтхэм

Урнэм ирамыдзэу».

 

ПСИХОЛОГЫМ И УПЩIЭ

«Пэжщ, Мудар природэм

Къритакъым дар.

АтIэ, сыт,– жи,– ар Мудар

ЩIриудэкIыр и егъэджакIуэ

Хьэжмудар?»

 

НАПЭР ХЬЭПШЫПКЪЫМ

Пщэж мыхъуну напэр

Иплъхьэнум щхьэкIэ жыпым:

Пщэжам – къыпхуэщэхужкъым –

Ар хуэдэкъым хьэпшыпым.

 

БЮРОКРАТЫМ И ХЬЭЛ

Утеувамэ и кIэм, бюрократыр

Уи ужь къоувэ, къуитын мурадыр

ИIэуэ узыгъуэр.

ПхъэнкIий ибдзахэм щIедзэр щыпэщащэу,

Къыщыпхуилъыхъуэу щхьэусыгъуэ.

 

ФАДЭМ ДИШЭХА МУЛЪХЬЭБА

И хьэмаскIэми хьэзырт хуищIыну ба,

Къыхуищэхумэ зы бжьэ Мулъхьэба.

 

ХЪУМАКIУЭ МЫЦIУТI И ПЭЖ

«Иджырей васкэхэр уи шэм щыхэфым деж,

Ущысын хуейщ, жумыIэу «цIутI»:

Зыгуэр яжепIэмэ, жумэрэныхъуу зыкъыпхуратIэри,

КъофыщIауэжыр»,– жи МыцIутI.

 

БРЕЖНЕВЫМ И ЛЪЭХЪЭНЭМ

МЭЛЫХЪУЭУ ЛЭЖЬА АКIЭМ

Сабэр уэгум дрепхъейр,

Къэгубжьауэ, АкIэм:

«Къыдоплъэр,– жи,– къыздэсым нобэр

Щэ дэлъ я гугъэу си гуфIакIэм!»

 

ФАДАФЭМ И ХЬЭЛ

Щогъупщэж и жыпым илъыр,

Фадэ Iухуэм:

«Мыдэхьыт» жиIэурэ,

Тутын зэфэнур къелъэIухуэр.

 

МЭТ И ПРОГНОЗ

«А щIалэжьыр гугъу ехьыну

КъыщIэкIынщ»,– жи Мэт:

Къилъыхъуэну Iулъхьэ щамыт щIыпIэ

Теуващ гъуэгуанэ Мухьэмэд.

 

IУЛЪХЬЭ КЪЕIЫХЫКIЭ

КъыIихырт Iулъхьэр

Щэхуу и фыз Зарэ,

И Iэр «къабзэу» щытын папщIэ

Ди уэлийуэ лажьэ Iэбизарэ.

 

ЧИМРЭ ХЬЭЧИМРЭ

ЕтхьэмпIэпщу Чимым ихуа чийм

Ироуэркъыр щхьэхынэжь Хьэчим.

 

ЕГЪЭДЖАКIУЭУ ЛАЖЬЭ СЭХЪУМ

Ихуэжкъым и фэм,

Къэгубжьащи, Сэхъур:

«Сабийхэр дэ догъасэр,– жи,–

Телеэкранхэм ахэр ягъэсэхъур».

 

 

СЛОВО ОБ АВТОРЕ КНИГИ

По-разному складываются судьбы начинающих писателей: кто-то быстро находит себя, кто-то долго ищет «свое место» в литературе, а с иными и не расстаются до конца жизни «детские болезни» роста. Долго искал свою тропу в литературе Юрий Милуевич Гетоков. Я рад, что поиски увенчались успехом: поэт нашел себя в стихотворной миниатюре – двухстишия, четверостишия стали основным жанром в его неустанной работе. Таких стихотворений написано Гетоковым

немало, они вошли в книги поэта «Мост-блезир» (1995) и «Аркан» (2001). А читатель давно знает многое из того, что создано за три десятилетия– стихи Гетокова публиковались в газетах, в журнале «Ошхамахо», в хрестоматиях, звучали по радио и телевидению. Глубокие по смыслу, выразительные, искрометные, веселые и грустные, всегда жизненные, они подкупают

читателя потому, что в них, говоря словами Н. А. Некрасова ,«словам тесно, мыслям просторно».

Герои стихотворных миниатюр Ю. М. Гетокова берутся из повседневной жизни. Наблюдательный поэт высвечивает несколькими штрихами черты своих героев, поэтому они запоминаются. Иные из миниатюр схожи с народными поговорками, пословицами своей лаконичной, верной оценкой жизненных явлений. Поэт не призывает, не поучает, не наставляет читателя кого-то или что-то полюбить или возненавидеть. Он как бы говорит: «Вот люди, которых я вижу, вот жизненные явления, которые привлекают мое внимание, вот что я люблю, а вот что я ненавижу, кого и что принимать из них или отвергнуть– дело твое». И читатель благодарен поэту за новизну его взгляда на описываемое, за то, что он обогащает его своим видением предмета, своими мыслями и чувствами.

Зубер Тхагазитов,

Народный поэт КБР

 

 

СТИХОТВОРЕНИЯ

ИЗ СБОРНИКА «МОСТ-БЛЕЗИР»

 

ГОЛОДНЫЙ

Голодный к сытому претензию имеет,

Но обнародовать ее не смеет:

Он держит под замком правдивые слова

В надежде на объедки с барского стола.

 

НАРОДНЫЙ ИЗБРАННИК

О справедливости с трибуны он вещает…

Все, что имеет сам, нам вскоре обещает.

 

ВОРОБЕЙ

Воробью не нужны

Ни гнездо, ни семья.

Беззаботная жизнь –

Это суть воробья.

Он порхает везде…

Проводя свои дни,

Как нахлебник-«бедняк»

У богатой родни.

Так бездельник иной

Среди добрых людей

Сытно ест, сладко пьет…

Жалкий, как воробей.

 

БЛАГОДАРНОСТЬ БОЛТУНА

Благодарит болтун…

Слова скользят как рыба.

Сто слов сказал,

Забыл сказать – спасибо.

 

ПУСТАЯ ЖИЗНЬ

Он в ветхом шалаше

На берегу реки сидел

И год, и два, и три…

Пока не поседел.

Но время шло,

И превратился он

В больного старика.

Он позабыл

И вкус ,и цвет воды,

И то, что был

Когда-то молодым.

 

ЛЖЕГОСТЬ

На наставленья он

Со ртом набитым падок.

Он в гости ходит –

Наводить порядок.

 

ОСЛИНАЯ ТОЧКА ЗРЕНИЯ

Глупая лошадь.

Однажды осла

Свою красоту

Оценить попросила.

Он с холки

Ее оглядел до хвоста

И молвил:

– Ты б уши себе отрастила,

Подковы сняла.

И забыла седло,

В сбрую перестала рядиться.

Тогда бы ты стала –

Отрадой ослов,

Прекраснейшей в мире ослицей!

 

БОРЕЦ СО СВОБОДОЙ СЛОВА

Верх берет,

Где золотом, где плетью

Вынуждает всюду нас молчать.

Волю дай ему –

На белом свете –

Тиснет он

Молчания печать.

 

ОСТРЯК

По слепоте души, бывает,

На именах язык он заостряет.

Бедняга. Право, он не знает,

Что его имя означает.

 

ВСПЫЛЬЧИВЫЙ

Он был всегда непримирим

Ко всякой безделушке.

Комар садился на лицо –

Палил в него из пушки.

 

ГОРЕ-ХОЗЯИН

Всю зиму сани делал он,

Наперекор зиме и снегу.

И на запчасти разбирал

К весне свою телегу.

 

ПРЕДОСТЕРЕЖЕНИЕ ПТЕНЦАМ

Он с детства не познал, что он орел,

Он сущность потерял свою с пеленок.

В вороньей стае счастье он обрел,

Теперь он гадкий, глупый вороненок.

 

КОМАРИНЫЙ ПОКОС

Клянется он, что каждый год

Исправно сено косит.

Крестьянин, проливая пот,

Его на шее носит.

 

ОБ «УМНОЙ» МАТЕРИ И ГЛУПОМ СЫНЕ

О глупом сыне говорила мать,

Что, мол, она его и научила,

Чтоб где-нибудь в пути не потерять,

В мешок заплечный надо спрятать шило.

 

СПОРЯЩИМ БРАТЬЯМ

Бедлам в дому,

Коли согласья в братьях нет.

Зачах в дыму –

Родства и крови свет!

 

БОЛТУН

Он беспокоится за целый мир,

Всему внимая , распускает слухи…

Бедняга, он не ведает о том,

Что крыша его дома вот-вот рухнет.

 

МОСТ-БЛЕЗИР

Под ним воды ни капли не бежит.

«Я тоже мост!»–

Он гордо говорит.

 

ХАМЕЛЕОН

Умеет жить он. Тактика проста –

Всегда рядиться в нужные цвета.

 

НЕПРИМИРИМЫЙ СПОРЩИК

Он в споре никогда не соглашался,

Как в жаркой битве, все крушил сплеча.

Он с юности упрямо опирался

На довод обнаженного меча!

 

СКАЗАНИЕ О ЯЙЦЕ

Уставши голодать,

Однажды утром хмурым,

Яйцо своим вождем избрали куры.

Согрели то яйцо,

Запрятали в курятник…

А из того яйца –

Проклюнулся стервятник.

– Да наш он все равно,–

Решили куры,

И птичьим молоком

Его вскормили дуры.

Он подрастал в тепле

И нежной ласке…

Все это, братцы, – быль,

А не ребячьи сказки.

Он вырос и окреп,

Тот маленький стервятник…

И ровно через год

Он разорил курятник.

Вот, собственно, и весь

Рассказ наш о яйце.

Вы думайте всегда –

В начале о конце.

 

КОСАРЯМ

Косить, все знают,– дело непростое,

Особенно в период сухостоя.

Коса гудит от лезвия до ручки,

Кося бурьян и крепкие колючки…

С такого сена– никакого толку:

Не корм корове, а подстилка – волку.

Вот так и мы, стихи свои кропая,

За временем своим не успевая,–

Все пишем книги, без ума и толка:

Они потом гниют на книжных полках.

 

ПРЕДУПРЕЖДЕНИЕ

С оружием всегда

Необходима осторожность:

На выстрел у него всегда

Есть повод и возможность.

 

ЖИТЕЙСКАЯ МУДРОСТЬ

Скотина вырастет худая –

Какое-никакое мясо есть.

А человека вырастешь плохого –

Пожнешь бесславье, потеряешь честь!

 

ПОДХАЛИМ

Он вас и встретит,

И проводит по одежке…

Его язык сродни

Обкатанной дорожке.

 

ШУТНИК

Козу свою он привязал

К плетню соседа ночью.

А утром хмыкнул и сказал:

«Любуйтесь этой сволочью!»

 

ЗАВИСТЬ ГУСЯ

Шипел от зависти…

Цыплят и уток бил…

Когда хозяин

Индюка в котле хвалил.

 

УСЫ

Усы для моды в юности растил,

От лени брить до старости носил.

Он не ответит, как ни расспроси,

Зачем ему, безмозглому, усы.

 

ЮЛА

Всю жизнь юле – по воле рук чужих юлить,

Во век веков юле юлою быть.

 

САМОМНЕНИЕ

И нитка, вдетая в ушко иглы,

Придаст себе значение стрелы…

 

НУЛЬ

«Он– нуль, он ничего не значит» –

Так некие из цифр твердят о нем.

Но если счетовод его припрячет,

То сразу обнищает миллион!

 

УЛОВКИ САМОКРИТИКИ

Он камни швыряет в чужой огород,

Его обличеньям внимает народ.

А маленький камешек бросит на свой

Пустой огород, весь поросший травой.

 

ВСЕМУ СВОЕ МЕСТО

На небе– место у рассвета и заката,

На ветках– у цветенья и плода.

Но не собрать вам кисти винограда

В шиповниковой чаще никогда.

 

КОЛЕСО И ОСЬ

Согласье было между ними,

Будто в сказке,

Когда они имели

Много смазки.

Тогда друг с другом

Ладили они,

В трудах совместных

Проводя все дни.

Но смазка кончилась,

А это значило,

Что между ними

Поселилась ржавчина.

Теперь с утра до ночи –

Шум и скрежет

Скрипят, как будто бы

Один другого режет,

Вот собственно и все

О смысле смазки.

У них она была

Основою любви и ласки.

 

СТАРЫЙ ЖУК

Пусть жизнь моя

Уроком будет для других.

Все, что я видел,–

Опишу для них,–

И с мыслями такими

Принялся жук писать.

Он день и ночь бумагу

Принялся марать.

Он воспел не горы,

Не прохладу рек.

А нору в навозе,

Где провел свой век.

 

ПОУМНЕЛ

Среди огромного, как море, табуна

С ушами заостренными приметил я коня.

За красоту его, я быстроногим посчитал

И дорогой уздечкой немедленно взнуздал.

Табунщик пожелал мне счастливого пути

Я, смело дернув повод, сказал коню: «Лети!»

Камчу не взял с собою… Но вот через версту,

Я посмотрел с тоскою на эту красоту.

Он важно и неспешно шел по степи вперед…

Смеялся надо мною встречавший нас народ…

Он сделал из джигита– посмешищем меня.

Я снял с него уздечку. Прогнал того коня.

С тех пор я не по форме о красоте сужу.

Теперь на содержанье я вдумчиво гляжу.

 

МУЖИК С УСАМИ

Пока ему– на встречном ветре –

Усы огонь не опалил,

Не помнил он и не заметил,

Что не на празднике он был.

 

СКЕПТИК

Он сам себе порой не доверяет.

А вашу честность– глупостью считает.

 

О БРОШЕННОМ СЕНЕ

Охапка сена думала о том ,

Мол ,полежу в степи ещё немного –

Хозяин вспомнит обо мне, потом

Я стану всё равно вершиной стога !

 

О СВОЕВРЕМЕННОСТИ

Строй смолоду свой дом

И в нём расти детей.

Не забывай при том

О бренности своей.

Будь своевременным

Повсюду и всегда.

Ведь жизнь уходит,

Как меж пальцами вода!

Перевел с кабардинского

А. В. Клочинов

 

 

 

ПЕРЕВОД СТИХОТВОРЕНИЙ

ИЗ КНИГИ «АРКАН»

 

ВОЛК

Утешает старика,

Давно не евшего, Питита:

«И у меня, скажу, частенько

Не бывает аппетита».

 

ТОРИНЫ ПОМИДОРЫ

«Ума палата»

У коммерсанта Торы:

В Кахун доставил летом

Продавать свои помидоры.

 

НАНИНЫ БАНАНЫ

Есть коммерческая жилка

Да у нашей наны:

По накрученной цене

Продает бананы.

 

БЮРОКРАТ– ШАХМАТИСТ

Когда публично

Ему поставишь мат,

Начнет искать

Против тебя он компромат.

 

ПОДКОВЫ ИНАЛА

На скользком льду

Никак не могут повалить Инала:

Его ноги стоят крепко

На подковах криминала.

 

ХИТРОУМНЫЙ КРИТИК

Прекрасно знает,

Как оппоненту закрыть рот:

Кидает камни он

И в свой грешный огород.

 

БЕЗМОЗГЛЫЙ

Гордится своим статусом,

Увидев в нем спасение:

Он застрахован при падении

От мозгового сотрясения.

 

КЛЯУЗНИК

Грозит: «О безобразии этом

Я, непременно, напишу в ООН:

Вчерашнюю газету на дом

Мне не доставил почтальон».

 

ЗАВ. ДЕТСАДОМ

Следит внимательно

За чистотой фасада:

Ведь по нему же часто судят

О достижениях детсада!

 

АСПИРАНТУРА ТУРЫ

Ни в зуб ногой

В кониной теме Тура:

Лишь только с нравами осла

Знакомила его аспирантура.

 

КРЫШКА СТОЛА

Бахвалится она

Своей кичливой дикцией:

«Четыре ножки, как-никак, находятся

Под моею юрисдикцией!»

 

МОНОЛОГ МЕТЛЫ

«Тружусь в поте лица я,

Невольно исполняя свою миссию:

Надо мне достойно встретить

Завтра грозную комиссию».

 

«ИНСТИТУТ ТУТА»

Устроился сапожником

Бывший студент Тут,

Закончив на «отлично»

Аграрный институт.

 

МОДНАЯ ОДА

Постарела быстро ода:

Ее темой была мода.

 

ЗАМАШКИ ДИКТАТОРА– БЮРОКРАТА

Одержим безумием,

Знаем мы его позицию:

Со света белого согнал бы

Свою он мигом оппозицию.

 

ЦИНА И МЕДИЦИНА

Людей дурманит

Знахарь Цина,

Когда бессильна

Медицина.

 

ПОВАР ЗАБЫВЧИВЫЙ

Чтобы дом свой мог построить,

Получил он ссуду,

Но за ссуженные деньги

Закупил посуду.

 

КАНДИДАТ НАУК, ОДЕРЖИМЫЙ КАРЬЕРОЙ

Отказался б от доплаты,–

От рубля и цента,–

Если дали бы ему

Звание доцента.

 

СОВЕТ ХОДЖИ НАСРЕДДИНА

«Хочешь быть действительным членом РАНа,–

Незамедлительно

Начни свой путь ты с ресторана».

 

БАРАН-СОЛИСТ

Возомнил,

Что имеет музыкальный дар,–

Спешно едет он учиться

В город Краснодар.

 

ЧЕСТВОВАНИЕ «РАЦИОНАЛИЗАТОРА»

Воздали славы дань

Псевдоконструктору Олегу:

Он изобрел спонтанно

С пятью колесами телегу.

 

ВОПРОС К ГААГЕ

Вопрос к Гааге,

Непростой, непраздный,

Есть у подростка Симы:

«Когда предстанут

Пред твоим судом

Виновники трагедии Хиросимы?»

 

ПРИЗНАНИЕ ВЫПУСКНИКА ШКОЛЫ

«Скажу я честно: не знаю,

Что такое Чили.

На уроках эту тему

Никогда мы толком не учили».

 

ОТКРЫТИЕ ОЛИДА

Сенсационное открытие

Сделал пациент Олид:

Торгует больничными

И даже доктор Айболит.

Перевел с кабардинского автор

 

 

ТХЫЛЪЫР ЗЫТХАМ КЪЫБГЪЭДЭКIЫУ

Си еплъыкIэр

(Сраблагъэу щытми лъыкIэ)

ТемыхуэнкIи хъунущ

Си лIыхъужьхэм я дуней еплъыкIэм.

 

 

 

Литературно-художественное издание

Гетоков Юрий Милуевич

ДЖЭРПЭДЖЭЖ (ЭХО)

Стихотворения

На кабардинском и русском языках

 

© Джатокъуэ Ю. М., 2009

© КъБР-м и КъП РП, 2009